ول – جەزقازعان تاريحي-ارحەولوگيالىق مۋزەيىنىڭ, عارىشكەرلەر مۋزەيىنىڭ جانە «قازاقمىس» كورپوراتسياسى جانىنداعى ق.ساتباەۆ اتىنداعى تاريحي-وندىرىستىك مۋزەيدىڭ العاشقى ديرەكتورى. ۇزاق جىل ارحيۆتىك تاريحي قۇجاتتار مەن قۇندى قولجازبالار جيناپ, زەرتتەپ, ەل كادەسىنە جاراتتى. بۇگىنگى ۇلىتاۋ وبلىسىنىڭ تاريحي-ارحەولوگيالىق مۋزەيىنىڭ نەگىزىن قالادى. ۇلىتاۋلىقتار سۇتەمگەن بۇكىروۆ ەسىمىن سول ءۇشىن قۇرمەتتەيدى.
ولكە تاريحىن تىرنەكتەپ جيناپ, ايماقتاعى مۋزەي ءىسىنىڭ نەگىزىن قالاپ, اتى اڭىزعا اينالىپ كەتكەن ايتۋلى تۇلعانى كەيىنگى ۇرپاق دارىپتەپ كەلەدى. ۇلىتاۋ وبلىسىنىڭ تاريحي-ارحەولوگيالىق مۋزەيىندە وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن «تۋعان ولكە تاريحىنىڭ شىراقشىسى» اتتى ولكەتانۋشى سۇتەمگەن بۇكىروۆ اتىنداعى I جاس ولكەتانۋشىلار فورۋمى ءوتتى.
وبلىستىق فورۋمعا «جاس ولكەتانۋشى» اتاعىنا ۇمىتكەر 26 وقۋشىنىڭ ماقالاسى كەلىپ ءتۇستى. ىزدەنۋشىلەر ۇلىتاۋ ءوڭىرىنىڭ تاريحي ورىندارىن, جادىگەرلەرىن, وسى وڭىردە ءومىر سۇرگەن تاريحي تۇلعالاردىڭ ءومىر جولدارىن زەرتتەۋگە تىرىسقان. بايقاۋعا تەحنيكا عىلىمدارىنىڭ كانديداتى, قازاقستاننىڭ قۇرمەتتى مەتاللۋرگى تولەگەن بۇكىروۆ, م.تورەگەلدين اتىنداعى تاۋ-كەن جانە بالقىتۋ ءىسى تاريحي مۋزەيىنىڭ باسشىسى زەيپىن قازانباەۆا باستاعان ارحەولوگ, ولكەتانۋشىلار قازىلىق ەتتى. ولار جاس ولكەتانۋشىلاردىڭ تۋعان توپىراعىنىڭ تاريحىن زەرتتەۋگە دەگەن قىزىعۋشىلىعىن, تۇيگەنىن تەرەڭ جەتكىزە ءبىلۋ قابىلەتىنە, ىزدەنىمپازدىعىنا, زەرەكتىگىنە اسا ءمان بەردى. جوبا قاتىسۋشىلارىنا ەكسكۋرسيا ءبولىمىنىڭ باسشىسى ە.مۇحامەدينا مەن تاريح جانە ارحەولوگيا ءبولىمىنىڭ اعا عىلىمي قىزمەتكەرى ز.ەرزاكوۆا ەكسكۋرسيا جاساپ, مۋزەي زالدارىن ارالاتتى.
جۇلدەگەرلەر مەن قاتىسۋشىلارعا اقشالاي سىياقى تابىس ەتىلدى. سىيلىق الىپ, كەۋدەسىنە «جاس ولكەتانۋشى» بەلگىسى تاعىلعان بالعىنداردىڭ جۇزدەرى بالبۇل جاندى.
اكەسىنىڭ اتىنداعى فورۋمعا ارنايى كەلگەن گۇلناش اۋباكىر اپاي جاس ولكەتانۋشىلارعا ساتتىلىك تىلەپ, مۋزەي ۇجىمىنا «قازاقستاننىڭ التىن كىتابى» اتتى كولەمدى ەنتسيكلوپەديا سىيلادى.
ۇلىتاۋ وبلىسىنىڭ تاريحي-ارحەولوگيالىق مۋزەيى جەزقازعان, ساتباەۆ, قاراجال قالالارىنان, جاڭاارقا اۋدانى, جەزدى, جايرەم كەنتتەرىنەن, تالاپ, كەڭگىر, ەراليەۆ اۋىلدارىنان قاتىسقان تالاپكەرلەردىڭ ماقالالارىنان «تۋعان ولكە تاريحىنىڭ شىراقشىسى» اتتى جيناق قۇراستىرىپ, قاتىسۋشىلارعا سىيلادى.
جاس ولكەتانۋشىلار تۋعان جەردىڭ تاريحىمەن ەتەنە تانىسۋ ءۇشىن «تۋعان ولكەمنىڭ تۋريستىك مارشرۋتتارى» اتتى باعىتپەن تەرەكتى اۋليە مەكەنىنە ەكسكۋرسياعا شىقتى.
ۇلىتاۋ وبلىسى