قر-نىڭ قورعانىس ءمينيسترى گەنەرال-پولكوۆنيك رۋسلان جاقسىلىقوۆ بىشكەكتە وتكەن ۇجىمدىق قاۋىپسىزدىك تۋرالى شارت ۇيىمى قورعانىس مينيسترلەرى كەڭەسىنىڭ وتىرىسىنا قاتىستى. سونىمەن قوسا, اتالعان وتىرىسقا ۇقشۇ قورعانىس ۆەدومستۆولارىنىڭ باسشىلارى, ۇيىمنىڭ باس حاتشىسى يمانعالي تاسماعامبەتوۆ جانە بىرىككەن شتاب باستىعى گەنەرال-پولكوۆنيك اندرەي سەرديۋكوۆ قاتىسىپ, ۇيىمنىڭ جاۋاپكەرشىلىك ايماعىنداعى اسكەري-ساياسي جاعدايدى, ونىڭ مەملەكەتتەردىڭ قاۋىپسىزدىگىنە اسەرىن تالقىلادى, دەپ حابارلايدى Egemen.kz.
وتىرىسقا قاتىسۋشىلار سونىمەن بىرگە ۇقشۇ ۇجىمدىق كۇشتەرىن باسقارۋدى ۇيىمداستىرۋدى جەتىلدىرۋگە باعىتتالعان قۇجاتتاردى قارادى.
قورعانىس ۆەدومستۆولارىنىڭ باسشىلارى 2026-2030 جىلدارعا ارنالعان اسكەري ىنتىماقتاستىقتى دامىتۋ جوسپارىن كەلىستى, بۇل قۇجات ۇيىمنىڭ اسكەري قۇرامداس بولىگىن نىعايتۋعا باعىتتالعان ۇيلەستىرىلگەن ۇيىمداستىرۋشىلىق, تەحنيكالىق جانە پراكتيكالىق ءىس-شارالاردى ىسكە اسىرۋ ماقساتىندا ازىرلەنگەن.
بۇدان بولەك ۇقشۇ قورعانىس مينيسترلەرى كەڭەسىنىڭ شەشىمىمەن ۇقشۇ ۇجىمدىق قاۋىپسىزدىك جۇيەسىنىڭ كۇشتەرى مەن قۇرالدارىن باسقارۋ ورگاندارى مەن قۇرالىمدارىن بىرلەسىپ دايارلاۋدىڭ 2026 جىلعا ارنالعان جوسپارى بەكىتىلدى.
قر قورعانىس مينيسترلىگىنىڭ ءباسپاسوز قىزمەتىنىڭ مالىمدەۋىنشە, وتىرىس اياسىندا ۇقشۇ قورعانىس مينيسترلەرى كەڭەسىنە قاتىسۋشىلاردى قىرعىزستان رەسپۋبليكاسىنىڭ پرەزيدەنتى سادىر جاپاروۆ قابىلدادى. كەزدەسۋ بارىسىندا مەملەكەت باسشىسى قىرعىزستاننىڭ توراعالىعى كەزىندە ۇيىمدى دامىتۋعا دەگەن كوزقاراسىمەن ءبولىسىپ, قاۋىپسىزدىكتى نىعايتۋ, مۇشە ەلدەر اراسىنداعى ءوزارا ءىس-قيمىلدى كەڭەيتۋ جانە ۇجىمدىق قورعانىس تەتىكتەرىنىڭ تيىمدىلىگىن ارتتىرۋ باسىمدىقتارىنا توقتالدى.
سول كۇنى قاتىسۋشى مەملەكەتتەر قورعانىس ۆەدومستۆولارىنىڭ باسشىلارى جەڭىس الاڭىنداعى ماڭگىلىك الاۋعا گۇل شوقتارىن قويىپ, ەكىنشى دۇنيەجۇزىلىك سوعىسىنىڭ باتىرلارىنا تاعزىم ەتتى.