سەنات سپيكەرى ماۋلەن اشىمباەۆتىڭ توراعالىعىمەن بيۋرو ءوتتى. وندا دەپۋتاتتار 19 ماۋسىمدا وتەتىن سەنات وتىرىسىنىڭ كۇن ءتارتىبىن بەلگىلەدى جانە وسى اپتادا بولاتىن كەزدەسۋلەر مەن كوميتەتتەردىڭ كوشپەلى وتىرىستارىندا تالقىلاناتىن ماسەلەلەردى پىسىقتادى.
بەكىتىلگەن كۇن تارتىبىنە سايكەس, سەناتورلار الداعى بەيسەنبىدە «قازاقستان رەسپۋبليكاسى كونستيتۋتسياسىنىڭ وتىز جىلدىعىنا بايلانىستى راقىمشىلىق جاساۋ تۋرالى» زاڭدى قارايدى. زاڭنىڭ باستى ماقساتى – قىلمىستىق-قۇقىقتىق سيپاتتاعى بىرجولعى ادامگەرشىلىك اكتىسىن جۇرگىزۋ. بۇل رەتتە ازاماتتار مەن مەملەكەتتىڭ قاۋىپسىزدىگىنە ەلەۋلى قاتەر توندىرمەيتىن قىلمىس جاساعانداردى عانا قىلمىستىق جاۋاپتىلىقتان نەمەسە نەگىزگى جازادان بوساتۋ تۋرالى ءسوز بولىپ وتىرعانىن اتاپ وتكەن ءجون. سونداي-اق سوتتالعاندارعا, ونىڭ ىشىندە پروباتسيالىق باقىلاۋداعىلارعا قاتىستى جازالاۋدىڭ وتەلمەگەن بولىگىن قىسقارتۋ كوزدەلگەن.
سونىمەن قاتار پالاتا وتىرىسىندا «قازاقستان رەسپۋبليكاسى كەيبىر زاڭنامالىق اكتىلەرىنە قۇقىق قورعاۋ قىزمەتىن جەتىلدىرۋ, قۇقىق قورعاۋ ورگاندارىنىڭ, ارناۋلى مەملەكەتتىك ورگانداردىڭ, ازاماتتىق قورعاۋ ورگاندارىنىڭ قىزمەتكەرلەرىن جانە اسكەري قىزمەتشىلەردى تۇرعىن ۇيمەن قامتاماسىز ەتۋ جانە الەۋمەتتىك قورعاۋ, سونداي-اق ىشكى ىستەر ورگاندارىنىڭ قىزمەتى سالاسىندا ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قارالادى. قۇجات اۋقىمدى ماسەلەلەردى قامتيدى. سول ارقىلى زاڭداردى ارتىق نورمالاردان بوساتۋ جانە زاڭعا تاۋەلدى اكتىلەر دەڭگەيىندە ەلدە تۋىندايتىن وزگەرىستەرگە ولاردىڭ نورماتيۆتىك رەتتەۋ بولىگىندە جەدەل دەن قويۋ كوزدەلىپ وتىر. اتاپ ايتقاندا, ەسىرتكى قۇرالدارىنىڭ زاڭسىز اينالىمى مەن تەرىس پايدالانىلۋىنا قارسى ءىس-قيمىل, قۇقىق قورعاۋ ورگاندارىنىڭ قىزمەتكەرلەرىن, اسكەري قىزمەتشىلەردى الەۋمەتتىك قولداۋ جونىندەگى شارالاردى كۇشەيتۋ تەتىكتەرى جانە باسقا دا جاڭا نورمالار قاراستىرىلعان.
دەپۋتاتتار باستاماشى بولعان «قازاقستان رەسپۋبليكاسى كەيبىر زاڭنامالىق اكتىلەرىنە ورمان شارۋاشىلىعى, ەرەكشە قورعالاتىن تابيعي اۋماقتار جانە جەكە كاسىپكەرلىك سۋبەكتىلەرىنىڭ مىندەتتەمەلەرىنە كەپىلدىك بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ دا سەنات وتىرىسىنىڭ كۇن تارتىبىنە شىعارىلدى. بۇل زاڭ ەرەكشە قورعالاتىن تابيعي اۋماقتار سالاسىنداعى زاڭنامانى جەتىلدىرۋگە جانە قۇقىقتىق رەتتەۋدەگى ولقىلىقتاردى جويۋعا باعىتتالعان. اتالعان قۇجات ارقىلى ورمان قورى مەن ايرىقشا قورعالاتىن تابيعي اۋماقتاردا ول جەرلەرگە ەرەكشە مارتەبە بەرىلگەنگە دەيىن دە بولعان الەۋمەتتىك جانە ستراتەگيالىق نىساندار مەن ينفراقۇرىلىمداردىڭ قىزمەتىنە قاتىستى پروبلەمالاردى شەشۋ كوزدەلگەن.
سونداي-اق دەپۋتاتتار قازاقستان رەسپۋبليكاسى ۇكىمەتىنىڭ جانە قازاقستان رەسپۋبليكاسى جوعارى اۋديتورلىق پالاتاسىنىڭ 2024 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرىن قاراپ, الداعى بىرلەسكەن جۇمىستىڭ ماڭىزدى مىندەتتەرىن ايقىندايدى.
ءىس-شارا بارىسىندا بيۋرو مۇشەلەرى پارلامەنت ماجىلىسىنەن كەلىپ تۇسكەن زاڭداردى جۇمىس ءۇشىن سەنات كوميتەتتەرىنە ءبولىپ بەردى.