ورال. 6 مامىر. باتىس قازاقستان وبلىسىنىڭ ورتالىعى - ورال قالاسىنداعى «زەنيت» زاۋىتى ءوزىنىڭ كەزەكتى سۋ جاڭا كەمەسىنىڭ تۇساۋىن كەستى. كەمەنى سۋعا ءتۇسىرۋ شاراسىنا ەلىمىزدىڭ اسكەري تەڭىز كۇشتەرى سالاسىنىڭ قىزمەتكەرلەرى مەن زاۋىت جۇمىسشىلارى جانە قالا تۇرعىندارى جينالدى. بۇل تۋرالى egemen.kz حابارلادى.
تاۋەلسىزدىككە قول جەتكىزگەن جىلداردان باستاپ «زەنيت» زاۋىتى ەلىمىزدەگى كەمە ءوندىرىسى سالاسىنىڭ كوشباسشىسى اتاندى. بۇل – كاسپي تەڭىزىندەگى شەكارا تىنىشتىعىن كۇزەتۋگە اتتاناتىن زەنيتتىكتەر شىعارعان 23-ءشى كەمە. باستى ەرەكشەلىگى – سۋ بەتىندە ۇزدىكسىز 3-5 تاۋلىككە دەيىن ساعاتىنا 100 شاقىرىم جىلدامدىقپەن جۇزە الادى. سونىمەن قاتار, الەمدىك كەمە جاساۋداعى بارلىق تەحنولوگيالار ەسكەرىلگەن. زەنيت ءونىمى قارۋلى دا قۋاتتى. سالا ماماندارى تەز قوزعالىپ, كۇرت بۇرىلا الاتىن «FC-19» كەمەسىنىڭ كۇشىمەن تەڭىز شەكاراسىن بۇزۋشىلار مەن زاڭسىز بالىق اۋلاۋشىلاردى وڭاي قولعا تۇسىرەتىندەرىن ايتادى.
«تەڭىز تىنىشتىعى, ونداعى ءتارتىپتى قاداعالاۋ قازاقستان قارۋلى كۇشتەرى ءۇشىن ۇلكەن سىن. بۇگىن مەملەكەتىمىزدىڭ ايبىنى مەن قۋاتىن ودان ءارى ارتتىرا الاتىن تاريحي وقيعاعا كۋا بولىپ وتىرمىز. تاۋەلسىز ەلىمىزدىڭ تىنىشتىعىن كۇزەتۋگە زور ۇلەس قوسىپ جۇرگەن «زەنيت» زاۋىتى ۇجىمىنىڭ ەڭبەگى ەرەڭ. بۇگىنگى سۋعا تۇسىرىلگەن كەمەمەن جۇرەتىن ەلىمىزدىڭ شەكارا قىزمەتى ساقشىلارىنا اق جول تىلەيمىز», – دەدى سالتاناتتى راسىمدە باتىس قازاقستان وبلىسى اكىمىنىڭ ءبىرىنشى ورىنباسارى ارمان وتەعۇلوۆ.
تەمىر قۇسايىن.
دەرەك: egemen.kz.
سۋرەت: «موي گورود».