1 ماۋسىم – حالىقارالىق بالالاردى قورعاۋ كۇنىنە وراي ۇلتتىق ۇلاننىڭ اۆياتسيالىق بازاسىندا «بالا — ەلىمىزدىڭ بولاشاعى» اتتى مەرەكەلىك ءىس-شارا ۇيىمداستىرىلدى, دەپ حابارلايدى Egemen.kz اقپارات اگەنتتىگى.
شاراعا قاتىسقان بۇلدىرشىندەر ءۇشىن مازمۇندى ءارى قىزىقتى باعدارلاما ۇسىنىلدى. اتاپ ايتقاندا, جەدەل ماقساتتاعى بريگادانىڭ كينولوگتارى جاتتىقتىرعان «سامۋراي» اتتى قىزمەتتىك ءيتتىڭ ارنايى قويىلىمى كورەرمەندەر كوڭىلىنەن شىقتى.
ءىس-شارا بارىسىندا بۇلدىرشىندەر تاس جولعا سۋرەت سالىپ, ءان مەن بي سايىستارىندا ونەر كورسەتتى. بالالار ان-74, ان-26, Y8 ۇشاقتارىن, سونداي-اق مي-8 جانە مي-171 تىكۇشاقتارىن ءوز كوزدەرىمەن كورىپ قانا قويماي, ولاردىڭ كابينالارىنا كىرىپ, وتىرىپ كوردى. سونىمەن قاتار اسكەري بروندى جانە پاترۋل ماشينالارىنىڭ ىشىنە دە ەنىپ, وزدەرىن ناعىز ساربازدارداي سەزىندى. بۇل تەحنيكا تۇرلەرىنىڭ اراسىندا تەك اسكەري ماقساتتا عانا ەمەس, سونىمەن قاتار ارنايى وپەراتسيالار بارىسىندا قولدانىلاتىن تەحنيكالار دا بولدى.
سونىمەن قاتار ۇلتتىق ۇلاننىڭ ءان-بي ءانسامبلى ەرتەگى كەيىپكەرلەرىنىڭ قاتىسۋىمەن ساحنالىق كورىنىستەر ۇسىنىپ, بالالارعا ەرەكشە اسەر سىيلادى. انيماتورلار دايىنداعان قويىلىمدار مەن بي فلەشموبى دا بالالاردىڭ بەلسەندى قاتىسۋىمەن ءوتتى.
— ۇلتتىق ۇلان قولباسشىلىعى اسكەري قىزمەتشىلەردىڭ وتباسىنا ۇنەمى كوڭىل ءبولىپ وتىرادى. بۇگىن بالالارىمىز ءتۇرلى قىزىققا كەڭەلدى. اتا-انا رەتىندە ايتار العىسىمىز زور, — دەدى ءىس-شاراعا قاتىسۋشى گاۋحار باگاشاروۆا.
ويىندار مەن بايقاۋلاردا بەلسەندىلىك تانىتقان بالالارعا قازاقستان رەسپۋبليكاسى ىشكى ىستەر ءمينيسترىنىڭ ورىنباسارى – ۇلتتىق ۇلاننىڭ باس قولباسشىسى اڭساعان بالتابەكوۆتىڭ اتىنان العىس حاتتار مەن سىيلىقتار تابىستالدى.
كىشكەنتاي قوناقتار ۇلتتىق ۇلاننىڭ اسكەري قىزمەتشىلەرى دايىنداعان بۇل مەرەكەلىك شارادان كوتەرىڭكى كوڭىل-كۇيمەن تارقاستى.
ايتا كەتەيىك, بالالار نازارىنا ۇسىنىلعان «بارىس» 6 × 6, «الان-2», سونداي-اق جاۋىنگەرلىك قورعانىس دەڭگەيى جوعارى «Cobra II» بروندى ماشينالارى بيىلعى ەلوردادا وتكەن اسكەري پارادقا قاتىسقان بولاتىن.