2025 جىلعى 13 ماۋسىمنان باستاپ قازاقستاندا پوشتا جونەلتىلىمدەرىن بەرۋ ءتارتىبى وزگەرەدى. ەندى سالەمدەمە نەمەسە حاتتى تەك الۋشى عانا ەمەس, ونىڭ ورنىنا باسقا ادام دا الا الادى — بۇل ءۇشىن ارنايى QR-كود نەمەسە PIN-كود جەتكىلىكتى. جاڭا ەرەجە قر تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ 28 مامىردا قابىلدانعان №265/نق بۇيرىعىندا كورسەتىلگەن, دەپ حابارلايدى Egemen.kz.
بۇل جاڭاشىلدىق راسىمدەلگەن پوشتا جونەلتىلىمدەرىنە — ياعني, جاي, تاپسىرىس حاتتار مەن باعالانعان سالەمدەمەلەرگە قاتىستى. الايدا اقشا اۋدارىمدارى مەن تولەممەن جىبەرىلەتىن سالەمدەمەلەر بۇل تىزىمگە كىرمەيدى.
جاڭا جۇيە بويىنشا, پوشتا جونەلتىلىمى دايىن بولعاندا الۋشىنىڭ بايلانىس نومىرىنە ارنايى كود جىبەرىلەدى.
الۋشى بۇل كودتى ءۇشىنشى تۇلعاعا بەرە الادى — مىسالى, تۋىسقانىنا نەمەسە ارىپتەسىنە. ولار پوشتا بولىمشەسىنە بارىپ, QR-كودتى سكانەرلەۋ نەمەسە PIN-كودتى وپەراتورعا ايتۋ ارقىلى جونەلتىلىمدى ەش قيىندىقسىز الا الادى. قوسىمشا قۇجات نەمەسە سەنىمحات قاجەت ەتىلمەيدى.
-جونەلتىلىمدەردى ءۇشىنشى تۇلعاعا بەرۋ — PIN-كود نەمەسە شتريح-كود (QR) ارقىلى راستاۋ نەگىزىندە جۇزەگە اسىرىلادى,- دەلىنگەن مينيسترلىك بۇيرىعىندا.
الايدا ماماندار قاۋىپسىزدىككە ەرەكشە ءمان بەرۋگە شاقىرادى. QR نەمەسە PIN-كود ارقىلى الۋ قۇقىعى زاڭدى تۇردە الۋشىنىڭ جاۋاپكەرشىلىگىندە قالادى. ياعني, كودتى بوگدە ادامعا بەرۋ — تەك الۋشىنىڭ ەركىمەن جانە سەنىمىمەن جۇزەگە اسىرىلادى.
13 ماۋسىمنان باستاپ قازاقستاندا پوشتا الۋ ءتارتىبى تسيفرلى فورماتتا جاڭا دەڭگەيگە وتەدى. ەندى سالەمدەمەنى مىندەتتى تۇردە ءوزىڭىز بارىپ الۋدىڭ قاجەتى جوق — بۇل ۋاقىت ۇنەمدەۋگە, لوگيستيكا مەن قىزمەت ساپاسىن ارتتىرۋعا باعىتتالعان جاڭاشىلدىق.
مينيسترلىك ازاماتتاردى جاڭا ەرەجەمەن الدىن الا تانىسىپ, كودتى قاۋىپسىز ساقتاۋ قاجەتتىگىن ەسكەرتەدى.
ارايلىم مىرزاحان, ەۇۋ 2 كۋرس ستۋدەنتى