«قازحروم ترانسۇلتتىق كومپانياسى» اق-نىڭ دون تاۋ-كەن بايىتۋ كومبيناتىنا قاراستى «بولاشاق» شاحتاسىندا بولعان توتەنشە جاعدايدان كەيىن ارنايى كوميسسيا قۇرىلىپ, تەرگەۋ جۇمىستارى باستالدى, دەپ حابارلايدى Egemen.kz.
ەستەرىڭىزگە سالا كەتەيىك, 26 مامىر كۇنى شاحتادا سۋتەگى گازى ءبولىنىپ, سونىڭ سالدارىنان ءورت شىققان. اپات كەزىندە ءۇش قىزمەتكەر ءتۇرلى دارەجەدە كۇيىك الىپ, اۋرۋحاناعا جەتكىزىلگەن ەدى.
ۆيتسە-مينيستر شاحتادا بولىپ, زارداپ شەككەن جۇمىسشىلاردىڭ جاعدايىمەن تانىسقان. سول كۇنى-اق ۆيتسە-ءمينيستردىڭ توراعالىعىمەن شاحتادا كاسىپورىن وكىلدەرى مەن مەملەكەتتىك ورگانداردىڭ قاتىسۋىمەن كەڭەس وتكەن.
كەڭەس قورىتىندىسى بويىنشا, ونەركاسىپتىك قاۋىپسىزدىك كوميتەتى توراعاسىنىڭ ورىنباسارى كەڭگىرباي ەسەنەەۆ باسقاراتىن ارنايى كوميسسيا قۇرىلىپ, اپاتتىڭ ناقتى سەبەپتەرى مەن ءمان-جايىن انىقتاۋ جۇمىستارى باستالدى.
«قاۋىپسىزدىك ماقساتىندا شاحتاداعى بارلىق وندىرىستىك جۇمىستار ۋاقىتشا توقتاتىلعان. بۇل شەشىم سۋتەگى شىعارىندىلارىنىڭ قايتالانۋ قاۋپىن ازايتۋ جانە جۇمىسشىلاردىڭ ءومىرىن قورعاۋ ماقساتىندا قابىلداندى. بۇدان بولەك, بولاشاقتا مۇنداي وقيعالاردىڭ الدىن الۋ ءۇشىن سۋتەگى مەن باسقا دا ىلەسپە گازداردىڭ ءبولىنۋ مەحانيزمىن, ولاردىڭ تاۋ-كەن وندىرىسىنە اسەرىن زەرتتەۋ ءۇشىن عىلىمي-زەرتتەۋ ينستيتۋتتارىن تارتۋ ۇسىنىلدى», دەپ حابارلادى توتەنشە جاعدايلار مينيسترلىگىنىڭ ءباسپاسوز قىزمەتى.
ايتا كەتەيىك, تەرگەۋ قورىتىندىسى مەن شاحتانىڭ ارى قارايعى جۇمىسى جونىندە اقپارات قوسىمشا حابارلاناتىن بولادى.