كەشە اقوردادا مەملەكەتتىك حاتشى گۇلشارا ابدىقالىقوۆا دۇنيەجۇزىلىك دەنساۋلىق ساقتاۋ ۇيىمى (ددۇ) ەۋروپا ءوڭىرى بيۋروسىنىڭ ديرەكتورى ج.ياكابپەن كەزدەستى.
مەملەكەتتىك حاتشى ج.ياكاب حانىمدى قازاقستان اۋماعىندا, گەوگرافيالىق جاعىنان ددۇ باس شتابىنان ەڭ شالعاي جەردە ورنالاسقان العاشقى مەديتسينالىق-سانيتارلىق كومەك كورسەتۋ ءجونىندەگى ءوفيسىنىڭ اشىلۋىمەن قۇتتىقتادى. بۇل ءوفيستىڭ الماتىدا اشىلۋىنىڭ ەلەۋلى سيمۆوليكالىق ءمانى بار. ويتكەنى, ددۇ-نىڭ مەديتسينالىق-سانيتارلىق كومەك كورسەتۋ جونىندەگى دەكلاراتسياسى العاش رەت 1978 جىلى الماتىدا قابىلدانعان ەدى, دەدى ول.
ددۇ-نىڭ الماتىداعى ءوفيسى ۇيىمعا مۇشە 53 مەملەكەتتىڭ جۇمىسىن ۇيلەستىرۋدى جۇزەگە اسىراتىن ەۋروپا مەن ورتالىق ازيا اۋماعىنداعى العاشقى ءىرى وفيسكە اينالىپ وتىر. ءوفيستىڭ قازاقستان اۋماعىندا اشىلۋى – العاشقى مەديتسينالىق-سانيتارلىق كومەك كورسەتۋ بويىنشا ءبىزدىڭ ەلىمىزدىڭ جاساپ جاتقان جۇمىستارىنىڭ ددۇ تاراپىنان جوعارى باعا العاندىعىنىڭ كورىنىسى. بۇل تۋرالى ج.ياكاب حانىم جۋرناليستەرگە كەزدەسۋدەن سوڭ بايانداپ بەردى. ول قازاقستانداعى «سالاماتتى قازاقستان» باعدارلاماسىن دا جوعارى باعالايتىنىن جەتكىزە كەلىپ, ەلباسىنىڭ ءوز ازاماتتارىنىڭ دەنساۋلىعىن ساقتاۋعا زور كوڭىل بولەتىنىنە ريزاشىلىعىن ءبىلدىردى.
مەملەكەتتىك حاتشىداعى كەزدەسۋدە تاراپتار قازاقستان مەن ددۇ اراسىنداعى ىنتىماقتاستىقتىڭ جاڭا باعىتتارى بويىنشا ءارىپتەستىك قاتىناستاردى تەرەڭدەتە ءتۇسۋ قاجەتتىگىنە توقتالدى. سونىڭ ءىشىندە جۇقپالى جانە جۇقپالى ەمەس دەرتتەرمەن, پوليومەليت, وكپە قۇرتىنا قارسى كۇرەس ماسەلەلەرى ءسوز بولدى.
گ.ابدىقالىقوۆا پرەزيدەنت ن.نازارباەۆتىڭ باستاماسىمەن قولعا الىنعان ازاماتتاردىڭ دەنساۋلىعىن ساقتاۋ سالاسىن دامىتۋ جونىندەگى 2011-2015 جىلدارعا ارنالعان «سالاماتتى قازاقستان» مەملەكەتتىك باعدارلاماسىن ىسكە اسىرۋدا كونسۋلتاتيۆتىك جانە تەحنيكالىق بەلسەندى كومەكتەرى ءۇشىن ددۇ-نىڭ ەۋروپا بيۋروسىنا العىسىن جەتكىزدى.
كەزدەسۋگە دەنساۋلىق ساقتاۋ جانە الەۋمەتتىك دامۋ مينيسترىنىڭ ءبىرىنشى ورىنباسارى س.قايىربەكوۆا, ددۇ-نىڭ قازاقستان رەسپۋبليكاسىنداعى وكىلى م.ۆۋينوۆيچ جانە رەسپۋبليكالىق مەديتسينالىق پالاتانىڭ پرەزيدەنتى م.قۇلجانوۆ قاتىستى.
جاقسىباي سامرات,
«ەگەمەن قازاقستان».