الماتى وبلىسىندا ۇلت ۇستازى حاكىم ابايدىڭ 180 جىلدىق مەرەيتويى اياسىندا ءوڭىردىڭ 119 مادەنيەت ءۇيى مەن 144 كىتاپحاناسى, 15 مۋزەيىندە جىل باسىنان بەرى 30 مىڭعا جۋىق ادامنىڭ قاتىسۋىمەن 146-عا تارتا كەزدەسۋ, كونتسەرت, كورمە جانە ادەبي اكتسيالار ۇيىمداستىرىلدى.
10 تامىز كۇنى قوناەۆ قالاسىنداعى اباي ەسكەرتكىشى الدىندا وبلىس اكىمى مارات سۇلتانعازيەۆ باستاعان وبلىسىمىزدىڭ زيالى قاۋىم وكىلدەرى گۇل شوقتارىن قويىپ, تاعزىم جاسادى.ءوڭىر باسشىسى قۇتتىقتاۋ ءسوز سويلەپ, ارتىنان وبلىس ونەرپازدارى ۇلى اقىننىڭ اندەرىن ورىندادى.
مەرەيتويلىق باعدارلامادا الماتى وبلىسىنىڭ ەرەكشە سىيى دا ورىن الدى. ۇلى اقىننىڭ 180 جىلدىعىنا وراي الماتى وبلىسى اباي ەلىنە «التىن ادام» ءمۇسىنىن تارتۋ ەتەمىز. بۇل قادام – قۇرمەت پەن دوستىقتىڭ بەلگىسى, سونداي-اق ەكى ءوڭىر اراسىنداعى رۋحاني بايلانىستى نىعايتۋدىڭ باستى سيمۆولى بولادى.
اباي وبلىسىندا مەرەيتويعا وراي قازاقستاننىڭ حالىق ءارتىسى, مەملەكەتتىك سىيلىقتىڭ يەگەرى سەكەن تۇرىسبەكوۆتىڭ جەتەكشىلىگىمەن «اق جاۋىن» مەملەكەتتىك كامەرالىق وركەسترى جانە الماتى وبلىسىنىڭ ارتىستەرىنىڭ قاتىسۋىمەن «اباي جولى» اتتى ۇلكەن رۋحاني كونتسەرت بەردى. بۇل شارا كورەرمەندەر ءۇشىن ۇلى اقىن شىعارماشىلىعى الەمىنە جاسالعان ۇلكەن رۋحاني ساياحاتقا اينالدى.
"اباي – قازاق حالقىنىڭ عانا ەمەس, بۇكىل الەم تامسانا قارايتىن ۇلى تۇلعا. ونىڭ ءسوزى بۇگىندە بار حالىقتى شابىتتاندىرىپ, كەمەلدەندىرەدى. ءبىز الداعى ۋاقىتتا دا اباي شىعارماشىلىعىن جاستار اراسىندا كەڭىنەن ناسيحاتتاي بەرەمىز", - دەدى الماتى وبلىسىنىڭ اكىمى مارات سۇلتانعازيەۆ.