الماتى قالاسى بويىنشا قارجىلىق مونيتورينگ اگەنتتىگىنىڭ دەپارتامەنتى «ەڭبەك رەسۋرستارىن دامىتۋ ورتالىعى» اق مەن ء«بىرىنشى كرەديتتىك بيۋرو» جشس لاۋازىمدى تۇلعالارىنا قاتىستى اسا ءىرى مولشەردە پارا الۋ جانە بەرۋ كۇدىگى بويىنشا سوتقا دەيىنگى تەرگەپ-تەكسەرۋدى باستادى, دەپ حابارلايدى Egemen.kz.
قما حابارلاۋىنشا, ء«بىرىنشى كرەديتتىك بيۋرو» جشس باسشىلىعى جۇيەلى تۇردە قارجى ۇيىمدارىنىڭ سۇرانىستارىن وڭدەۋگە قاجەتتى اقپاراتتىق قىزمەتتەر كورسەتۋ كەزىندە مۇددەلەردى قورعاۋ ماقساتىندا «ەڭبەك رەسۋرستارىن دامىتۋ ورتالىعى» اق باسشىلىعىنا زاڭسىز سىياقىلار بەرگەنى انىقتالعان.
2025 جىلعى 28 ماۋسىمدا الماتى قالاسى بويىنشا ەكونوميكالىق تەرگەپ-تەكسەرۋ دەپارتامەنتىنىڭ قىزمەتكەرلەرى جۇرگىزگەن جەدەل-ىزدەستىرۋ شارالارى بارىسىندا كەلەسى پارا بەرىلگەن ساتتە – 75 مىڭ اقش دوللارى كولەمىندە – تومەندەگى تۇلعالار ۇستالدى:
وماروۆ ر. – ء«بىرىنشى كرەديتتىك بيۋرو» جشس باس ديرەكتورى;
سارباسوۆ ا. – «ەڭبەك رەسۋرستارىن دامىتۋ ورتالىعى» اق باسشىسى, بۇعان دەيىن قر ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى قىزمەتىن اتقارعان;
ارعاندىكوۆ د. – «ەڭبەك رەسۋرستارىن دامىتۋ ورتالىعى» اق-نىڭ بۇرىنعى باسشىسى, بۇعان دەيىن قر دەنساۋلىق ساقتاۋ جانە الەۋمەتتىك دامۋ ۆيتسە-ءمينيسترى بولعان.
ۇستالعانداردىڭ تۇرعىلىقتى مەكەنجايلارىنا جۇرگىزىلگەن ءتىنتۋ بارىسىندا 370 مىڭ اقش دوللارى جانە 4,5 ميلليون تەڭگە كولەمىندەگى قولما-قول اقشا تاركىلەندى.
2025 جىلعى 30 ماۋسىمدا سوت سانكتسياسىمەن سارباسوۆ ا., وماروۆ ر., ارعاندىكوۆ د.-عا قاتىستى ەكى اي مەرزىمگە قاماۋدا ۇستاۋ تۇرىندەگى بۇلتارتپاۋ شاراسى قولدانىلدى.
تەرگەپ-تەكسەرۋ جالعاسۋدا.
قر قىلمىستىق-پروتسەستىك كودەكسىنىڭ 201-بابىنا سايكەس, وزگە اقپارات جاريا ەتىلمەيدى.