«عىلىم ورداسىندا» اباي قۇنانباي ۇلىنىڭ تۋعانىنا 180 جىل تولۋىنا وراي «ادەبيەت – دوستىق كوپىرى» تاقىرىبىندا كورمە ءوتتى.
يران يسلام رەسپۋبليكاسىنىڭ الماتى قالاسىنداعى باس كونسۋلدىعى جانە مادەني وكىلدىگىمەن بىرلەسىپ وتكىزگەن ءىس-شارا حاكىمنىڭ مۇرالارىن دارىپتەۋگە, ادامزاتتىق قۇندىلىقتارعا نەگىزدەلگەن يدەيالارىن حالىقارالىق دەڭگەيدە ناسيحاتتاۋعا ارنالدى.
قازاق-يران ادەبي بايلانىسىن نىعايتۋعا, ەكى ەل اراسىنداعى مادەني ىنتىماقتاستىقتى جاڭا دەڭگەيگە كوتەرۋگە باعىتتالعان ءىس-شاراعا باس كونسۋل سۋنا احمادي, يران مادەني وكىلدىگىنىڭ باسشىسى حوسسەين اعازادە, سونداي-اق يرانداعى قازاق دياسپوراسىنىڭ وكىلدەرى قاتىستى.
– اقىننىڭ 180 جىلدىعى – ونىڭ رۋحاني جانە ادەبي مۇراسىن جاڭا قىرىنان تانىپ, زەردەلەۋگە مۇمكىندىك بەرەتىن ماڭىزدى كەزەڭ. اباي قازاق جازبا ادەبيەتىنىڭ نەگىزىن قالاۋشى عانا ەمەس, ۇلتتىق وي-سانا مەن مادەنيەتتىڭ رامىزىنە اينالدى. شىعارمالارى ادەبيەتتانۋمەن قاتار, فيلوسوفيا, تاريح, ءتىل ءبىلىمى جانە مادەنيەتتانۋ سالالارىندا كەڭىنەن زەرتتەلىپ كەلەدى. وسى ورايدا, «عىلىم ورداسى» ورتالىق عىلىمي كىتاپحاناسىنىڭ قورىندا ساقتالعان سيرەك باسىلىمدار مەن قولجازبالار – ۇلكەن عىلىمي ماڭىزعا يە. بۇل ماتەريالدار اباي ءستيلىن, جازبا ءتىلىنىڭ دامۋىن جانە شىعارمالارىنىڭ تارالۋىن زەرتتەۋگە مول مۇمكىندىك بەرەدى, – دەپ اتاپ ءوتتى «عىلىم ورداسىنىڭ» باس ديرەكتورى ۇلار مۇقاجانوۆ.
كورمەگە «عىلىم ورداسىنىڭ» سيرەك كىتاپتار قورىنداعى باسىلىمدار, حاكىمنىڭ پارسى تىلىندەگى اۋدارمالارى, 500 بەتتىك «قازاق-پارسى» سوزدىگى, تاعى دا باسقا شىعارمالارى قويىلىپ, ۇلى اقىننىڭ ولەڭدەرى قازاق جانە پارسى تىلدەرىندە وقىلدى.
كەزدەسۋ بارىسىندا قاتىسۋشىلار اباي مۇراسىن پارسى تىلىنە اۋدارعان بەلگىلى جازۋشى, قازاق ادەبيەتىن يران جۇرتشىلىعىنا كەڭىنەن تانىتقان كورنەكتى تۇلعا قاجى مۇحاممەد شادكامدى ەسكە الدى. سونداي-اق اباي ولەڭدەرىن مانەرلەپ وقۋ بايقاۋىنىڭ جەڭىمپازدارى ماراپاتتالىپ, ارنايى سىيلىقتار تابىستالدى. تەمىربەك جۇرگەنوۆ اتىنداعى قازاق ۇلتتىق ونەر اكادەمياسى ستۋدەنتتەرىنىڭ «اباي – رۋداكي» دوستىق كىلەمى مەن باسقا دا تۋىندىلارى كوپشىلىكتىڭ نازارىنا ۇسىنىلدى.
الماتى