ۇلى اقىننىڭ مەرەيتويى بيىل ەل كولەمىندە ون كۇن بويى اتالىپ وتۋدە, دەپ جازادى Egemen.kz.
اباي (يبراھيم) قۇنانباي ۇلى – ۇلى اقىن, اعارتۋشى, فيلوسوف, كومپوزيتور, ۇلتتىق ادەبيەتىمىزدىڭ نەگىزىن قالاۋشىلاردىڭ ءبىرى. ونىڭ دانالىق سوزدەرى مەن تەرەڭ ويلارى ۇلتتىڭ رۋحاني قازىناسىنا اينالدى.
ول قازىرگى اباي وبلىسىنىڭ قاراۋىل اۋىلىندا دۇنيەگە كەلگەن. اكەسى قۇنانباي – ەل بيلىگىنە ارالاسقان, قاجىلىققا بارعان تاريحي تۇلعا.
اباي العاشقى ءبىلىمىن اۋىل مولداسىنان الىپ, كەيىن سەمەيدەگى احمەت ريزا مەدرەسەسىندە وقىعان. ول اراب, پارسى, تۇركى جانە ورىس تىلدەرىن مەڭگەرىپ, شىعىس پەن باتىس ادەبيەتىن تەرەڭ زەرتتەدى.
اقىن پۋشكين, لەرمونتوۆ, كرىلوۆ, گيوتە, بايرون سياقتى الەم ادەبيەتى كلاسسيكتەرىنىڭ شىعارمالارىن قازاق تىلىنە اۋدارىپ, ۇلتتىق پوەزيانى جاڭا ساتىعا كوتەردى. ونىڭ اۋدارمالارى مەن اندەرى ەل اراسىنا كەڭىنەن تارالىپ, قازاقتىڭ رۋحاني بايلىعىنا اينالدى.
ابايدىڭ 45 "قارا ءسوزى" – حالقىمىزدىڭ مورالدىق, ءدىني, فيلوسوفيالىق وي-ساناسىن دامىتقان بىرەگەي ەڭبەك. ول ءبىلىم, تاربيە, ادامگەرشىلىك, ادىلەت, ەڭبەك, ءدىن جانە قوعام تۋرالى تەرەڭ وي قوزعادى. بۇگىندە ابايدىڭ ەسىمىمەن اتالاتىن وبلىس, ۋنيۆەرسيتەت, تەاتر, مەكتەپتەر مەن كوشەلەر بار.
ونىڭ 150 جانە 175 جىلدىق مەرەيتويلارى يۋنەسكو شەڭبەرىندە حالىقارالىق دەڭگەيدە اتالىپ ءوتتى. اباي ەسكەرتكىشتەرى قازاقستانمەن قاتار رەسەي, تۇركيا, گەرمانيا, فرانتسيا, يران سياقتى ەلدەردە ورناتىلعان.
اباي مۇراسى – بارشا ادامزاتقا ورتاق رۋحاني بايلىق. ول قازاقتى "مال ءۇشىن ەمەس, ار ءۇشىن ءومىر سۇرۋگە" ۇندەدى.