الەۋمەتتىك جەلى مەن باق بەتتەرىندە شەگىرتكەلەردىڭ ءجاپپاي ارى باقىلاۋسىز تارالۋىنا قاتىستى اقپارات تاراپ جاتىر. اۋىل شارۋاشىلىعى مينيسترلىگى بۇل مالىمەت پەن بەينەماتەريالدار شىندىققا جاناسپايتىنىن مالىمدەدى, دەپ جازادى Egemen.kz.
مينيسترلىك ەل اۋماعىندا شەگىرتكەلەردىڭ تارالۋ كولەمى 2,1 ملن گەكتارعا دەيىن جەتۋى مۇمكىن دەپ بولجاپ وتىر. قازىرگى ۋاقىتتا 14 وڭىردە 596,3 مىڭ گەكتار القاپتا وڭدەۋ جۇمىستارى اياقتالعان.
«جۇمىستار جوسپارعا سايكەس, شتاتتىق رەجيمدە جۇرگىزىلىپ جاتىر. ولاردى اۋىل شارۋاشىلىعى ۆيتسە-مينيسترلەرى, اگروونەركاسىپتىك كەشەندەگى مەملەكەتتىك ينسپەكتسيا كوميتەتىنىڭ وكىلدەرى, سونداي-اق وڭىرلەردە قۇرىلعان جەدەل شتابتار باقىلاۋدا ۇستاپ وتىر. اۋىل شارۋاشىلىعى ءمينيسترى ايداربەك ساپاروۆ جامبىل, تۇركىستان جانە قىزىلوردا وبلىستارىنداعى احۋالدى جەكە باقىلاۋىنا العان», دەلىنگەن مينيسترلىك حابارلاماسىندا.
كۇرەس شارالارىنا 443 ارنايى بۇركۋ تەحنيكاسى جۇمىلدىرىلىپ, زەرتتەۋ جۇمىستارىنا 4 625 مامان تارتىلعان. قاجەتتى تەحنيكا مەن پرەپاراتتار قورى جەتكىلىكتى.
اشم جالعان مالىمەت ءۇشىن جاۋاپكەرشىلىك كوزدەلگەنىن ەسكە سالىپ, رەسمي دەرەككوزدەرگە سۇيەنۋگە شاقىرادى.