تاعى دا جەڭىلدىك...

تارتىسقا تولى ويىننىڭ 33-مينۋتىندا الەك­ساندر ترايكوۆسكي سوق­قان گول قوناقتاردىڭ ەنشىسىنە 3 ۇپاي جازدى. ءالي اليەۆ باپتايتىن ءبىزدىڭ جىگىتتەر بارىن سالىپ وينادى. ەكى تايمدا دا باسىمدىق تانىتىپ, قىسىم جاساپ, دۇركىن-دۇركىن شابۋىل ءبىر تولاس­تا­مادى. ماكسيم سامورودوۆ پەن داستان ساتباەۆتىڭ سوققىلارى ماكەدونيالىقتار قاقپاسىنىڭ بىردە باعانىنان, ەندى بىردە ماڭدايشاسىنان كەرى قايتتى.

ماتچتان كەيىن پىكىر بىلدىرگەن ۇلتتىق قۇرامانىڭ باس باپ­كەرى ءالي اليەۆ ستاديونعا كەلگەن جانكۇيەرلەردىڭ العاۋسىز قولداۋىنا زور العىسىن جەت­كىزدى.

– فۋتبولشىلارىمىزدى جىگەرلەندىرىپ, ەرەكشە اتموسفەرا ورناتقان جانكۇيەرلەرگە العىسىمىز شەكسىز. جىگىتتەر بارىن سالدى, دايىندىقتى دا تىڭعىلىقتى وتكىزدىك. ستا­ديوندا كوگىلدىر ەكراننان تا­ماشالاعان قالىڭ كورەرمەن تارتىسقا تولى ويىن كوردى. ءبىز سوڭىنا دەيىن كۇرەسەمىز دەپ سەرتتەسكەن ەدىك, ۋادەمىزدى جۇت­پادىق. گول سوعاتىن مۇم­كىن­دىگىمىز كوپ بولدى. ماتچ الدىندا قارسىلاس قۇرامانىڭ ويىن ورنەگىن كورىپ, سارالادىق. ەۋ­روپانىڭ بەدەلدى چەمپيوناتتارىندا وينايتىن ويىنشىلار شاربولاتتاي شىڭدالعان. ولار ۋەلس پەن بەلگيا ۇلتتىق قۇرا­مالارىنا قارسى دا قايسار مىنەز كورسەتتى. سونىڭ بارلىعىنا ءبىزدىڭ جىگىتتەر پسيحولوگيالىق تۇرعىدا دايىن بولدى, – دەدى باس باپكەر.

بۇل ويىنعا بىرقاتار فۋتبولشى قاتىسپادى. قۇرامانىڭ باس باپكەرى الاڭعا شىقپاعان ويىن­شىلاردىڭ وزىندىك سەبە­بىن دە ءتۇسىندىردى. ونىڭ ايتۋىن­شا, مەديتسينالىق شتاب تۇر­كيا­نىڭ «بەشيكتاش» كلۋبىندا وينايتىن باقتيار ءزاينۋتدينوۆتى جاراقاتىنا بايلانىستى ماتچقا قاتىس­تىرماۋ جونىندە رەسمي ءوتىنىش جولداپتى. بىراق باق­­تيار ويىنعا قاتىسپاسا دا جىگىت­تەر­دى قولداۋعا ارنايى كەلدى. مەدي­تسي­نالىق تەك­­سەرىستەن وتكەننەن كەيىن گەور­گي جۋكوۆتىڭ دا جارا­قا­تىنان قۇلان تازا ايىق­پا­­عانى انىقتالعان. رامازان ورازوۆ دانيا­نىڭ «سيلكەبورگ» كلۋ­بىن­دا ءجيى الاڭعا شىقپاۋى سەبەپ­تى, ويىن تاجىريبەسى از­دىق ەتكەن­دىكتەن دە قاتارعا قوسىلماعان.

ءبىزدىڭ جىگىتتەر سولتۇستىك ماكەدونيا ۇلتتىق قۇراماسىنا قار­­سى ويىن الدىندا سىرت الاڭ­دا بەلارۋس قۇراماسىمەن جول­داستىق كەزدەسۋ وتكىزىپ, 4:1 ەسەبىمەن جەڭىلدى.

