استانا. 13 اقپان. استانا قالاسىنىڭ اۋەجايىندا ءساۋىر ايىنان باستاپ رەسمي تاكسي جۇمىس جاساي باستايدى. بۇل تۋرالى «قازاقستان» تەلەارناسى حابارلادى.
ارنا ءتىلشىسىنىڭ مالىمەتىنشە, ازاماتتىق اۆياتسيا كوميتەتى, اۋەجاي جانە استانا قالاسىنىڭ اكىمدىگى, سونداي-اق كولىكتەگى ىشكى ىستەر دەپارتامەنت جانە باسقالاردىڭ قاتىسۋىمەن وتكەن كەڭەستىڭ قورىتىندىسى بويىنشا وسىنداي شەشىم قابىلدانعان.
«استانا» اۋەجايى» اشىق اكتسيونەرلىك قوعامىنىڭ توراعاسى بەكەن سەيداحمەتوۆ وسى مىندەتتەردى ىسكە اسىرۋ ماقساتىندا ينۆەستيتسيالار جانە دامۋ مينيسترلىگى اۋەجايداعى زاڭسىز قىزمەت كورسەتىپ جۇرگەن تاكسيستەردىڭ جۇمىسىن توقتاتۋ جوسپارىن ازىرلەگەندىگىن اتاپ ءوتتى.اتالمىش جوسپاردا تاكسيستەردىڭ زاڭسىز قىزمەت كورسەتۋىن تىيۋعا باعىتتالعان قوسىمشا شارالار بەلگىلەنگەن. ەندى مۇنداعى سىرتتان كەلىپ جاتقان جولاۋشىلاردى تاسىمالدايتىن تاكسوموتور پاركى كونكۋرستىق نەگىزدە انىقتالادى.
تاكسيدى اۋەجايدىڭ شەكتەۋلى مۇمكىندىگى بار اۋماعىنان شىقپاي شاقىرتۋعا بولادى. رەسمي تاكسيدىڭ قىزمەتى جونىندە اۆياجولاۋشى ۇشۋ كەزىندە حاباردار ەتىلەدى. اۋەجاي عيماراتىندا قالانىڭ سحەماسى, اۋداندار جانە اياققى نۇكتەگە دەيىن جەتۋدىڭ بىرىڭعاي قۇنى جايىندا قىسقا اقپارات ورنالاسقان باننەرلەر قويىلادى.
«ءبىز جولاۋشىنىڭ قاۋىپسىزدىگىن ەڭ باستى ورىنعا قويامىز. ياعني ونىڭ قاۋىپسىزدىگىنىڭ الدىن الۋ مەن قاۋىپ-قاتەردەن ساقتاندىرۋ, تاكسوموتورلىق قىزمەت ساپاسىن قامتاماسىز ەتۋ - ءبىزدىڭ باستى مىندەتىمىز بولىپ سانالادى. استىرتىن تاسىمالداۋشىلاردىڭ قىزمەت كورسەتۋىنەن استانالىق اۋەجايدىڭ, قالانىڭ كىرەبەرىسىندەگى باستى ايناسى رەتىندەگى ءيميدجى ناشارلايدى. استانالىق جانە باسقا اۋەجايلارداعى مۇنداي جاعدايعا مۇلدەم جول بەرۋگە بولمايدى», - دەپ اتاپ كورسەتتى بەكەن سەيداحمەتوۆ.
سونىمەن بىرگە, ازاماتتىق اۆياتسيانىڭ حالىقارالىق ۇيىمى (يكاو) اۋەجايلار اۋەجاي مەن قالا ارالىعىنداعى قاۋىپسىز جانە جەدەل كولىك بايلانىسىنىڭ بارلىق تالاپتارىنا ساي بولۋىن تالاپ ەتۋدە ەكەندىگىن اتاپ وتكەن.
مۇرات ايتقوجا.
دەرەك, فوتو: «قازاقستان» تەلەارناسى.