استانا. 16 اقپان. ەستۋ قابىلەتى تومەن پالۋاندارىمىز بەلارۋس ەلىندە وتكەن دودادان 2 التىن, 3 كۇمىس پەن 1 قولا مەدالدى جەڭىپ الدى. بۇل تۋرالى «دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى» حابارلادى.
سۋردوليمپياداشىلار اراسىندا ەركىن كۇرەستەن وتكەن بۇل جارىس پالۋاندارىمىزدىڭ بابىندا ەكەندىگىن كورسەتتى. استانادان اتتانار الدىندا «وسى باسەكەدە التىن باستاعان بىرنەشە جۇلدەگە قول جەتكىزۋگە ءتيىسپىز» دەگەن باپكەر ەرنازار قونىسباەۆتىڭ ايتۋىنشا, ەلىمىزدەن بارعان جەتى پالۋاننىڭ التاۋى جۇلدەلى ورىندى جەڭىپ الدى.
جىل باسىنداعى العاشقى جارىستان 2 التىن, 3 كۇمىس پەن 1 قولا مەدالدى ج ۇلىپ ءتۇسۋ وڭاي ەمەس. ءبىزدىڭ جىگىتتەر ەرلەدى. نۇرسۇلتان دۇيسەنبيەۆ پەن عابيت ەسجانوۆ قارسىلاس شاق كەلتىرمەي, اقتىق سايىسقا سۇرىنبەي جەتتى. بەلارۋستىڭ بوبرۋيسك قالاسىندا ەكى مارتە قازاقتىڭ ءانۇرانى شىرقالىپ, ەكى دۇركىن كوك بايراعى اسپانداپ تۇردى.
باعدات ءسابيتوۆ, شونحۋ حايراتحان جانە راحىمبەرلى قابىلبەكوۆ فينالدا تەك كىلەم يەلەرىنەن ۇتىلىپ, كۇمىس مەدالدى كەۋدەلەرىندە جارقىراتتى. عالىمبەت مولداشەۆ بولسا قولا مەدالدى قاناعات تۇتتى.
ارمەنيادا 2014 جىلى وتكەن جاستار اراسىنداعى الەم چەمپيوناتىندا گرەك-ريم مەن ەركىن كۇرەسىنەن قاتار بەلدەسىپ, قوس كۇمىس مەدالدى يەلەنىپ قايتقان مۇحتار ەسەنعوس ۇلىنىڭ عانا بۇل جارىستا جولى بولمادى. جاس پالۋان تاجىريبەسىنىڭ ازدىعىنان العاشقى اينالىمدا-اق جارىس جولىنان شىعىپ قالدى.
عابيت ەسجانوۆ (65 كيلو) – التىن مەدال.
نۇرسۇلتان دۇيسەنبيەۆ (57 كيلو) – التىن مەدال.
باعدات ءسابيتوۆ (74 كيلو) – كۇمىس مەدال.
شونحۋ حايراتحان (125 كيلو) – كۇمىس مەدال.
راحىمبەرلى قابىلبەكوۆ (97 كيلو) كۇمىس مەدال.
عالىمبەت مولداشەۆ (65 كيلو) – قولا مەدال.
جولدىباي بازار.
دەرەك. سۋرەت: دەنە مۇمكىندىكتەرى شەكتەۋلى تۇلعالارعا ارنالعان سپورتتىق دايارلاۋ ورتالىعى.