جەڭىس جاڭعىرىعى: سوعىس تاعىلىمى

بيىل گيتلەرلىك گەرمانيامەن سوعىستاعى جەڭىستىڭ 80 جىلدىعىنا وراي, اتا-بابالارىمىزدىڭ مايدانداعى ەرلىگى مەن سول قيلى كەزەڭدەردەگى قالىڭ ەلدىڭ قاسىرەتىن تاعى ءبىر ەسكە الىپ, تاريحي اقتاڭداقتاردى ارشىپ, سوعىس تاعىلىمىن زەردەلەۋگە ەرەكشە ىقىلاستىمىز. ويتكەنى بۇل جەڭىس وڭاي كەلگەن جوق. بۇل – ۇلدارىن زارىعا كۇتىپ جاۋتاڭداعان انالاردىڭ, جارىن جوقتاعان جەسىرلەردىڭ, قۇرساقتا جاتىپ اكەسىنەن ايرىلعان, بەسىكتە جاتىپ تاعدىردىڭ كەرمەك ءدامىن تاتقان, بالالىق شاقتى باستان كەشپەگەن جەتىمدەردىڭ كوز جاسىمەن كەلگەن جەڭىس.

ميلليونداعان ادامنىڭ ءومىرىن قيعان, تالاي ەلدى قاسىرەتكە دۋشار ەتكەن, قانشاما جاننىڭ جۇرەگىنە وشپەس جارا سالعان وسى ءبىر سوعىستا قازاق حالقىنىڭ كورگەن مەحناتى مەن تارتقان ازابى از ەمەس. قازاق دالاسىنان مايدانعا اتتانعان ءاربىر بوزداقتىڭ ىزى-قيعى شايقاستارداعى ەرلىگى مەن تىلداعى قاراپايىم ەڭبەك ادامدارىنىڭ, جەتىمدەر مەن جەسىرلەردىڭ ەڭبەگى مەن كورگەن قيىندىعىن دا سوزبەن جەتكىزۋ مۇمكىن ەمەس.

سوعىستىڭ باستالۋى, ونىڭ بارىسى مەن اياقتالۋى, قورىتىندىسى كەڭەستىك تاريحنامادا, كوركەم ادەبيەتتە قالاي باياندالعانى, قىزىل ارميانىڭ جانقيارلىق ەرلىگى دەرەكتىك, كوركەم فيلمدەردە قالاي ناسيحاتتالعاندىعى دا بارشاعا ايان. ۋاقىت وزعان سايىن, بۇل تاقىرىپقا قاتىستى كوزقاراس تا وزگەرىپ, ءبىز سەنىپ كەلگەن الاساپىران جىلدارىنداعى جاعداياتتار تۋراسىنداعى شىندىق جاڭا قىرىنان اشىلۋدا. وسىناۋ قانقۇيلى كەزەڭ تۋرالى جۇزدەگەن كىتاپتار مەن مىڭداعان ماقالالار جازىلعانمەن, سۇم سوعىس جالماعان تاعدىرلار مەن قابىرعاسى قايىسقان قارالى جانداردىڭ قاسىرەتى جايلى ءالى دە بولسا تولىعىمەن ايتىلماعان اقيقات كوپ.

سۇراپىل سوعىستى كوزىمەن كورىپ, ونىڭ بار اۋىرتپاشىلىعىن موينىمەن كوتەرگەن ارداگەرلەر سانى دا تىم سيرەك. بۇرىنعىداي جەڭىس كۇنى سوعىس قۇرباندارىن ەسكە الۋ ءۇشىن قولدارىنا گۇل شوقتارىن ۇستاپ, ماڭگىلىك الاۋدىڭ قاسىنا جينالاتىن كەۋدەلەرى وردەن-مەدالگە تولى اقساقالدارىمىز دا قازىر جوقتىڭ قاسى. ءبىزدىڭ بالا كەزىمىزدە تايلى تۇياعىمىزبەن تەلەديدار الدىنا ەنتەلەپ كەلىپ كورەتىن سوعىس جايلى, ءوزىمىز ۇلگى تۇتىپ, ەلىكتەگەن باتىرلار حاقىنداعى فيلمدەر دە قازىر كوپ كورسەتىلمەيدى. ءتىپتى تانىمال ارنالارعا جۇكتەلىپ قويعان سوعىس تۋرالى فيلمدەردى دە جاستار كورە بەرمەيدى. عالامتورداعى اقپاراتتار لەگىنىڭ قارقىندىلىعى سونشالىق, بۇگىنگى ۇرپاقتى قىزىقتىراتىن دۇنيەلەردىڭ ءوزى كۇن وتكەن سايىن اسقان جىلدامدىقپەن وزگەرىپ جاتىر.

