تاياۋدا شاعىن قارجى ۇيىمى بولىپ سانالاتىن BNK ەكىنشى دەڭگەيلى بانككە اينالدى. وسىلايشا, ەلدە شەتەلدىك قاتىسۋى بار بانكتەردىڭ سانى توعىزعا جەتتى. وڭتۇستىككورەيالىق «BNK Financial Group Inc.» قۇرامىنا كىرەتىن «BNK Finance» ميكروقارجى ۇيىمىنىڭ بانككە اينالاتىنى تۋرالى العاش 2024 جىلدىڭ ماۋسىمىندا ايتىلدى.
سول جىلى 12 ماۋسىمدا قارجى نارىعىن رەتتەۋ جانە دامىتۋ اگەنتتىگىنەن (قنردا) ەكىنشى دەڭگەيلى بانك بولىپ قايتا قۇرىلۋعا رۇقسات الدى. اكتيۆى 129 ملرد دوللاردان اساتىن وڭتۇستىكورەيالىق ءىرى قارجى قۇرىلىمىنىڭ قۇرامىندا 2 بانك بار.
«BNK Commercial Bank» باسقارما توراعاسى كيم سونگ حەننىڭ ايتۋىنشا, ولاردىڭ ماقساتى – ۇزاقمەرزىمدى بولاشاقتاعى شاعىن جانە ورتا بيزنەسكە ارنالعان بانك قۇرۋ.
قنردا توراعاسى ءمادينا ابىلقاسىموۆانىڭ ايتۋىنشا, ىشكى نارىق بۇل جاڭالىققا ۇلكەن دايىندىقپەن كەلدى. شەتەلدىك بانكتەر ءۇشىن اكتيۆتەردىڭ ەڭ تومەنگى شەگى 20 ملرد دوللاردان 10 ملرد دوللارعا تومەندەتىلدى.
اشۋ ءۇشىن قاجەتتى قۇجاتتار سانى ايتارلىقتاي قىسقارتىلدى. «ا–» جانە ودان جوعارى حالىقارالىق رەيتينگى بار بانكتەر ءۇشىن قۇجاتتار توپتاماسى 2 ەسە, ال «ا» جانە ودان جوعارى رەيتينگى بار بانكتەر ءۇشىن 2,5 ەسەدەن استام ازايتىلدى. بۇعان قوسا, ميكروقارجى ۇيىمدارىن ايىرباستاۋ ەسەبىنەن بىرنەشە جاڭا بانك پايدا بولادى دەپ كۇتىلىپ وتىر. قازىر KMF پەن Solva-نىڭ وتىنىمدەرى تالقىلانۋ دەڭگەيىندە.
ء«بىز بانك قىزمەتتەرى نارىعىندا, كرەديتتەۋ نارىعىندا باسەكەلەستىك كوپ بولادى دەپ ەسەپتەيمىز جانە كەز كەلگەن باسەكەلەستىك, ارينە, كورسەتىلەتىن قىزمەتتەردىڭ ساپاسىن جاقسارتۋعا, تۇتىنۋشىلار ءۇشىن قارجىلىق قىزمەتتەردىڭ قولجەتىمدىلىگىن جاقسارتۋعا الىپ كەلەدى», دەيدى ابىلقاسىموۆا.
ونىڭ سوزىنە قاراساق, «ۆۆ-»-تەن «ا-»-كە دەيىنگى رەيتينگى بار شەتەلدىك بانكتەر ءۇشىن ەنشىلەس بانك اشۋ ءۇشىن قۇجاتتار سانى 24-تەن 17-گە دەيىن, فيليال اشۋ ءۇشىن 20-دان 10-عا دەيىن قىسقارادى. «ا-» جانە ودان جوعارى رەيتينگى بار بانكتەر ءۇشىن قۇجات سانى تيىسىنشە 10 جانە 8-گە دەيىن قىسقارتىلادى. ساراپشىلار سوزىنشە, نارىقتا جاڭا شەتەلدىك بانكتەردىڭ پايدا بولۋى بيزنەسكە عانا ەمەس, تۇتىنۋشىعا دا ءتيىمدى. وتاندىق بانكتەردىڭ جيىنتىق اكتيۆتەرى 2025 جىلعى 1 ماۋسىمدا 63,4 ترلن تەڭگەنى قۇرادى. بۇل كورسەتكىش قولما-قول اقشانى, نەسيە, ينۆەستيتسيا جانە باسقا دا اكتيۆتەردى قوسا العاندا ەكىنشى دەڭگەيلى بانكتەر يەلەنەتىن بارلىق اكتيۆتى قامتيدى.
