قر قورعانىس ءمينيسترى, اۆياتسيا گەنەرال-لەيتەنانتى داۋرەن قوسانوۆ 25 شىلدەدە جوعالىپ كەتكەن اۋە قورعانىسى كۇشتەرىنە تيەسىلى EC-145 تىكۇشاعىن ىزدەۋ جۇمىستارىنىڭ جۇرگىزىلۋ بارىسىمەن تانىستى. ىزدەستىرۋ وپەراتسياسى سوربۇلاق كولىندە ءجۇرىپ جاتىر, دەپ حابارلايدى Egemen.kz.
اسكەري-اۋە كۇشتەرىنىڭ قولباسشىسى, اۆياتسيا گەنەرال-مايورى اسقار ءىزباسوۆ مينيسترگە ىزدەۋ جۇمىستارىنىڭ ناقتى جاعدايىن بايانداپ, بۇل اۋماقتاعى تابيعي جانە تەحنوگەندىك جاعدايلاردىڭ ىزدەۋ ۇدەرىسىن قيىنداتىپ وتىرعانىن اتاپ ءوتتى. كول ءتۇبىنىڭ شوگىندى قۇرىلىمى, تەرەڭدىكتىڭ وزگەرمەلىلىگى جانە سۋدىڭ لايلىعى ارنايى تەحنيكالاردى تولىق قولدانۋدى, سونداي-اق وپەراتسياعا قاتىسۋشىلاردىڭ ۇيلەسىمدى ارەكەتىن تالاپ ەتەدى.
«ىزدەۋ جۇمىستارىنا سۋ استى رەلەفى مەن ءتۇبىنىڭ شوگىندى, تەرەڭدىگىنىڭ وزگەرمەلى جانە سۋدىڭ لاي بولۋى كەدەرگى كەلتىرۋدە. الايدا, 25 شىلدەدە جوعالىپ كەتكەن اۋە قورعانىس كۇشتەرى EC-145 تىكۇشاعىنىڭ بورتىندا بولعانداردىڭ قاي جەردە ەكەنىن انىقتاۋ بويىنشا اۋقىمدى ىزدەۋ-قۇتقارۋ وپەراتسياسى كۇندىز دە, تۇندە دە توقتامايدى», دەدى اسكەري-اۋە كۇشتەرىنىڭ قولباسشىسى.
سوربۇلاقتاعى ىزدەۋ ايماعىندا قورعانىس ءمينيسترى جوعالعان اۋە قىزمەتكەرلەرىنىڭ جاقىندارىمەن جۇزدەستى. مينيستر ولاردى قولداپ, بارلىق كۇش-قۇرالدىڭ جۇمىلدىرىلعانىن, ىزدەۋ جۇمىستارى توقتاماي جالعاساتىنىن جەتكىزدى.
ء«بىز سوڭىنا دەيىن ارەكەت ەتىپ, ىزدەۋدى جالعاستىرامىز. جاقىن تۋىستارىنا جان-جاقتى قولداۋ كورسەتىلەدى, كۇن سايىن بايلانىستامىز. قايعىلى جاعدايدىڭ سەبەپتەرىن انىقتاۋ جانە جوعالعانداردى تابۋ ءۇشىن بار كۇشىمىزدى سالامىز», دەدى قورعانىس ءمينيسترى.
تىكۇشاق ەكيپاجىنىڭ كومانديرى ۇيسەنباي نۇرجىگىتتىڭ اعاسى مەدەت ەرجىگىتتىڭ ايتۋىنشا, تۋىستارى كۇن سايىن تاڭنان كەشكە دەيىن ىزدەۋ ايماعىندا جۇرەدى. ولار ىزدەۋ توبىنىڭ قاتارىندا كولدى جاياۋ جانە كولىكپەن ارالاپ, اۋەدەن باقىلاۋ جۇرگىزۋ ارقىلى تىكۇشاقتى سۋ استىنان كورۋ مۇمكىن ەمەستىگىن ءوز كوزدەرىمەن كورگەن.
ەستەرىڭىزگە سالا كەتەيىك, ىزدەۋ-قۇتقارۋ وپەراتسياسىنا 400-دەن استام ادام, كينولوگيالىق توپتار, 70-تەن اسا تەحنيكا, 21 ءجۇزۋ قۇرالى, 10 ۇشقىشسىز ۇشۋ اپپاراتى, ەحولوتتار مەن سۋاستى سكانەرلەۋ قۇرىلعىلارى تارتىلعان.