ءار كەزەڭنىڭ ءوز قىزىعى, ارتىقشىلىعى مەن كەمشىلىگى بولادى. كەي كەزدەرى بۇگىنگى الەم ىزگىلىك اتاۋلىدان الىستاپ بارا جاتقانداي كورىنەدى. سوندىقتان دا وسى ءبىر ولقىلىقتىڭ ورنىن تولتىرۋ ءۇشىن رۋحاني-يدەولوگيالىق ارناداعى قوعامدىق-ساياسي جانە الەۋمەتتىك ماڭىزى بار ىرگەلى جوبالاردى قولعا الۋ ماڭىزدى. 1941-1945 جىلدارداعى فاشيستىك گەرمانياعا قارسى سوعىستاعى قازاقستاندىقتاردىڭ مايدان دالاسىنداعى وشپەس ەرلىگى مەن تىلداعى ەرەن ەڭبەگىن, حابارسىز كەتكەن, ەرلىگى ەلەنبەگەن ەسىل ەرلەردىڭ ەسىمدەرىن حالىق جادىندا جاڭعىرتىپ, وسكەلەڭ ۇرپاقتىڭ ساناسىنا ءسىڭىرۋ ءبىزدىڭ قاسيەتتى پارىزىمىز.

قازىرگى الەمدەگى گەوساياسي احۋال ەلدەگى تۇراقتىلىقتى, حالىقتىڭ تاعاتتىلىعىن, ۇرپاقتىڭ ساياسي ساۋاتتىلىعىن تالاپ ەتەدى. بۇگىنگى كۇن تارتىبىندەگى وسىناۋ وزەكتى ماسەلەگە بايلانىستى ءبىزدىڭ پرەزيدەنتتىك ورتالىقتا ۇيىمداستىرىلاتىن عىلىمي, مادەني جانە ءبىلىم بەرۋ باعىتىنداعى جۇمىستاردىڭ باسىم دەنى جاستاردىڭ بويىندا پاتريوتتىق سەزىمدى, وتانعا دەگەن سۇيىسپەنىشىلىكتى قالىپتاستىرۋ, ۇلتتىڭ ۇلىلىعىن, ەلدىڭ بىرلىگىن ناسيحاتتاۋ ماقساتىنداعى ءىس-شارالار. يدەولوگيالىق ۇيىم رەتىندەگى ەڭ ماڭىزدى تاربيەلىك ميسسيامىزدىڭ ءبىرى – وتان ءۇشىن, ادامزاتتىڭ بولاشاعى ءۇشىن وت كەشكەن قاھارمان بابالارىمىزدىڭ ارۋاعى الدىنداعى تاريحي بورىشىمىزدى ۇمىتپاۋ, وتكەنگە تاعزىم ەتىپ, سوعىس تاعىلىمىن زەردەلەۋ ارقىلى ۇرپاعىمىزدىڭ كەمەل كەلەشەگى مەن مەملەكەتىمىزدىڭ مىزعىماستىعى جولىندا قىزمەت ەتۋ. بەيبىت ءومىردى باعالاۋ – بۇگىنگى بۋىننىڭ باستى مىندەتى.

جەڭىستىڭ جاسامپاز رۋحى ەلدىگىمىز بەن مەملەكەتتىلىگىمىزدىڭ باستى قاعيداتى رەتىندە ءبىزدىڭ ساياسي جاۋاپكەرشىلىگىمىزدى ايقىندايدى. ياعني, جەڭىس – تەك وتكەننىڭ ەستەلىگى ەمەس, بۇگىنگى كۇن مەن بولاشاقتىڭ باعدارى.

باقىتجان تەمىربولات, قازاقستان رەسپۋبليكاسى

پرەزيدەنتتىك ورتالىعىنىڭ ديرەكتورى,

ساياسي عىلىمداردىڭ كانديداتى