تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى جۇرگىزۋشى كۋالىگىن الۋ مەن اۋىستىرۋ ءراسىمىن ەداۋىر جەڭىلدەتەتىن قاناتقاقتى جوبانى ىسكە قوستى. ەندى العاش رەت جۇرگىزۋشى كۋالىگىن الۋ ءۇشىن ءوتىنىشتى ونلاين تۇردە, تىكەلەي «حقكو» ءموبيلدى قوسىمشاسى ارقىلى بەرۋگە بولادى. ال بۇرىنعى كۋالىكتى اۋىستىرۋ ءراسىمى تولىعىمەن تسيفرلىق فورماتقا كوشىرىلىپ وتىر – بۇل قىزمەتتەر eGov ەلەكتروندى ۇكىمەت پورتالى مەن EgovMobile قوسىمشاسى ارقىلى قولجەتىمدى, دەپ جازادى Egemen.kz.
مينيسترلىك تاراتقان مالىمەتكە سايكەس, جوبا 2026 جىلعى 30 ماۋسىمعا دەيىن پيلوتتىق رەجيمدە جۇزەگە اسىرىلادى. وسى ۋاقىت ارالىعىندا جۇيە سىناقتان ءوتىپ, تەحنيكالىق جانە قۇقىقتىق تەتىكتەرى جەتىلدىرىلەدى.
تسيفرلىق قۇجات اينالىمىن دامىتۋ باعىتىنداعى بۇل قادام حالىقتىڭ ۋاقىتى مەن رەسۋرسىن ۇنەمدەۋگە باعىتتالعان. بۇرىن جۇرگىزۋشى كۋالىگىن الۋ ءۇشىن حالىققا قىزمەت كورسەتۋ ورتالىعىنا بارىپ, كەزەك كۇتۋ قاجەت بولسا, ەندى بار پروتسەسس بىرنەشە مينۋت ىشىندە سمارتفون ارقىلى جۇزەگە اسادى.
مەملەكەتتىك قىزمەتتەردى قولجەتىمدى ەتۋ جانە ولاردى ازاماتتارعا ىڭعايلى ەتۋ باعىتىندا مينيسترلىك بۇدان ءارى دە جاڭاشىل قادامدار جاساۋدى جوسپارلاپ وتىر. بولاشاقتا جۇرگىزۋشى كۋالىگىنە قاتىستى بۇل فۋنكتسيالاردى بانك قوسىمشالارىنا دا ەنگىزۋ كوزدەلگەن.
وسىلايشا, جۇرگىزۋشى كۋالىگىنە قاتىستى نەگىزگى قىزمەتتەر بىرتىندەپ تسيفرلىق كەڭىستىككە كوشىرىلىپ, مەملەكەتتىك قىزمەت كورسەتۋ ساپاسى جاڭا دەڭگەيگە كوتەرىلمەك.