بىزدەگى شەتەلدىك بانكتەردىڭ بارلىعى جەرگىلىكتى بانك ينستيتۋتتارى رەتىندە قازاقستاننىڭ دەپوزيتتەرگە مىندەتتى كەپىلدىك بەرۋ جۇيەسىنە قاتىسادى. بۇل ۇلتتىق بانككە شەتەلدىك كانالدار ارقىلى ەلگە كەلەتىن اقشا اعىنىن باقىلاۋعا مۇمكىندىك بەرگەنىمەن, قارىز اقشانىڭ قۇنىن كوتەرىپ جىبەرگەن. سەبەبى ولاردىڭ ءبارىن شەتەلدىك قارجى ۇيىمدارى قازاقستاندىق بانك دەپ تانىعاندىقتان, ول بانكتەردىڭ شەتەلدەن الاتىن قارجىسىنىڭ پايىزدىق سىياقىسى دا جوعارى. تيىسىنشە بانكتەردىڭ حالىققا بەرەتىن نەسيەسى قىمبات.
ء«دال وسى باپ ونداعان ەلدە ەنشىلەس بانكتەرىن اشىپ تاستاعان الپاۋىت بانكتەردى شوشىتىپ وتىر. ءوز-وزىنە سەنگەن بانك قارجى نارىعىندا ەركىندىكتى قالايدى. ال ەركىندىكتى قالايتىن, شەتەلدىك قارجى ينستيتۋتتارىنان ءوز بەتىنشە قارجى الىپ كەلەتىن بانكتەردىڭ اشىلۋىنا كەدەرگى كوپ. الداعى ۋاقىتتا ۇب پەن قنردا بىزگە كەلەتىن قارجى ينستيتۋتتارىنىڭ سىرت ەلدەردەگى قۇقىقتىق مارتەبەسى جايلى ويلانۋى كەرەك. سىرتقى نارىقتا شەتەلدىك بانكتەردى قازاقستاندىق بانك دەپ تانۋ قارجى نارىعىنىڭ الەمدىك ينستيتۋتتارمەن ينتەگراتسيالانۋ پروتسەسىن العا جىلجىتا المايدى», دەيدى.
ونىڭ پىكىرىنشە, بىزگە تىم قۇرىعىندا قارجى اينالىمى 7 ترلن تەڭگە بولاتىن ءىرى بانكتەر كەلسە عانا نارىقتاعى ويىن ەرەجەسى وزگەرۋى مۇمكىن.
«BNK Finance Kazakhstan»-نىڭ قارجىلىق كاپيتالى 20-25 ملرد تەڭگەدەن اسپايدى. نارىقتا بانكتەرگە قاتىستى ويىن ەرەجەسى شەتەلدىك ساراپشىلاردى شاتاستىرىپ جاتىر. وتكەن اپتادا «Forte»-ءنىڭ «Home Credit Bank»-تى ساتىپ الاتىنى بەلگىلى بولدى. «Forte Bank» 20 جىلدان بەرى جۇمىس ىستەپ كەلە جاتقان تابىستى بانك بولاتىن. بۇل بيزنەس تىلىندە كاپيتالدى شوعىرلاندىرۋ ارقىلى سىرتتان وزدەرىنەن كۇشتى ويىنشىلاردىڭ كەلۋىنە جول بەرمەۋ دەپ اتالادى. ەكونوميكاعا كەلىپ-كەتەر پايداسى جوق, ۇكىمەتتەن قول جايىپ كومەك سۇراۋمەن عانا شەكتەلىپ وتىرعان 20 بانك ەمەس, ويىن ەرەجەسىن وزگەرتۋگە كۇشى جەتەتىن 10 بانكپەن جۇمىس ىستەۋ حالىققا ءتيىمدى», دەيدى.
الماتى