استانادا ەلىمىزدىڭ الەۋمەتتىك-ەكونوميكالىق دامۋ ماسەلەلەرىنە ارنالعان ساراپتامالىق ماقالالار جيناعى كوپشىلىككە تانىستىرىلدى. جاڭا كىتاپتى سەنات جانىنداعى ساراپشىلار كلۋبىنىڭ مۇشەلەرى مەن «تالداۋ مەكتەبى» جوباسىنىڭ ءتورتىنشى لەگىنە قاتىسقان تۇلەكتەر بىرلەسىپ ازىرلەدى.
سەنات توراعاسى ماۋلەن اشىمباەۆ ءىس-شاراعا قاتىسۋشىلارعا ءىلتيپات ءبىلدىرىپ, پالاتا ساراپشىلار قاۋىمداستىعىمەن ىنتىماقتاسا جۇمىس ىستەپ كەلە جاتقانىن ايتتى. سونىڭ ناتيجەسىندە بەس جىل بويى وسى باعىتتا مۇددەلى تاراپتارمەن بىرلەسكەن جۇيەلى باستاما ىسكە اسىرىلىپ كەلەدى. سەنات سپيكەرى اتاپ وتكەندەي, كەزەكتى جيناقتىڭ جارىق كورۋى – «تالداۋ مەكتەبى» اياسىندا اتقارىلعان توپتىق جۇمىستىڭ جالعاسى جانە ناقتى ناتيجەسى.
«وسى جيناقتان كەيىن «تالداۋ مەكتەبىنىڭ» ءتورتىنشى لەگىنە قاتىسۋشىلار وزدەرىن تەك تۇلەكتەر رەتىندە ەمەس, سونىمەن قاتار شەشىم قابىلدايتىن ازاماتتارعا جانە ەل دامۋىنىڭ وزەكتى ماسەلەلەرىنە قىزىعۋشىلىق تانىتاتىن كەڭ اۋديتورياعا قولجەتىمدى تولىققاندى ساراپتامالىق باسىلىمنىڭ اۆتورلارى دەپ اتاي الادى. سەنات جانىنداعى ساراپشىلار كلۋبى مەن «تالداۋ مەكتەبى» – ەلىمىزدىڭ زياتكەرلىك الەۋەتىن قالىپتاستىرىپ, نىعايتۋعا قوسقان ءبىزدىڭ ۇلەسىمىز. وسىنداي باستامالار ارقىلى پرەزيدەنت قاسىم-جومارت توقاەۆ جاريالاعان «ادال ازامات» تۇجىرىمداماسىنىڭ نەگىزگى قۇندىلىقتارىن دارىپتەيمىز. ولار – ءبىلىم, ازاماتتىق ءوسۋ, پاتريوتيزم جانە قوعام مۇددەسىنە قىزمەت ەتۋگە دايىن بولۋ», دەدى م.اشىمباەۆ.
ءىس-شارا بارىسىندا سەنات جانىنداعى «تالداۋ مەكتەبى» بارشاعا قولجەتىمدى اشىق ءبىلىم پلاتفورماسى ەكەنى اتاپ ءوتىلدى. سوندىقتان كەز كەلگەن ادام جوبانىڭ YouTube ارناسىنا جاريالانعان بەينەلەر ارقىلى بارلىق كەزەڭدەگى دارىستەرمەن تانىسا الادى.
ء«بىز بۇگىنگى جانە بۇعان دەيىن جارىق كورگەن بارلىق ماتەريالدار جيناعىن پارلامەنت دەپۋتاتتارىنا, سالالىق مەملەكەتتىك ورگاندارعا, تالداۋ ورتالىقتارىنا, ۋنيۆەرسيتەتتەرگە جولدايمىز. سونداي-اق اشىق جاريالايمىز. وسى رەتتە بۇل ەڭبەك جوبا اياسىندا دايىندالعان ءۇشىنشى ۇجىمدىق ساراپتامالىق زەرتتەۋ ەكەنىن اتاپ وتكەن ءجون. وسىلايشا, مەكتەپ تىڭداۋشىلارى پراكتيكادا قولدانۋعا ارنالعان ناقتى قوعامدىق تالداۋعا قاتىستى. بۇگىن تانىستىرىلعان زەرتتەۋ مەملەكەتتىك ينستيتۋتتاردىڭ جۇمىسىنا, زاڭنامالىق قىزمەتكە جانە ساراپشىلار قوعامداستىعىنىڭ جوبالارىنا ءوز پايداسىن تيگىزەدى دەپ سەنەمىن», دەپ م.اشىمباەۆ كەزدەسۋگە قاتىسۋشىلارعا جوباعا قولداۋ بىلدىرگەندەرى ءۇشىن العىس ايتتى.
«تالداۋ مەكتەبىنىڭ» ءتورتىنشى لەگىندە 14 كوماندا جاساقتالدى. ولار ءبىلىم بەرۋ ىسىندەگى ينكليۋزيا, گەندەرلىك تەڭگەرىم, جاسىل ەنەرگەتيكانى دامىتۋ, ەڭبەك كوشى-قون ماسەلەلەرى, وڭدەۋشى ونەركاسىپتى وركەندەتۋ, زاڭ شىعارۋ قىزمەتىندە جاساندى ينتەللەكتىنى قولدانۋ جانە ورتالىق ازياداعى ورنىقتى دامۋ سياقتى نەگىزگى 7 باعىت بويىنشا جۇمىس ىستەدى.
ەلدىڭ ورنىقتى دامۋ ماسەلەلەرىن تالقىلاۋ كەزىندە ساراپشىلار ينكليۋزيۆتى ءبىلىم بەرۋ ىسىندە تسيفرلىق شەشىمدەردى جانە قازاقستاننىڭ ەكونوميكالىق ءوسۋ فاكتورى رەتىندە ايەلدەردىڭ الەۋەتىن جۇزەگە اسىرۋدىڭ ءتۇرلى جولدارى مەن فورماتتارىن ۇسىناتىن بىرلەسكەن جوبالار ازىرلەۋ جونىندە ءسوز قوزعادى. سونداي-اق ەنەرگەتيكا, وڭدەۋ ونەركاسىبى, مەديتسينا, تسيفرلاندىرۋ, كليماتتىق كۇن تارتىبىمەن بىرگە نەگىزگى سالالاردى دا دامىتۋعا قاتىستى بولجامدار ۇسىنىلدى.
جيناقتى تانىستىرۋ راسىمىندە «استانا» حالىقارالىق قارجى ورتالىعىنىڭ باسقارۋشىسى رەنات بەكتۇروۆ, پرەزيدەنت جانىنداعى قازاقستاننىڭ ستراتەگيالىق زەرتتەۋلەر ينستيتۋتىنىڭ باس عىلىمي قىزمەتكەرى سانات كوشكىمباەۆ, ەكونوميست, DESHT تالداۋ ورتالىعىنىڭ باسشىسى قۋانىش جايىقوۆ جانە تاعى باسقا ساراپشىلار ءسوز سويلەپ, ءوز ۇسىنىستارىن جەتكىزدى.