قوستاناي. 6 مامىر. قوستانايدا ءى.وماروۆ اتىنداعى وبلىستىق دراما تەاترىندا جەڭىستىڭ 70 جىلدىعىنا ارناپ جىل بويى جۇرگەن «ەسكە الۋ ەستافەتاسى» جوباسى قورىتىندىلاۋعا بايلانىستى پاتريوتتىق كەش ءوتتى. وندا «جاۋىنگەرلىك داڭق كىتابى» سالتاناتتى تۇردە وبلىستىق تاريحي-ولكەتانۋ مۋزەيىنە تابىس ەتىلدى. بۇل تۋرالى egemen.kz ءتىلشىسى حابارلادى.
وتكەن جىلدىڭ كۇزىندە وبلىستىق ىشكى ساياسات باسقارماسى, وبلىستىق ارحيۆ جانە قۇجاتتاما باسقارماسى جانە وبلىستىق ارداگەرلەر كەڭەسىنىڭ بىرىككەن جوباسى «جاۋىنگەرلىك داڭق كىتابى» ۇيىمداستىرىلىپ, ول اۋدانداردى, قالالاردى ارالاعان بولاتىن. ول ءار اۋداندا, قالادا سوعىس جايلى ەستەلىڭكتەرمەن, تىڭ دەرەكتەرمەن, ياوتوسۋرەتتەرمەن تولتىرىلدى. وعان وبلىستاعى سوعىس جانە تىل ارداگەرلەرى, جاستار, مەكتەپ وقۋشىلارى بەلسەنە قاتىستى. جەڭىس كۇنى قارساڭىندا وسى جوبانى قورىتىندىلاۋ سالتاناتى ءوتتى. تەاتر فويەسىندە كەلۋشىلەر وبلىستىق ارحيۆ جانە قۇجاتتاما باسقارماسى ۇيىمداستىرعان قۇجاتتار مەن فوتوسۋرەتتەر كورمەسىن تاماشالادى.
يۋليا گوۆوروۆا: «بۇگىنگى كورمەگە 145 جادىگەر قۇجات قويىلدى. ولاردىڭ بارلىعى دا اۋداندار مەن قالالارداعى تۇرعىنداردان جينالدى. بۇرىن كوبىنە ارحيۆتە ۇلى وتان سوعىسى باتىرلارىنا, بەلگىلى تۇلعالارعا قاتىستى ماتەريالدارعا كوڭىل بولىنەتىن. بيىل ءبىز تۇرعىندار قولىنداعى سوعىسقا قاتىستى بارلىق ماتەريالداردى جينادىق. كوپتەگەن ادامدار سوعىستا قايتقان تۋىستارىنىڭ, اتالارىنىڭ, اجەلەرىنىڭ سۋرەتتەرىن, حاتتارىن وزدەرى اكەلىپ تاپسىردى, سونىمەن قاتار تىلداعى ەڭبەككەرلەر, سوعىس كەزىندەگى بالالار تۋرالى ماعلۇمات كوپ», دەدى.
«ەسكە الۋ ەستافەتاسىنىڭ» سوڭعى شاراسىندا وبلىس اكىمىنىڭ ورىنباسارى مۇرات دارىباەۆ ۇلى جەڭىستىڭ 70 جىلدىعىن اتاپ وتۋدە قازاقستاندا بالاماسى بولماعان بۇل شارانىڭ ماڭىزىدىلىعىنا توقتالدى. مۇرات دارىباەۆ: «ەسكە الۋ ەستافەتاسى» وبلىستا ۇلكەن پاتريوتتىق قوزعالىس تۋعىزدى. كىتاپتىڭ اۆتورى بۇكىل قوستانايلىقتار بولدى دەسەك ارتىق ەمەس. وعان سوعىس, تىل ارداگەرلەرى, پەداگوگيكالىق ۇجىمدار, جاستار, بارلىعى دا بەلسەنە قاتىستى. سوعىس جانە تىل ومىرىنەن تىڭ دەرەكتەر تابىلىپ, ول مالىمەتتەر جۇرتشىلىققا جاريالاندى. مۇنىڭ بارلىعى پاتريوتتىق تاربيە وزەگىنە اينالارى ءسوزسىز», دەدى.
مەرەكەلىك شاراداعى شىرقالعان پاتريوتتىق اندەر, درامالىق شىعارمالاردان ۇزىندىلەر, وقىلعان ولەڭدەر الىستا قالعان قاھارلى كۇندەردىڭ ساناداعى جاڭعىرىعىنداي جۇرەكتى تەبىرەنتتى. اسىرەسە, مەڭدىعارا اۋدانىنداعى ع.جۇماباەۆ اتىنداعى ورتا مەكتەپتىڭ 7 سىنىپ وقۋشىسى مايا ورىنالى جازۋشى ك.سەگىزباەۆتىڭ «جىلدىڭ ەڭ قىسقا كۇندەرى» كىتابىنان وقىعان ءۇزىندىسىن زالداعىلاردىڭ بارلىعى جىلاپ وتىرىپ تىڭدادى. تالانتتى وقۋشى سوعىستا اكەسىنەن ايىرىلعان بالانىڭ مونولوگىن جەرىنە جەتكىزە ورىندادى.
جەڭىستىڭ 70 جىلدىعىنا ارنالعان «ەسكە الۋ ەستافەتاسى» قورىتىندىلانعانىمەن, «جاۋىنگەرلىك داڭق» كىتابى برويىنشا جۇمىستار جالعاسىن تاباتىن بولادى. كىتاپ كوبەيتىلىپ, ول وبلىستاعى مەكتەپتەر مەن وقۋ ورىندارىنىڭ كىتاپحانالارىنا تاراتىلىپ بەرىلەتىن بولادى.
ءنازيرا جارىمبەتوۆا.
دەرەك, سۋرەت: egemen.kz