بيىلعى 1 مامىرداعى ەسەپ بويىنشا مەملەكەتتىك الەۋمەتتىك ساقتاندىرۋ قورىنان جۇمىسىنان ايىرىلۋىنا بايلانىستى الەۋمەتتىك تولەم الۋشىلاردىڭ سانى 180,9 مىڭنان استى. ونىڭ ىشىندە 112,8 مىڭ ادامعا العاش رەت تولەم تاعايىندالىپ, 41 ملرد تەڭگە جۇمسالدى.
قولدانىستاعى زاڭناماعا سايكەس جۇمىستان بوساتىلعان جۇمىسكەرلەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە, كەيىنگى 24 ايداعى تابىسىنا بايلانىستى ەسەپتەلەدى. ءار ازامات جۇمىسىنان ايىرىلعان جاعدايدا 1 ايدان 6 ايعا دەيىن الەۋمەتتىك تولەم الادى. تولەنەتىن قاراجات ازاماتتىڭ جۇمىس ىستەپ جۇرگەندەگى تاپقان تابىسىنىڭ 45%-ىنا دەيىنگى مولشەردە ماسق قاراجاتى ەسەبىنەن بەرىلەدى.
جۇمىستان بوساتىلعان جۇمىسكەر الەۋمەتتىك تولەم الۋ ءۇشىن الدىمەن eGov.kz پورتالىندا اۆتوريزاتسيادان وتەدى. «جۇمىسقا ورنالاستىرۋ جانە جۇمىسپەن قامتۋ» بولىمىندە «جۇمىس ىزدەۋشى ادامداردى تىركەۋ» قىزمەتىن تاڭدايدى. ەلەكتروندى تسيفرلىق قولتاڭباسىن قويىپ, ءوتىنىم جولدايدى. 1 كۇن ىشىندە تۇرعىلىقتى جەرىندەگى مانساپ ورتالىعى بوس جۇمىس ورىندارىن ۇسىنادى. ەگەر جۇمىس تابىلماسا, 3 جۇمىس كۇنى ىشىندە جۇمىسسىز دەگەن مارتەبە بەرىلەدى. بۇل قىزمەتتى ونلاين رەجىمدە ەلەكتروندىق ەڭبەك بيرجاسى (enbek.kz) ارقىلى دا الۋعا بولادى.
جۇمىسسىز رەتىندە تىركەلگەننەن كەيىن ەڭبەك جانە حالىقتى الەۋمەتتىك قورعاۋ مينيسترلىگىنىڭ اقپاراتتىق جۇيەسى پرواكتيۆتى فورماتتا مالىمەت جىبەرەدى. مەملەكەتتىك الەۋمەتتىك ساقتاندىرۋ قورىنان تولەم تاعايىنداۋ بويىنشا قىزمەت كورسەتۋگە كەلىسۋ ءۇشىن ءموبيلدى تەلەفونعا SMS-حابارلاما جولدايدى. جۇمىسىنان ايىرىلعان ادام كەلىسسە, حابارلاماعا جاۋاپ قايتارادى. تولەم اۆتوماتتى تۇردە تاعايىندالادى. الەۋمەتتىك تولەم جۇمىستان شىعۋ سەبەپتەرىنە قاراماستان جۇزەگە اسىرىلادى, ءارى جۇمىسسىز قالعان ادامدى جۇمىس تاپقانشا قولداۋ ماقساتىندا بەرىلەدى.