استانا. 13 اقپان. قازاقستان, رەسەي جانە بەلارۋس پرەزيدەنتتەرى تاياۋ كۇندەردە ەندى استانادا كەزدەسەدى. بۇل تۋرالى اقوردانىڭ مالىمەتىنە سىلتەمە جاساعان egemen.kz ءتىلشىسى حابارلادى.
اڭگىمە بەلارۋس باسشىسى الەكساندر لۋكاشەنكونىڭ قازاقستان ليدەرى نۇرسۇلتان نازارباەۆقا كەشە تەلەفون سوققان كەزىندە كوتەرىلدى. لۋكاشەنكو ءوزىنىڭ سوزىندە رەسەي, ۋكراينا, فرانتسيا پرەزيدەنتتەرىنىڭ جانە گەرمانيا كانتسلەرىنىڭ مينسكىدە «نورماند فورماتىندا» وتكىزگەن كەلىسسوزدەرىنىڭ قورىتىندىلارى تۋرالى ايتىپ بەردى.
قازاقستان پرەزيدەنتى ءوزىن حاباردار ەتكەنى ءۇشىن وعان العىس ءبىلدىردى جانە كەزدەسۋدىڭ جاقسى ۇيىمداستىرىلۋىمەن, سونداي-اق كەلىسسوزدەردىڭ تابىستى اياقتالۋىمەن قۇتتىقتاۋ لەبىزىن جەتكىزدى.
مەملەكەتتەر باسشىلارى بارلىق تاراپتىڭ بەيبىت ۇدەرىستى قامتاماسىز ەتۋگە جۇمساعان كۇش-جىگەرى ۋكرايناداعى داعدارىستى رەتتەۋگە سەپتىگىن تيگىزەدى دەپ ۇمىتتەنەتىندەرىن ءبىلدىردى.
پرەزيدەنتتەر تاياۋ ارادا ءبىزدىڭ ەلىمىزدە قازاقستان, بەلارۋس جانە رەسەي مەملەكەتتەرى باسشىلارىنىڭ كەزدەسۋىن وتكىزۋ تۋرالى ۋاعدالاستى.
ساكەن مايلىباي.