قازاقستاندا جۇرگىزىلىپ جاتقان ساياسي رەفورمالار مەملەكەتتىك باسقارۋ جۇيەسىنە تىڭ سەرپىن بەرىپ وتىر. بۇل تۋرالى مەملەكەتتىك كەڭەسشى ەرلان قارين مالىمدەدى, دەپ جازادى Egemen.kz.
«بەس جىل بۇرىن ساياسي رەفورمالار اياسىندا پرەزيدەنت قاسىم-جومارت توقاەۆ اۋىل اكىمدەرىن تىكەلەي سايلاۋ مەحانيزمىن ەنگىزۋ تۋرالى باستاما كوتەرگەن بولاتىن. سونىڭ ناتيجەسىندە, كەيىنگى جىلدارى اۋىل اكىمدەرىنىڭ كورپۋسى 100 پايىز جاڭارتىلدى. بارلىق 17 وبلىستا جالپى سانى 2 969 اكىم سايلاندى. ولاردىڭ 864-ءى – ءوزىن-ءوزى ۇسىنعان ۇمىتكەرلەر, ال 283-ءى – ايەلدەر. جاڭا اكىمدەردىڭ باسىم بولىگى بۇرىن مەملەكەتتىك قىزمەتتە جۇمىس ىستەمەگەنىن ايتا كەتۋ كەرەك. حالىق سەنىمىنە يە بولعان ازاماتتاردىڭ قاتارىندا مۇعالىمدەر, دارىگەرلەر, شارۋالار, كاسىپكەرلەر, جەرگىلىكتى كاسىپورىندار مەن شارۋا قوجالىقتارىنىڭ باسشىلارى بار. بۇگىندە اۋىل اكىمدەرىنىڭ ورتاشا جاسى – 44 جاس. سايلاۋ ناتيجەسىندە اۋىل اكىمدەرىنىڭ كورپۋسى جان-جاقتى جاڭارتىلدى», دەدى ەرلان قارين.
مەملەكەتتىك كەڭەسشىنىڭ ايتۋىنشا, بۇل ەلدەگى باسقارۋ جۇيەسىن جاڭعىرتۋعا باعىتتالعان رەفورمالاردىڭ ءبىر تارماعى عانا. اۋىل اكىمدەرىن سايلاۋدان كەيىن ەندى اۋدان جانە قالا اكىمدەرىن تىكەلەي سايلاۋ كەزەڭى باستالدى.
«مەملەكەتتىك باسقارۋ جۇيەسىن جەتىلدىرۋ ۇدەرىسى جالعاسىپ جاتىر. بىلتىر بارلىق وڭىردە 45 اۋدان اكىمىن سايلاۋ پيلوتتىق رەجيمدە ءوتتى. ال بيىلدان باستاپ قازىرگى اۋدان مەن وبلىستىق ماڭىزى بار قالا اكىمدەرىنىڭ وكىلەتتىكتەرى اياقتالۋىنا قاراي سايلاۋ تىكەلەي داۋىس بەرۋ ارقىلى وتكىزىلەدى. وسىلايشا, قازاقستاندا ساياسي رەفورمالاردى جۇزەگە اسىرۋ ۇدەرىسى جالعاسىپ, مەملەكەتتىك قىزمەت سالاسىندا تۇبەگەيلى وزگەرىستەر جاسالىپ جاتىر», دەدى مەملەكەتتىك كەڭەسشى.
ەرلان قارين اتاپ وتكەندەي, بۇل رەفورمالار ازاماتتاردىڭ ەل باسقارۋعا قاتىسۋ مۇمكىندىگىن ارتتىرىپ, جەرگىلىكتى ءوزىن-ءوزى باسقارۋ ينستيتۋتتارىن نىعايتۋعا باعىتتالعان. سونىمەن قاتار, قوعام مەن بيلىك اراسىنداعى سەنىمدىلىك دەڭگەيىن جاڭا ساپاعا كوتەرىپ وتىر.