استانا. 6 مامىر. بىرىككەن اراب امىرلىكتەرىندە ەلەكتر ەنەرگياسىن 100 پايىز كۇن باتارەيالارى ارقىلى الاتىن قوناق ءۇي اشىلادى. اتالعان كەشەندى 2017 جىلدىڭ ءبىرىنشى جارتىسىندا اشۋ جوسپارلانعان. بۇل تۋرالى Inter Continental Hotels Group (IHG) كومپانياسىنىڭ رەسمي سايتىنا سىلتەمە جاساپ, 24today.net حابارلادى.
Indigo دەپ اتالاتىن قوناق ءۇي 170 بولمەدەن تۇرادى. سونداي-اق, جاڭا كەشەن IHG كومپانياسى توبىنىڭ مۇشەسى. اتالعان نىساننىڭ تاعى ءبىر ەرەكشەلىگى, بارلىق اعىن جانە قالدىق سۋلار تولىعىمەن قايتا وندەلەدى.
قوناق ءۇي ەلدىڭ ءىرى قالاسى – دۋبايدىڭ تىنىش اۋداندارىنىڭ بىرىندە سالىنباق. جوبانى جۇزەگە اسىرۋشىلاردىڭ نەگىزگى ماقساتى – ماكسيمالدى ەكولوگيالىق تازا قىزمەت كورسەتۋ.
قۇرىلىس جۇمىستارىمەن اينالىسۋشى كومپانيانىڭ اتقارۋشى ديرەكتورى فاريس سايد قوناق ءۇيدىڭ قالالىق ەلەكتر جەلىسىنە قوسىلاتىنىن ايتتى. «بۇل كۇن باتارەيالارى ارقىلى الىنعان قۋات كوزى ارتىلعان جاعدايدا, سول جەلى ارقىلى وزگە نىساندارعا ساتۋ ءۇشىن كەرەك. مۇنداي تاجىريبە ەلەكتر ەنەرگياسىنىڭ باعاسىن شامامەن 25-30 پايىزعا ارزانداتادى», – دەيدى فاريس سايد.
بۇگىندە IHG توبىنا ءباا-دەگى 18 قوناق ءۇي مۇشە. الداعى 5 جىلدىڭ ىشىندە كومپانيا تاعى وسىنداي 10 قوناق ءۇي اشۋدى جوسپارلاپ وتىر. جالپى, Inter Continental Hotels Group ءفرانشيزى بويىنشا الەمدە 4 800 قوناق ءۇي بار ەكەنىن ايتا كەتەيىك.
ەلامان قوڭىر.
دەرەك: 24today.net.
سۋرەت: pozitiv-news.ru.