قاراعاندى وبلىسىندا دارىگەرگە جاسالعان كەزەكتى قاتىگەزدىك ەلدى ەلەڭ ەتكىزدى. 12 ماۋسىم كۇنى وبلىستىق بالالار اۋرۋحاناسىندا 38 جاستاعى ەر ادامنىڭ ەكى دارىگەرگە كۇش قولدانعانى تۋرالى اقپارات رەسمي راستالدى. قازىر كۇدىكتى سوتتىڭ سانكتسياسىمەن ەكى ايعا قاماۋعا الىنعان. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى حابارلادى, دەپ جازادى Egemen.kz.
تەرگەۋ دەرەكتەرىنە قاراعاندا, ەر ادام بالاسىن دارىگەرگە قاراتۋعا الىپ كەلىپ, قابىلداۋ كەزىندە مەديتسينا قىزمەتكەرلەرىنە قول كوتەرگەن. پوليتسيانى وقيعا ورنىنا دارىگەرلەردىڭ ارىپتەستەرى شاقىرعان. اتالعان فاكتى بويىنشا قىلمىستىق كودەكستىڭ 107-بابى («دەنساۋلىققا قاساقانا ورتاشا اۋىرلىقتاعى زيان كەلتىرۋ») جانە 380-بابى («بيلىك وكىلىنە نەمەسە ونىڭ وكىلى رەتىندە ارەكەت ەتەتىن تۇلعاعا كۇش قولدانۋ») بويىنشا ءىس قوزعالدى.
قازىرگى تاڭدا زارداپ شەككەن ەكى دارىگەر وبلىستىق اۋرۋحانانىڭ شۇعىل نەيروحيرۋرگيا بولىمىندە ەم قابىلداپ جاتىر. ولاردىڭ جاعدايى – ورتاشا اۋىر. دياگنوزى: ميدىڭ شايقالۋى, مۇرىننىڭ سىنۋى, دەنەنىڭ ءتۇرلى جەرلەرىندەگى كوگەرۋلەر مەن جۇمساق تىندەردىڭ گەماتوماسى.
دەنساۋلىق ساقتاۋ ءمينيسترى اقمارال ءالنازاروۆا ارنايى بارىپ, جاراقات العان مەديتسينا ماماندارىنىڭ جاعدايىمەن تانىستى. مينيستر دارىگەرلەردىڭ دەنساۋلىعى مەن قاۋىپسىزدىگى – مەملەكەت نازارىنداعى ماڭىزدى ماسەلە ەكەنىن ايتىپ, بۇل وقيعانىڭ ءادىل تەرگەلۋىن تالاپ ەتتى.