ۇكىمەت ۇيىندە وتكەن ءباسپاسوز ءماسليحاتىندا الەۋمەتتىك سالاداعى پرەزيدەنت تاپسىرمالارىن ورىنداۋ بارىسى تالقىلاندى. شاراعا ۆيتسە-پرەمەر ەرمەك كوشەرباەۆ پەن سالالىق مينيسترلىكتەردىڭ وكىلدەرى قاتىستى, دەپ حابارلايدى Egemen.kz.
وقۋ-اعارتۋ ءمينيسترى عاني بەيسەمباەۆ ەلىمىزدەگى بىرقاتار مەكتەپتەردىڭ ليتسەنزياسىز جۇمىس ىستەگەنى تۋرالى سۇراققا جاۋاپ بەردى.
ءمينيستردىڭ ايتۋىنشا, ءبىلىم بەرۋ مەكەمەلەرى وقۋشىلارعا ساپالى ءبىلىم مەن قولايلى ورتا ۇسىنۋى ءۇشىن مىندەتتى تۇردە ليتسەنزيامەن جۇمىس ىستەۋى ءتيىس. بۇل تالاپ جەرگىلىكتى بيلىككە تۇراقتى تۇردە ەسكەرتىلىپ كەلەدى.
«قازىرگى تاڭدا ليتسەنزياسىز جۇمىس ىستەگەن 66 مەكتەپتىڭ 18-ءى عانا قالدى. ولاردى جاڭا وقۋ جىلىنا دەيىن قالىپقا كەلتىرۋ ءۇشىن جەرگىلىكتى اتقارۋشى ورگاندار ءتيىستى شارالار قابىلداپ جاتىر. جىل سايىن 200-دەن استام جاڭا مەكتەپ اشىلادى», دەدى عاني بەيسەمباەۆ.
ونىڭ ايتۋىنشا, كەيبىر جاعدايدا اكىمدىكتەر مەن ءبىلىم بەرۋ مەكەمەلەرى ليتسەنزيا راسىمدەۋگە ۋاقىتىندا كىرىسپەي جاتادى. وسىعان بايلانىستى مينيسترلىك زاڭناماعا وزگەرىستەر ەنگىزۋدى ۇسىنىپ, مەكتەپتەردى ليتسەنزيا الۋعا دەيىن تولىق دايىندىق ساتىسىنان وتكىزۋ مەحانيزمىن قاراستىرىپ جاتىر.