وبلىستا جىل باسىنان بەرى ۇلى جەڭىستىڭ 70 جىلدىعى اياسىندا كوپتەگەن ۇلاعاتتى شارالار ۇيىمداستىرىلدى. بۇل جولى 7 مامىر – وتان قورعاۋشى كۇنى قارساڭىندا تۇڭعىش پرەزيدەنت ن.نازارباەۆ اتىنداعى ورتالىق مادەنيەت جانە دەمالىس ساياباعىنداعى تۋتۇعىر الاڭىندا «اسكەرگە شاقىرۋشىلار كۇنى» وتكىزىلدى. شاراعا ۇوس ارداگەرلەرى, تىل ەڭبەككەرلەرى, اسكەرگە شاقىرىلۋشىلاردىڭ اتا-انالارى, اۋعان جانە لوكالدى سوعىستاردىڭ ارداگەرلەرى, اسكەري قىزمەتشىلەر, كۋرسانتتار, جوو ستۋدەنتتەرى, مەكتەپ وقۋشىلارى مەن پاتريوتتىق كلۋبتاردىڭ مۇشەلەرى قاتىستى. وسى جەردە اسكەرگە شاقىرىلعان 40 جاس ۇلى جەڭىستىڭ قۇرمەتىنە استانادا وتەتىن مەرەكەلىك اسكەري پارادقا قاتىساتىن 15 سوعىس ارداگەرىمەن كەزدەسىپ, اعا ۇرپاقتىڭ باتاسىن الدى.
وبلىس اكىمى ارحيمەد مۇحامبەتوۆ استانادا وتەتىن پارادقا قاتىساتىن سوعىس ارداگەرلەرى مەن بولاشاق وتان قورعاۋشىلار جانە ولاردىڭ اتا-انالارى الدىندا ءسوز سويلەپ, الدا كەلە جاتقان مەرەيلى مەرەكەلەرمەن قۇتتىقتادى. ەگەمەن ەلىمىزدىڭ قارۋلى كۇشتەرىنىڭ قۋاتتىلىعىنا توقتالا كەلىپ, تمد ەلدەرىنىڭ اراسىندا الدىڭعى قاتاردا ەكەنىن اتاپ ءوتتى. وعان اقتوبەلىكتەردىڭ وزىندىك ۇلەس قوسىپ كەلە جاتقانىن, تەك تاۋەلسىزدىك العاننان بەرگى ۋاقىتتا 16 مىڭنان استام اقتوبەلىك اسكەر قاتارىندا بولعانىن, ال, بيىل 2 مىڭنان استام جاستاردىڭ اسكەر قاتارىنا شاقىرىلىپ وتىرعانىن جەتكىزدى. اسكەرگە شاقىرىلعاندار مەن ۇلى وتان سوعىسى ارداگەرلەرىنىڭ كەزدەسۋىن ۇرپاقتار ساباقتاستىعىنىڭ ايقىن مىسالى رەتىندە اتاپ ءوتتى. ۇلى وتان سوعىسىنىڭ ارداگەرى اندرەي اندرەەۆ پەن وبلىستىق قورعانىس ىستەرى دەپارتامەنتىنىڭ باسشىسى, پولكوۆنيك عالىمجان ءجانتورين اسكەرگە اتتانۋشىلارعا اق جول تىلەدى. اسكەرگە شاقىرىلعاندار اتىنان ءسوز العان دانيار عالىمجانوۆ اعا ۇرپاقتىڭ ەرلىك ىستەرىنە ادال بولاتىندارىن, اسكەردە جاقسى قىزمەت ەتىپ, اقتوبەلىكتەردى ۇياتقا قالدىرمايتىندارىنا سەندىردى.
وڭىر باسشىسى ارحيمەد مۇحامبەتوۆ ۇلى وتان سوعىسى ارداگەرلەرى قازتاي تىنىشتىقوۆ پەن اندرەي اندرەەۆكە «ەرەن ەڭبەگى ءۇشىن» مەدالىن تاپسىردى.
اقتوبەلىك ساربازدار «باتىس» ايماقتىق كوماندوۆانياسىنا قاراستى №41433 اسكەري بولىمدە اسكەري مىندەتتەرىن وتەيتىن بولادى. اسكەرگە شاقىرىلعانداردى الىپ كەتۋگە كەلگەن وسى اسكەري ءبولىم كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى, كاپيتان باقىت الىمباەۆتىڭ ايتۋىنشا, اسكەرگە شاقىرىلعان جاستاردىڭ دەنساۋلىعى مىقتى, وتان الدىنداعى بورىشىن وتەۋگە ىقىلاستى. ال بولىمدە ولاردىڭ اسكەر ءىسىن مەڭگەرۋگە بارلىق جاعداي بار.
شارا اياسىندا ءۇش بۋىن وكىلدەرى – ارداگەرلەر, قازىرگى اسكەري قىزمەتشىلەر جانە بولاشاق وتان قورعاۋشىلار مەكتەپ پەن جوو ستۋدەنتتەرىمەن كەزدەستى, سونىمەن قاتار, ۇلى وتان سوعىسى ارداگەرلەرى مەن اسكەرگە اتتانۋشىلارعا ەستەلىك سىيلىقتار تابىستالدى.
اقتوبە وبلىسى.
ساتىبالدى ءساۋىرباي,«ەگەمەن قازاقستان».