دەنساۋلىق ساقتاۋ مينيسترى اقمارال ءالنازاروۆا قازاقستان-فرانتسيا ينۆەستيتسيالىق فورۋمىندا فارماتسەۆتيكا سالاسىنا تارتىلعان ينۆەستيتسيا كولەمى ەكى ەسەگە كوبەيىپ, 91,3 ملن اقش دوللارىنا جەتكەنىن مالىمدەدى. 2022 جىلى بۇل كورسەتكىش 46,9 ملن دوللار بولعان, دەپ حابارلايدى Egemen.kz.
ءمينيستردىڭ حابارلاۋىنشا, 2023 جىلدىڭ قورىتىندىسى بويىنشا قازاقستاندا وتاندىق فارماتسەۆتيكالىق ءونىم ءوندىرىسى 21,8%-عا ارتىپ, 171,6 ملرد تەڭگەنى قۇراعان. بۇل كورسەتكىش سالاداعى شەتەلدىك جوبالاردى جەرگىلىكتى كاسىپورىنداردا جۇزەگە اسىرۋ باعىتىنداعى جۇيەلى جۇمىستاردىڭ ناتيجەسى.
ءىس-شارادا تاراپتار دەنساۋلىق ساقتاۋ جانە فارماتسەۆتيكا باعىتىندا ىنتىماقتاستىقتى كۇشەيتۋگە باعىتتالعان كەلىسىمدەر مەن مەموراندۋمدارعا قول قويدى. فورۋمعا مەملەكەتتىك ورگاندار, حالىقارالىق ۇيىمدار, جەتەكشى فارمكومپانيالار مەن ەكى ەلدىڭ مەديتسينالىق جوو وكىلدەرى قاتىستى.
اقمارال ءالنازاروۆانىڭ ايتۋىنشا, 2024 جىلى دەنساۋلىق ساقتاۋ سالاسىنا $920 ملن ينۆەستيتسيا تارتىلعان, ونىڭ $330 ملن-ى — جەكە سەكتورعا تيەسىلى. شەتەلدىك ينۆەستورلارعا سالىقتىق جانە كەدەندىك جەڭىلدىكتەر, جوبالىق سۇيەمەلدەۋ, مەملەكەتتىك قورعاۋ كەپىلدىكتەرى ۇسىنىلادى.
سونىمەن قاتار, مينيسترلىك ۇزاق مەرزىمدى كەلىسىمدەر جاساۋدىڭ جاڭا ءتارتىبىن ازىرلەپ جاتىر. بۇدان بىلاي ءدارى-دارمەككە دەگەن قاجەتتىلىك تەك ۋاكىلەتتى ورگان ارقىلى ايقىندالادى. سونداي-اق, تۇپنۇسقالىق پرەپاراتتاردى وندىرۋگە ىنتالاندىرۋ شارالارى ەنگىزىلگەن.
بۇگىندە Pfizer, AstraZeneca جانە Hoffmann-La Roche سەكىلدى حالىقارالىق كومپانيالارمەن 30 ملرد تەڭگە كولەمىندەگى جوبالار اياسىندا ءتورت تۇپنۇسقالىق ءدارى ءوندىرىلىپ جاتىر.
ء«بىز ءۇشىن ينۆەستيتسيانىڭ كولەمى عانا ەمەس, ونىڭ ساپاسى, تۇراقتىلىعى مەن يننوۆاتسيالىق سيپاتى ماڭىزدى. قازاقستان مەديتسينالىق يننوۆاتسيالار مەن مەديتسينالىق قىزمەتتەر ەكسپورتى بويىنشا وڭىرلىك حابقا اينالۋدى كوزدەيدى. ءبىز ۇسىنىستارعا اشىقپىز, العاشقى كەلىسسوزدەردەن باستاپ ناقتى كەلىسىمدەرگە دەيىن بارلىق دەڭگەيدە ديالوگ جۇرگىزۋگە دايىنبىز», دەدى فورۋم بارىسىندا دەنساۋلىق ساقتاۋ ءمينيسترى اقمارال ءالنازاروۆا.
داميرا تولەگەن
ەۇۋ ستۋدەنتى