ايگىلى «قىز جىبەك» فيلمىندە تولەگەن مەن جىبەكتىڭ نەكەسى قيىلعان سوڭ ماحاببات نىشانى رەتىندە ايدىندا ءجۇزىپ جۇرگەن اققۋلاردى كورسەتەتىن ەپيزود بار. بىراق سەزىمتال تىرشىلىك يەلەرى ءبىر-بىرىنە جاقىنداماي, ەكى جاققا ءجۇزىپ, ءتۇسىرىلىم توبىن ءبىراز ابىگەرگە سالعان.
سول كەزدە رەجيسسەر سۇلتان قوجىقوۆ پەن كومپوزيتور نۇرعيسا تىلەنديەۆ اقىلداسا كەلە, الدىن الا تاسپاعا جازىلعان «اققۋ» كۇيىن قوسىپ كەپ جىبەرەدى. كۇيدىڭ اۋەنى ەستىلگەن ساتتە-اق, ەكى اققۋ ءبىر-بىرىنە باياۋ جاقىنداپ كەلىپ, باستارىن ءتۇيىستىرىپ, ىرعالا بيلەي جونەلەدى. وسىلايشا, ءتۇسىرىلىم تارتىبىنە باعىنعىسى كەلمەگەن ەركە قۇس, كۇي قۇدىرەتىنە ەلىتىپ, تاسپادا تاماشا كادر تۋدىرىپتى.