استانادا شاحماتتان ەل چەمپيوناتىنىڭ فينالدىق سايىسى باستالدى. بۇل دودانىڭ ەرەكشەلىگى – جاسوسپىرىمدەر بىرىنشىلىگىندە توپ جارعان, جاستار دوداسىندا وزىپ شىققان, جاسوسپىرىمدەر مەن مەكتەپ وقۋشىلارى اراسىندا وتكەن الەم چەمپيوناتىنىڭ دۋىن كورگەن ساڭلاقتار سىنعا تۇسەدى.
اسىلىندە ەل بىرىنشىلىگى جىلدى قايىرىپ, جەلتوقسان ايىنىڭ سوڭىنا قاراي وتەتىن. مۇنداي شەشىمنىڭ قابىلدانۋى كۇنتىزبە جوسپارىنداعى سايىستاردىڭ وتە كوپ ەكەنىن اڭعارتسا كەرەك. بيىلعى بەس ايدىڭ ىشىندە جاسوسپىرىمدەر, جاستار اراسىندا ەل چەمپيوناتى ءوتتى. الەمدىك دودا, ودان بولەك ازيا ايماعىنىڭ بىرىنشىلىگى دە تۇڭلىگىن ءتۇردى. قۇرلىقتىڭ جەكە چەمپيوناتى دا مارەسىنە جەتتى. مىنە, وسىنداي دارەجەلى دودالارعا قاتىسىپ, باي تاجىريبە جيناعان شاحماتشىلار ەلوردا تورىندە تارتىسقا تۇسەدى. ياعني فينالدىق سايىسقا جەتكەن 28 شاحماتشى جۇلدەسى قوماقتى بىرىنشىلىكتىڭ بايگەسى ءۇشىن بارىن سالادى. ولاردىڭ اراسىندا بىلتىرعى ەل بىرىنشىلىگىندە جەڭىمپاز اتانعان 5 ۇزدىك شاحماتشى بار. بيىلعى ىرىكتەۋدىڭ جارتىلاي فينالدىق سىنىندا جوعارى ناتيجە كورسەتكەن 3 ساڭلاق بار. 18 بەن 20 جاسقا دەيىنگى جاستار اراسىندا چەمپيون اتانعان 2 شاحماتشى, سونىمەن قاتار شاحمات فەدەراتسياسى جاتتىقتىرۋشىلار كەڭەسى ۇسىنعان 4 ۇزدىك تە دودادا باعىن سىنايدى.
فينالدىق سايىس ەكى ساناتتا ءوتىپ جاتىر: Open (اشىق) جانە Women (ايەلدەر). ارقايسىسىنا 14 شاحماتشىدان قاتىسادى. ءتۋرنيردىڭ فورماتى 13 تۋردان اينالمالى جۇيەمەن وتەدى. ءار پارتياعا 90 مينۋت بەرىلسە, ءار ءجۇرىس ءۇشىن بىرىنشىسىنەن باستاپ 30 سەكۋند قوسىلادى. جۇلدەگە تىگىلگەن 20 ميلليون تەڭگە ءار سانات بويىنشا جۇلدەلى ورىن العان شاحماتشىلارعا بەرىلەدى. 1-ورىن يەگەرىنە 3 ميلليون, 2-ورىنعا 2 ميلليون, 3-ورىنعا 1,5 ميلليون, 4-ورىنعا 1,2 ميلليون, 5-ورىنعا 900 مىڭ, 6-ورىنعا 700 مىڭ, 7-ورىنعا 500 مىڭ تەڭگە سىياقى بەرىلمەك.
ايەلدەر اراسىندا كەيىنگى 10 جىلدا رەيتينگتىك ۇپايىن ەسەلەپ, ازيا چەمپيوناتىندا جۇلدە العان تالانتتى شاحماتشىلار بار. اتاپ ايتقاندا, ەكى دۇركىن ەل چەمپيونى مەرۋەرت قاماليدەنوۆا, 2023 جىلى ىشكى بىرىنشىلىكتە توپ جارعان كسەنيا بالاباەۆا, بىلتىرعى چەمپيوناتتا وزىق شىققان ءامينا قايىربەكوۆا, بليتستەن ازيا چەمپيونى الۋا نۇرمان. بۇرىمدىلار تارتىسىندا باق سىناۋشىلاردىڭ ەڭ جاس قاتىسۋشىلارى ەلناز قالياحمەت پەن ماريا حولياۆكا, 14 جاستا. جالپى, بيىلعى ەل چەمپيوناتىنىڭ جۇلدەسىنەن ۇمىتكەرلەردىڭ كوپشىلىگى 20 جاسقا تولماعان تالانتتى شاحماتشىلار.