اسحات تاعىبەرگەن ۇلتتىق قۇراما ساپىنداعى سوڭعى ويىنىن وتكىزىپ, جانكۇيەرلەرمەن قوشتاستى. الاڭعا جىگىتتەردى باس­تاپ شىققان ساڭلاق وكشەلەپ كەلە جاتقان كەيىنگى تولقىنعا تىزگىندى بەرەتىنىن مالىمدەدى.

– سولتۇستىك ماكەدونيا ۇلتتىق قۇراماسىنا قارسى ماتچ – ۇلتتىق قۇراما جەيدەسىندەگى سوڭعى ويىنىم. بۇل شەشىمگە وتباسىممەن اقىلداسىپ كەل­دىم. جاستارعا كەزەك بەرەتىن كەز جەتتى. فۋتبول – باسەكەمەن شىڭدايتىن سپورت. فۋتبول الەمىندەگى مانسابىمدى كلۋب ساپىندا جالعايمىن. وسى «استانا ارەنا» ستاديونىن­دا 30 مىڭ كورەرمەننىڭ كوز الدىندا ازۋلى دانيا قۇرا­ما­سىن جەڭگەنىمىز, سول تارتىس­تا سوققان گولىم جۇرەگىمنىڭ تۇك­پى­رىندە ماڭگى ساقتالىپ, ەش­قا­شان ۇمىتىلمايدى. ۇلتتىق قۇرامانىڭ مۇشەسى اتانعانىما, كاپي­تاندىق مىندەتتى ارقالا­عا­نىما قۋانىشتىمىن», دەدى تالانتتى فۋتبولشى. ول 2014 جىلى 23 جاسىندا ۇلتتىق قۇ­راما قاتارىنا قوسىلىپ, العاش­قى ماتچىن ماجارستان قۇرا­ماسىنا قارسى وتكىزدى. 11 جىل ىشىندە باس كوماندانىڭ نامىسى ءۇشىن 64 ماتچقا قاتىسىپ, 3 گول سوقتى, ناتيجەلى 7 پاس بەردى.

ۇلتتىق قۇراما كەلەسى ماتچتى دا ءوز الاڭىندا وت­كىزەدى, 4 قىر­­كۇيەكتە ۋەلس فۋتبولشىلا­رىنا قارسى وينايدى. الەم چەمپيوناتىنىڭ فينالىنا ىرىكتەۋ سىنىن J توبىندا وتكىزەتىن ەلىمىز قۇ­راماسىنىڭ ەنشىسىندە ازىرگە 3 ۇپاي عانا. كوش باسىندا 8 ۇپاي جيناعان سولتۇستىك ماكەدونيا تۇر. 4 ويىن وتكىزىپ, ­7 ۇپاي ەنشىلەگەن ۋەلس قۇ­راماسى 2-ساتىدا. بەلگيا فۋتبولشىلارى 2 ماتچتا 4 ۇپاي جينادى. كوش سوڭىندا ۇپايى جوق ليحتەنشتەين قۇراماسى كەلەدى.

كەلەسى جىلى ءۇش مەملەكەت: اقش, كانادا ءھام مەكسيكا ەلى تىزە قوسىپ وتكىزەتىن الەم چەم­پيوناتىنا وزبەكستان ۇلت­تىق قۇراماسى دا قاتىسادى. ورتالىق ازياداعى بەس تۋىس­قان ەلدىڭ ىشىنەن العاش بولىپ وزبەك فۋتبولشىلارى جاھاندىق مۋنديالدىڭ دو­داسىنا تۇسەدى. ازيا فۋتبول قاۋىمداستىعىنا مۇشە وز­بەكستان ۇلتتىق قۇراماسى جول­داما ءۇشىن يران, ءباا, قاتار, قىرعىزستان, سولتۇستىك كورەيا قۇ­رامالارىمەن تارتىسقا ءتۇستى. التى كوماندا اراسىنان ۇزدىك شىققان يران مەن وزبەكستان فۋتبولشىلارى الەم كۋبوگىنە قاتىسۋ مۇمكىندىگىن ەنشىلەدى. وزبەك فۋتبولشىلارىن تاريحي جەتىستىككە جەتكىزگەن جەر­گىلىكتى مامان – تيمۋر كاپادزە. سپورتقا ۇلتتىق مۇددە تۇرعىسىنان قاراۋدىڭ ۇلگىسى وسىنداي بولسا كەرەك.