ماگنيتۋداسى 5,8 بالل بولعان جەراستى ءدۇمپۋى مۇعلا پروۆينتسياسىندا, اسىرەسە مارماريس قالاسىنا جاقىن اۋماقتا قاتتى سەزىلگەن, دەپ حابارلايدى Egemen.kz TRT Haber باسىلىمىنا سىلتەمە جاساپ.
AFAD تاراتقان مالىمەتكە سايكەس, جەر سىلكىنىسىنىڭ ەپيتسەنترى جەرورتا تەڭىزىندە ورنالاسقان. ءدۇمپۋدىڭ تەرەڭدىگى 67,91 شاقىرىمدى قۇراسا, جەرگە ەڭ جاقىن نۇكتە — مارماريسكە قاراستى مۇعلا ايماعى, ول ەپيتسەنتردەن نەبارى 10,43 شاقىرىم قاشىقتىقتا جاتىر.
اپات سالدارىنان 1 ادام كوز جۇمىپ, 69 ادام ءارتۇرلى دەڭگەيدە جاراقات العانى حابارلاندى. قاۋىپسىزدىك ماقساتىندا جەرگىلىكتى تۇرعىندار ساياباقتار مەن اشىق الاڭدارعا شىققان.
مۇعلا پروۆينتسياسىنىڭ گۋبەرناتورى يدريس اكبيىك ءزىلزالا قالا تىرشىلىگىنە ايتارلىقتاي اسەر ەتپەگەنىن ايتتى. ەلەكتر ەنەرگياسى, تابيعي گاز, اۋىز سۋ جانە كارىز جۇيەلەرى قالىپتى رەجيمدە جۇمىس ىستەپ تۇر. سونداي-اق تۇرعىن ۇيلەردە قۇرىلىمدىق زاقىمدانۋلار انىقتالماعان.
قازىرگى تاڭدا قۇتقارۋ جانە تەكسەرۋ جۇمىستارى جالعاسىپ جاتىر. ارنايى ماماندار تۇرعىن ۇيلەر مەن ينفراقۇرىلىم نىساندارىن ەگجەي-تەگجەيلى باقىلاپ, جاعدايدى باعالاۋدا.