قازاقستان پرەزيدەنتى نۇرسۇلتان نازارباەۆتىڭ اتىنا مەملەكەت, ۇكىمەت باسشىلارىنان, حالىقارالىق ۇيىمداردىڭ جەتەكشىلەرىنەن سايلاۋداعى جەڭىسىنە بايلانىستى قۇتتىقتاۋلار ءالى دە كەلىپ جاتىر
ەلباسى نۇرسۇلتان نازارباەۆتىڭ اتىنا بەلگيا كورولى فيليپپتەن قۇتتىقتاۋ جەدەلحاتى كەلدى, دەپ حابارلادى پرەزيدەنتتىڭ ءباسپاسوز قىزمەتى.
بەلگيا كورولى نۇرسۇلتان نازارباەۆتىڭ پرەزيدەنتتىك لاۋازىمداعى بيىك پارىزىن ورىنداۋىنا بايلانىستى قۇتتىقتاۋى مەن جىلى تىلەگىن جولداعان.
فيليپپ, سونداي-اق, قازاقستان حالقىنا تاتۋلىق پەن كەلىسىم, باق-بەرەكە تىلەدى.
* * *
ەلباسى نۇرسۇلتان نازارباەۆتىڭ اتىنا ەۋروپاداعى قاۋىپسىزدىك جانە ىنتىماقتاستىق ۇيىمىنىڭ باس حاتشىسى لامبەرتو زاننەردەن قۇتتىقتاۋ جەدەلحاتى كەلدى, دەپ حابارلادى پرەزيدەنتتىڭ ءباسپاسوز قىزمەتى.
ل.زاننەر قازاقستان مەن ەقىۇ اراسىنداعى ىنتىماقتاستىقتىڭ سىندارلى سيپاتىنا قاناعاتتانۋشىلىق ءبىلدىردى.
«مەن ءسىزدىڭ دەموكراتيالاندىرۋ جانە ەلدەگى ازاماتتىق قوعامدى دامىتۋ جونىندەگى رەفورمالاردى ىلگەرىلەتۋدەگى ىسىڭىزگە جاردەم ەتۋ ءۇشىن بىرلەسكەن جۇمىستى جالعاستىرۋعا دايىن ەكەنىمىزدى ايتقىم كەلەدى», – دەلىنگەن حاتتا.
ەلباسى نۇرسۇلتان نازارباەۆتىڭ اتىنا پولشا رەسپۋبليكاسىنىڭ پرەزيدەنتى برونيسلاۆ كوموروۆسكيدەن قۇتتىقتاۋ جەدەلحاتى كەلدى, دەپ حابارلادى پرەزيدەنتتىڭ ءباسپاسوز قىزمەتى.
ب.كوموروۆسكي نۇرسۇلتان نازارباەۆتى قازاقستان رەسپۋبليكاسى پرەزيدەنتى لاۋازىمىنا قايتا سايلانۋىمەن قۇتتىقتادى.
«قازاقستان پولشانىڭ ورتالىق ازياداعى نەگىزگى سەرىكتەسى بولىپ سانالادى. ءبىز ءسىزدىڭ ەلدىڭ تابىستارىنا قۋانامىز جانە مەملەكەتتەرىمىزدىڭ اراسىنداعى ەكونوميكالىق ىنتىماقتاستىقتىڭ ورىستەۋىنەن ءۇمىتتىمىز», – دەلىنگەن جەدەلحاتتا.
پولشا پرەزيدەنتى نۇرسۇلتان نازارباەۆتىڭ ەلدەگى ەڭ جوعارى لاۋازىمعا سايلانۋى ەكىجاقتى قارىم-قاتىناستاردى دوستىق, سەرىكتەستىك, ءوزارا مۇددەلەر مەن داستۇرلەردى قۇرمەتتەۋ رۋحىندا ودان ءارى نىعايتۋعا سەپتىگىن تيگىزەتىنىنە سەنىم بىلدىرگەن.
سوڭىندا ب.كوموروۆسكي قازاقستان پرەزيدەنتىنە تابىس تىلەدى.
* * *
حالىقارالىق وليمپيادالىق كوميتەتتىڭ پرەزيدەنتى توماس باحتىڭ نۇرسۇلتان نازارباەۆتى قازاقستان پرەزيدەنتى لاۋازىمىنا سايلانۋىنا بايلانىستى قۇتتىقتاۋ جەدەلحاتى كەلدى, دەپ حابارلادى پرەزيدەنتتىڭ ءباسپاسوز قىزمەتى.
ت.باح وليمپيادالىق قوزعالىستىڭ بەلدى مۇشەسى بولىپ سانالاتىن قازاقستانمەن سەرىكتەستىكتىڭ نىعايىپ كەلە جاتقانىنا سەنىمدى ەكەنىن جەتكىزگەن.
«ءسىز سپورتتىڭ جۇرتتى بىرىكتىرۋدەگى ماڭىزىن جاقسى تۇسىنەسىز. مۇنىڭ جاقسى مىسالى – الماتى قالاسىنىڭ 2020 جىلعى قىسقى وليمپيادالىق ويىنداردى وتكىزۋگە مىقتى تۇجىرىمدامالار نەگىز ەتىلگەن ءوتىنىم بەرۋى. بۇل ءوتىنىم جاقسى سپورت ينفراقۇرىلىمىنا جانە ءسىزدىڭ ەلدىڭ قىسقى سپورت تۇرلەرىنە قاتىستى تاجىريبەسىنە سۇيەنگەن», – دەلىنگەن حاتتا.
حالىقارالىق وليمپيادالىق كوميتەتتىڭ پرەزيدەنتى مەملەكەت باسشىسىنىڭ قازاقستاندى ورنىقتى دامىتۋداعى قىزمەتىنە تابىس تىلەدى.