گەوگرافيا ءپانى بويىنشا ەۋروپا وليمپياداسى (EGeo) ليتۆا ەلىندە ءوتتى. اتالعان ءبىلىم بايگەسىندە قازاقستان قۇراماسى جوعارى ناتيجە كورسەتىپ, جەتى مەدال جەڭىپ الدى. تالدىقورعان قالاسىنداعى №24 مامانداندىرىلعان ليتسەيدىڭ 9-سىنىپ وقۋشىسى – دارىن بەكبول توپ جاردى. ول كىشى (جاسوسپىرىمدەر) ساناتىندا (12-15 جاس) ەڭ ۇزدىك اتانىپ, التىن مەدال يەلەندى, دەپ جازادى Egemen.kz.
وقۋ-اعارتۋ مينيسترلىگىنىڭ حابارلاۋىنشا قولا جۇلدەنى شىمكەنت قالاسىنداعى نزم-ءنىڭ 9-سىنىپ وقۋشىسى – ميكاەل پوچۋكاەۆ جەڭىپ الدى.
نەگىزگى (ۇلكەن) جاس ساناتىندا (16–19 جاس) قازاقستان قۇراماسىنىڭ قورجىنىنا مەدال سالعاندار:
– قوستاناي قالاسىنداعى نزم 10-سىنىپ وقۋشىسى اندرەي ەنباحتوۆ;
– تالدىقورعان قالاسىنداعى نزم 12-سىنىپ وقۋشىسى اقجول بولات;
– اقتوبە قالاسىنداعى نزم 12-سىنىپ وقۋشىسى اليحان كالماگامبەتوۆ;
– پاۆلودار قالاسىنداعى نزم 11-سىنىپ وقۋشىسى مانسۋر تۇرسىنعاليەۆ;
– تالدىقورعان قالاسىنداعى نزم 10-سىنىپ وقۋشىسى راميل يماشەۆ.
كوماندانىڭ جەتەكشىلەرى مەن جاتتىقتىرۋشىلارى – رەسپۋبليكالىق جانە حالىقارالىق وليمپيادالاردىڭ بىرنەشە دۇركىن جۇلدەگەرلەرى اباي دۇيسەن مەن اقبەرەن ايجارىق.
ايتا كەتەلىك, EGeo وليمپياداسى 2015 جىلدان بەرى وتكىزىلىپ كەلەدى. باستى ماقسات – گەوگرافيا جانە ەكولوگيا سالاسىنا قىزىعۋشىلىقتى ارتتىرۋ. بايقاۋ ءۇش كەزەڭنەن تۇرادى: جازباشا تەست, مۋلتيمەديالىق تاپسىرما جانە دالا تۋرى. بارلىق تاپسىرمالار اعىلشىن تىلىندە ورىندالادى. 2024 جىلى قازاقستان قۇراماسى التى مەدال ەنشىلەگەنى ءمالىم.