2025 جىلى ازاماتتىق بەلسەندى تۇرعىننىڭ وتىنىشىنەن كەيىن الماتى قالاسى بويىنشا ىشكى مەملەكەتتىك اۋديت دەپارتامەنتى يندۋستريا جانە قۇرىلىس مينيسترلىگىنىڭ ونەركاسىپ كوميتەتىنە قاراستى «قازاقستان رەسپۋبليكاسى مينەرالدىق شيكىزاتىن كەشەندى قايتا وڭدەۋ جونىندەگى ۇلتتىق ورتالىق» شارۋاشىلىق جۇرگىزۋ قۇقىعىنداعى رمك-دا تەكسەرۋ جۇرگىزگەن, دەپ حابارلايدى Egemen.kz.
اۋديت بارىسىندا قىزمەتكەرلەرگە جالاقى مەن سىياقى تولەۋدىڭ نەگىزدىلىگى قارالدى. ناتيجەسىندە, 2024 جىلى جۇمىس ىستەلمەگەن ۋاقىت ءۇشىن 14,2 ملن تەڭگەگە جالاقى تولەنگەنى انىقتالعان.
«تەكسەرىلگەن بيۋدجەتتىك قاراجات پەن اكتيۆتەردىڭ جالپى كولەمى 188,9 ملن تەڭگەنى قۇرادى. ەڭبەكاقى تولەۋدەگى زاڭبۇزۋشىلىقتاردان بولەك, اۋديتورلار 34,4 ملن تەڭگە سوماسىندا بىرقاتار ەلەۋلى راسىمدىك اۋىتقۋلاردى تىركەدى. ولاردىڭ قاتارىندا – ءۇش قاشىقتان جۇمىس ىستەيتىن قىزمەتكەرمەن ەڭبەك شارتتارىنىڭ بولماۋى (3,7 ملن تەڭگە), ءۇش قىزمەتكەردە جۇمىس ۋاقىتىنىڭ شەكتى نورماسىنان اسىپ كەتۋى (12,7 ملن تەڭگە), سونداي-اق عىلىمي-تەحنيكالىق باعدارلاما بويىنشا كونكۋرستىق قۇجاتتامانى ازىرلەۋ قىزمەتتەرىنە نەگىزسىز شىعىندار (18 ملن تەڭگە) بار», دەپ حابارلادى قارجى مينيسترلىگىنىڭ ىشكى مەملەكەتتىك اۋديت كوميتەتى.
انىقتالعان زاڭبۇزۋشىلىقتاردى جويۋ جانە جاۋاپتى تۇلعالاردى جاۋاپكەرشىلىككە تارتۋ تۋرالى نۇسقاما بەرىلگەن. بۇل ماسەلە باقىلاۋعا الىنىپ, جينالعان ماتەريالدار قىلمىستىق قۋدالاۋ ورگاندارىنا جولداندى.
ساراپشىلاردىڭ ايتۋىنشا, مۇنداي تەكسەرۋلەر مەملەكەتتىك باسقارۋ جۇيەسىندەگى ولقىلىقتاردى كورسەتىپ قانا قويماي, اشىقتىق پەن زاڭعا باعىنۋدىڭ قوعام الدىنداعى ماڭىزىن ەسكە سالادى.