ورتالىق كوممۋنيكاتسيالار قىزمەتىنىڭ پودكاستىندا قۇمار ويىن سالاسىن باقىلاۋعا باعىتتالعان بىرىڭعاي ەسەپكە الۋ جۇيەسىنىڭ (بەج) ەنگىزىلۋى ءسوز بولدى. قر تۋريزم جانە سپورت مينيسترلىگى ويىن بيزنەسىن جانە لوتەرەيانى رەتتەۋ كوميتەتىنىڭ توراعاسى ادىلەت تۇرعانباەۆ بۇل جۇيە تەك مەملەكەت مەنشىگىندەگى ۇيىم تاراپىنان باسقارىلادى جانە بارلىق زاڭنامالىق تالاپتارعا ساي جۇمىس ىستەيتىنىن ايتتى, دەپ حابارلايدى Egemen.kz.
سپيكەردىڭ ايتۋىنشا, بەج-ءدىڭ قاۋىپسىزدىگى ءبىرىنشى ورىندا تۇر. قازىرگى ۋاقىتتا جۇيە اقپاراتتىق قاۋىپسىزدىك تۇرعىسىنان جان-جاقتى تەكسەرىلىپ جاتىر. بۇل جۇمىس قر ۇلتتىق قاۋىپسىزدىك كوميتەتىنىڭ تەحنيكالىق قىزمەتى مەن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىمەن بىرلەسىپ جۇرگىزەدى. جۇيە پيلوتتىق رەجيمدە ىسكە قوسىلىپ, ونىڭ بارلىق تەتىكتەرى ناقتى جاعدايدا سىناقتان ءوتىپ جاتىر.
«پيلوتتىق جوبادا ءبىز ءبارىن سىناپ كورەمىز, كەمشىلىكتەردى ەسكەرەمىز. بۇل ونەركاسىپتىك پايدالانۋعا بەرگەن كەزدە جۇيە اقاۋسىز جۇمىس ىستەۋى ءۇشىن جاسالۋدا», دەدى تۇرعانباەۆ.
قازاقستان زاڭناماسىنا سايكەس, بەج سەرۆەرلەرى ەلىمىزدىڭ ىشىندە ورنالاسادى. بۇل ازاماتتاردىڭ جەكە دەرەكتەرىنىڭ سىرتقا كەتپەۋىن قامتاماسىز ەتەدى. سونىمەن قاتار, بەج تەك قاجەتتى ساتتە عانا مەملەكەتتىك دەرەكقورلارمەن بايلانىس ورناتادى. مىسالى, ەگەر پايدالانۋشىنىڭ جسن-ءى ارقىلى ونىڭ بورىشكەرلەر تىزىمىندە بار-جوعى تەكسەرىلسە, جۇيە تەك سول ناقتى جسن بويىنشا عانا سۇراۋ جىبەرەدى.
تىركەۋ كەزىندە پايدالانۋشى جسن مەن تەلەفون ءنومىرىن ەنگىزىپ, SMS-كود ارقىلى جەكە باسىن راستايدى. كەيىن ەكىنشى كەزەڭ – بيومەتريالىق سايكەستەندىرۋ جۇرگىزىلەدى. مۇنداي جۇيە بوگدە ادامنىڭ اتىنان تىركەلۋدى بولدىرمايدى جانە ەڭ الدىمەن كامەلەتكە تولماعانداردىڭ قۇمار ويىندارعا قاتىسۋىنا توسقاۋىل قويۋعا باعىتتالعان.
ادىلەت تۇرعانباەۆتىڭ ايتۋىنشا, ارنايى قۇرىلعان مەملەكەتتىك وپەراتور بەج-ءدىڭ قاۋىپسىز ءارى ءادىل جۇمىسىن قامتاماسىز ەتەدى. بۇل جۇيە ويىن بيزنەسىنە قاتىسۋشىلاردىڭ دەرەكتەرىن قورعاپ قانا قويماي, ولاردىڭ قۇقىقتارىن ساقتاۋعا دا باعىتتالعان.
«مىسالى, ءبىز ادامنىڭ بورىشكەرلەر تىزىمىندە بار-جوعىن تەكسەرگەن كەزدە, بۇكىل بازانى – ياعني 3-4 ميلليون ادام تۋرالى مالىمەتتى – جۇيەمىزگە جۇكتەمەيمىز. بۇل – مۇلدە مۇمكىن ەمەس. جۇيە ادامنىڭ جسن-ءىن ەنگىزگەندە عانا ناقتى سۇراۋ جىبەرەدى. ياعني, «بۇل ادام بازادا بار ما؟» دەگەن سۇراق جولدايمىز. ەگەر ء«يا» دەگەن جاۋاپ كەلسە – ءبىز ول ادامعا اككاۋنت اشۋعا رۇقسات بەرمەيمىز, ول ءباس تىگۋگە قۇقىلى بولمايدى», دەدى ادىلەت تۇرعانباەۆ.