قازاقستان ۇلتتىق وليمپيادالىق كوميتەتى مانەرلەپ سىرعاناۋشى ميحايل شايدوروۆقا 2026 جىلى يتاليادا وتەتىن قىسقى وليمپيادا ويىندارىنا دايىندالۋ ءۇشىن قارجىلاي قولداۋ كورسەتتى. بۇل كومەك حالىقارالىق وليمپيادالىق كوميتەتتىڭ (حوك) وليمپيادالىق ىنتىماقتاستىق باعدارلاماسى اياسىندا بەرىلەتىن قۇرلىقتىق گرانت ارقىلى جۇزەگە استى, دەپ حابارلايدى Egemen.kz.
گرانت ءبىر وليمپيادالىق ماۋسىمدى قامتيدى جانە حالىقارالىق جارىستاردا باسەكەگە قابىلەتتى سپورتشىلاردى قولداۋعا باعىتتالعان. قارجىلاندىرۋ تەك جاتتىعۋ پروتسەسى مەن جارىستارعا قاتىسۋ شىعىندارىن وتەۋگە جۇمسالادى جانە مەملەكەتتىك بيۋدجەت ەسەبىنەن وتەلمەيتىن شىعىنداردى جابۋعا ارنالعان.
ميحايل شايدوروۆپەن قاتار, قولداۋ ساداق اتۋ, بادمينتون جانە بايداركا مەن كانوەدە ەسۋ سپورت تۇرلەرىنە دە كورسەتىلگەن. بۇل سپورتشىلار 2025 جىلدان 2028 جىلعا دەيىن كەزەڭ-كەزەڭىمەن قارجىلاندىرىلىپ, ايماقتىق, قۇرلىقتىق جانە الەمدىك جارىستارعا دايىندالادى.
ايتا كەتەيىك, بۇعان دەيىن وسىنداي گرانت فريستايل-اكروباتيكا بويىنشا ۇلتتىق قۇرامانى قولداۋعا باعىتتالعان بولاتىن. ونىڭ ناتيجەسىندە قازاقستاندىق سپورتشىلار 2025 جىلعى قىسقى ازيا ويىندارىندا تاريحي التىن مەدالعا قول جەتكىزدى.