اشىق ساناتتا (Open) الەم چەمپيوناتىنىڭ جۇلدەگەرلەرى, حالىقارالىق تۋرنيرلەردىڭ جەڭىمپازدارى, ايماقتىق تۋرنيرلەردىڭ فيناليستەرى باق سىنايدى. ولاردىڭ اراسىندا بىلتىر 20 جاسقا دەيىنگىلەر اراسىندا الەم چەمپيونى اتانعان قازىبەك نوگەربەك, جاسوسپىرىمدەردىڭ الەمدىك دوداسىندا مەدال ولجالاعان ەرعالي سۇلەيمەن, ازيا ايماعىنىڭ جەڭىمپازى الديار اڭسات, ەكى دۇركىن ەل چەمپيونى دەنيس ماحنيوۆ, رامازان جالماحانوۆ سىندى تالانتتى جاستار بار. ەرەسەكتەر تارتىسىنا قاتىسۋشىلاردىڭ ەڭ جاسى الديار جاۋىنباي نەبارى 13 جاستا.
شاحمات فەدەراتسياسىنىڭ ۆيتسە-پرەزيدەنتى مارات ەسەنوۆ فينالدىق سايىستا باسەكەلەستىك جوعارى بولاتىنىن اتاپ ءوتتى.
«استانادا ءوتىپ جاتقان ەل بىرىنشىلىگىنىڭ فينالدىق دوداسى تارتىسقا تولى بولماق. بۇعان دەيىن حالىقارالىق تۋرنيرلەردە, الەم چەمپيوناتتارىندا ءبىر كوماندادا ەل ابىرويىن قورعاعان ۇزدىكتەر بۇگىندە ءبىر-بىرىنە قارسىلاس بولىپ وينايدى. ۇلتتىق قۇراما كوماندانىڭ باپكەرلەرى وسى سايىستا شەبەرلىگىمەن ءتانتى ەتكەن تالانتتاردى جاھاندىق دودالارعا قوسۋعا قام جاسايدى. دەمەك, جاسوسپىرىمدەر مەن جاستارىمىزعا وزدەرىنىڭ الەۋەتىن كورسەتۋگە وراسان مۇمكىندىك تۋىپ وتىر. مىنا شاحماتشى شاپپاي بايگە الادى دەپ الدىن الا بايلام جاساي المايسىڭ, سەبەبى ىرىكتەۋ كەزەڭىندە تەك كىل مىقتىلار عانا سۋىرىلىپ شىقتى. قۋانارلىعى, ەلىمىزدە شاحماتتان جاستاردىڭ قالىڭ شوعىرى ءوسىپ كەلەدى. كەيىنگى جىلدارداعى الەمدىك سايىستاردان وراسان ولجامەن ورالىپ جۇرگەن ساڭلاقتاردىڭ تابىسى سونىڭ ايعاعى. مەملەكەتتىڭ دە, فەدەراتسيانىڭ دا قامقورلىعى ناتيجەسىندە مەكتەپتەردە شاحمات ۇيىرمەلەرى اشىلىپ, بالالاردىڭ قىزىعۋشىلىعى ارتا ءتۇستى. بيىلعى ەل چەمپيوناتىنىڭ جەڭىمپازى مەن جۇلدەگەرلەرىنە قوماقتى سىياقى بەرىلۋى دە فەدەراتسيانىڭ زياتكەرلىك ويىنعا ايرىقشا كوڭىل بولەتىنىن اڭعارتادى. ودان بولەك, 45 ۇزدىك شاحماتشىنىڭ شەبەرلىگىن شىڭداۋ تالابىن ىنتالاندىرۋ ماقساتىندا قارجىلاي قولداۋ كورسەتىلمەك. باپكەرلەردى, تورەشىلەردى وقىتىپ, تاجىريبەسىن ارتتىرۋىنا دا جاعداي جاسالىپ كەلەدى», دەدى م.ەسەنوۆ.
ەل چەمپيوناتىنىڭ جەڭىمپازدارى مەن جۇلدەگەرلەرى 1 ماۋسىمدا انىقتالادى.