پرەزيدەنت قاسىم-جومارت توقاەۆ بۇۇ باس حاتشىسىنىڭ سۋ رەسۋرستارى جونىندەگى ارناۋلى وكىلى رەتنو ءمارسۋديدى قابىلدادى, دەپ جازادى Egemen.kz.
كەزدەسۋدە سۋ رەسۋرستارىنىڭ جاھاندىق جانە وڭىرلىك كۇن تارتىبىندەگى نەگىزگى ماسەلەلەرى تالقىلاندى.
قاسىم-جومارت توقاەۆ قازاقستان ءۇشىن سۋ ورنىقتى دامۋ, ەكولوگيالىق قاۋىپسىزدىك جانە وڭىردەگى تۇراقتىلىقپەن تىكەلەي بايلانىستى ستراتەگيالىق رەسۋرس سانالاتىنىن اتاپ ءوتتى.
پرەزيدەنت سالاداعى حالىقارالىق ىنتىماقتاستىقتىڭ اناعۇرلىم ءتيىمدى ارحيتەكتۋراسىن قالىپتاستىرۋدىڭ ماڭىزى ەرەكشە ەكەنىنە نازار اۋداردى.
وسى ورايدا مەملەكەت باسشىسى بۇۇ اياسىندا حالىقارالىق سۋ ۇيىمىن قۇرۋ جونىندە كوتەرگەن باستاماسىنا ارنايى توقتالدى. قاسىم-جومارت توقاەۆتىڭ ايتۋىنشا, بۇل قادام سۋ رەسۋرستارىن ۇتىمدى پايدالانۋ, سۋ پروبلەماتيكاسىنا قاتىستى سىن-قاتەرلەر بويىنشا حالىقارالىق ۇيلەستىرۋ تەتىگىن كەڭەيتۋ جانە ورنىقتى شەشىمدەردى ىلگەرىلەتۋ جونىندەگى جاھاندىق كۇش-جىگەرگە تىڭ سەرپىن بەرەدى.
الداعى كۇندەرى استانادا وتەتىن وڭىرلىك ەكولوگيالىق سامميتتە اتالعان قۇرىلىمدى قالىپتاستىرۋ پارامەترلەرى مەن پەرسپەكتيۆاسىن ەگجەي-تەگجەيلى تالقىلاۋعا باعىتتالعان حالىقارالىق كونسۋلتاتسيالاردىڭ العاشقى كەزەڭىن باستاۋ جوسپارلانىپ وتىر.
سونىمەن قاتار بيىل جەلتوقسان ايىندا ابۋ-دابيدە وتەتىن سۋ رەسۋرستارى جونىندەگى بۇۇ كونفەرەنتسياسى سالاداعى تۇيتكىلدەردى شەشۋدىڭ ءوزارا كەلىسىلگەن تاسىلدەرىن ازىرلەيتىن الاڭ ءرولىن اتقاراتىنى ايتىلدى.
مەملەكەت باسشىسى تۇركيانىڭ ۆيتسە-پرەزيدەنتى دجەۆدەت يىلمازبەن كەزدەستى
قاسىم-جومارت توقاەۆ پەن رەتنو مارسۋدي ورتالىق ازيا وڭىرىندە سۋ رەسۋرستارىن ءتيىمدى پايدالانۋ ماسەلەسى جونىندە پىكىر الماستى.