استانا. 13 اقپان. وڭتۇستىك كورەيانىڭ استاناسى سەۋلدە مانەرلەپ سىرعاناۋدان «ءتورت قۇرلىق ءتۋرنيرى» وتۋدە. العاشقى جارىس كۇنى قازاقستاندىق سپورتشى, سوچي وليمپياداسىنىڭ قولا جۇلدەگەرى دەنيس تەن قىسقا باعدارلاما قورىتىندىسى بويىنشا كوش باستادى. بۇل تۋرالى egemen.kz حابارلادى.
امەريكالىق مامان فرەنك كەرروللدان ءتالىم الاتىن دەنيس سەۋلدەگى جارىستىڭ العاشقى كەزەڭىندە بارلىق جاتتىعۋىن وتە جوعارى دەڭگەيدە ورىندادى. قىسقا باعدارلاما سايىسىندا ءتورت اينالمالى تۋلۋپ, ءۇش اينالمالى اكسەل جانە ءۇش اينالمالى لۋتتس پەن ءۇش اينالمالى تۋلۋپ جاتتىعۋلارىن ورىنداعان قازاقستاندىق مانەرلەپ سىرعاناۋشى تورەشىلەردەن 97,61 ۇپاي الىپ, جالپى ەسەپتە جەكە دارا كوش باستادى. بۇل ۇپاي قىسقا باعدارلاما بويىنشا بيىلعى ماۋسىمداعى ەڭ جوعارى كورسەتكىش. دەنيس تەن اتالعان باعدارلاماداعى ونەرىنە بەلگىلى يتاليالىق كومپوزيتور لۋچو داللانىڭ «كارۋزونى ەسكە الۋ» اتتى شىعارماسىن تاڭداعانىن ايتا كەتەيىك.
قىسقا باعدارلاما بويىنشا ەكىنشى ورىندى جاپونيا سپورتشىسى شوما ۋنو الدى. ونىڭ ونەرىن تورەشىلەر 88,90 ۇپايمەن باعالادى. بۇل ۇپاي ۋنونىڭ جەكە رەكوردى. ۇزدىك ۇشتىكتى 87,34 ۇپايمەن قىتايلىق حان يان تۇيىندەدى. قىتاي سپورتشىسى دا بيىلعى ماۋسىمداعى ەڭ جوعارى ناتيجەسىنە قول جەتكىزىپ وتىر.
كورەياداعى دودادا سىنعا ءتۇسىپ جاتقان تاعى ءبىر وتانداسىمىز ابزال راحىمعاليەۆ العاشقى جاتتىعۋدا 57,54 ۇپايعا يە بولدى. وسى ناتيجەمەن ول 19-ورىنعا تابان تىرەپ, ەركىن باعدارلامادا ونەر كورسەتۋگە مۇمكىندىك الدى. جارىستىڭ شەشۋشى كەزەڭى سانالاتىن بۇل باعدارلاما 14 اقپان كۇنى وتەدى.
«ءتورت قۇرلىق ءتۋرنيرى» مانەرلەپ سىرعاناۋدان وتەتىن ءىرى حالىقارالىق سايىس. 1999 جىلدان بەرى وتكىزىلىپ كەلە جاتقان دوداعا امەريكا, ازيا, افريكا جانە مۇحيت ايماعى ەلدەرىنىڭ سپورتشىلارى قاتىسا الادى.
ەلامان قوڭىر.
دەرەك: egemen.kz.
سۋرەت: isu.org.