وتانىمىزدىڭ ءبىلىم, عىلىم سالاسىنداعى وتكەن جىلعى جەتىستىكتەر مەن بيىلعى اتقاراتىن جۇمىستار, الداعى مىندەتتەر تۋرالى ءبىلىم جانە عىلىم مينيسترلىگىنىڭ القا جيىنى كەشە پرەمەر-ءمينيستردىڭ ورىنباسارى بەردىبەك ساپارباەۆتىڭ قاتىسۋىمەن ءوتتى.
ءبىلىم جانە عىلىم ءمينيسترى اسلان ءسارىنجىپوۆ ەلباسى نۇرسۇلتان نازارباەۆ العا قويعان تاپسىرمالاردى ورىنداۋ جولىنداعى جوبا-جوسپارعا قىسقاشا توقتالىپ, مەكتەپكە دەيىنگى تاربيەلەۋ جانە وقىتۋ, ورتا ءبىلىم بەرۋ سالاسى, كاسىپتىك ءبىلىمنىڭ جاي-كۇيى, جوعارى وقۋ ورىندارىنىڭ تىنىس-تىرشىلىگى, عىلىمي ىزدەنىستەردىڭ ناتيجەسى تۋرالى ايتىپ, بالاباقشا ماسەلەسىن شەشۋ ءۇشىن 2015-2017 جىلدارى ۇلتتىق قوردان 20 ميلليارد تەڭگە بولىنەتىنىن, وعان 36 عيمارات سالىناتىنىن اتاپ ءوتتى. مەكتەپتەر بويىنشا دا مالىمەتتەر كەلتىرىلدى.
وتكەن جىلى 50 اپاتتى جانە 27 ءۇش اۋىسىمدى مەكتەپتىڭ پروبلەماسى وڭ جولعا ءتۇسىپتى. ءسويتىپ, اپاتتى مەكتەپتەر سانى 136-عا, ءۇش اۋىسىمدى مەكتەپتەر 99-عا تومەندەپتى. تەحنيكالىق جانە كاسىپتىك ءبىلىم بەرۋدى, دۋالدى وقىتۋ جۇيەسىنىڭ ەلەمەنتتەرىن ەسكە سالدى. ەلىمىزدە 127 جوعارى وقۋ ورنى بار كورىنەدى. 341 عىلىمي ۇيىمدار بولسا, وعان بولىنگەن قارجى جىل سايىن ءوسىپ, ناقتىلاي تۇسسەك, 2010 جىلى 20 ميلليارد, 2013 جىلى 53 ميلليارد تەڭگەگە, ياعني ەكى ەسە ءوسىپتى.
بۇل جولعى القانىڭ ءبىر ەرەكشەلىگى ىسكەرلىك جاعدايىندا وتكەنى دەر ەدىك. جۇرتتىڭ قالعىپ كەتكەنىنە قاراماي ۇزىن-سونار بايانداما جاساپ, ءبارىن تىندىردىق دەگەندەرگە ورىندى توسقاۋىلدار قويىلىپ وتىردى. كەي تۇستا, «قول سوعۋشىلار دا» تابىلىپ جاتتى. اسىرەسە, پرەمەر-ءمينيستردىڭ ورىنباسارى بەردىبەك ساپارباەۆ: «ءبىلىم ستاندارتتارى قاشان تياناقتالادى, كوپ جۇرتتى الاڭ ەتىپ وتىرعان وقۋلىقتى وڭالتۋ جايى قالاي؟ دۋالدى وقىتۋ قاشانعا دەيىن ءسوز جۇزىندە قالا بەرەدى؟ ماماندىق تاڭداۋ ىسىندەگى تولعاقتى ماسەلەلەر قاشان ءبىر جۇيەگە تۇسەدى؟ عىلىم سالاسىنا ميللياردتاعان تەڭگە قاراستىرىلسا, ونىڭ ناتيجەسىن قانداي ناقتى مىسالمەن دايەكتەۋگە بولادى؟», دەگەن سۇراقتاردى مينيسترگە توتەسىنەن قويدى. ول كەيبىر جاۋاپتارعا قاناعاتتانباعانىن جاسىرا المادى.
القا قورىتىندىسىندا, بەردىبەك ساپارباەۆ پرەزيدەنتتىڭ قاي كەزدە دە ءبىلىم مەن عىلىمعا باسا كوڭىل ءبولىپ كەلە جاتقانىنا ناقتى مىسالدار كەلتىرىپ, مەملەكەتتىڭ ۇلتتىڭ دامۋى ءبىلىمدى ازاماتقا بايلانىستى ەكەنىن تىلگە تيەك ەتىپ, بىزدەگى باستى ولقىلىق تالداۋ مەن باقىلاۋدىڭ جەتپەي جاتاتىندىعىن اتادى. ءمينيستردىڭ ءبىلىم ستاندارتى بيىل تەك باستاۋىش ەمەس, جوعارى سىنىپتار بويىنشا دا اياقتالادى دەگەنىن قۇپتاپ, ءوزى جاقسى بىلەتىن تالاي مالىمەتتەردى ويعا تۇسىرە وتىرىپ, مينيسترلىك جەرگىلىكتى جەرلەرمەن ءسوز جۇزىندە ەمەس, تىكەلەي ءىس ۇستىندە بايلانىس جاساۋ كەرەكتىگىن قاداپ تۇرىپ ايتتى. ول, سونىمەن بىرگە, وقۋشىلاردى وقۋلىقپەن قامتاماسىز ەتۋ قىركۇيەك ايىندا ورىندالادى دەگەن بايلامعا كەلىسپەيتىنىن, بۇل ءىس تامىزدا تياناقتالىپ, 1 قىركۇيەك كۇنى وقۋشىلاردىڭ قولىندا وقۋلىق بولۋى قاجەتتىگىن تاپسىردى. بۇلاي بولماعان جاعدايدا مينيسترلىك پەن جەرگىلىكتى جەر اراسىندا ءتۇسىنبەۋشىلىكتەر تۋىنداپ, ءبىرىن ءبىرى جازعىراتىن جاعدايلاردىڭ وتكەن جىلى ورىن العانىن ەسكە ءتۇسىردى.
مينيسترلىك شەنەۋنىكتەرى بار جۇمىسى جەرگىلىكتى جەرلەرگە تەلەفون ارقىلى, نە قاپتاعان حاتتارمەن جۇرگىزۋدى ادەتكە اينالدىرعانىن, ەندى وسىنداي تاسىلمەن مالىمەت جيناپ, سۇراعاندارعا سونى ۇلەستىرىپ وتىرا بەرۋدى توقتاتۋ جايىن قوزعادى. دۋالدى وقىتۋ 2008 جىلى باستالعانىن, سودان بەرى شەشىمىن تاپپاۋى قالاي دەپ, القا باستالار الدىندا مينيسترلىكپەن «بازيس-ا», «قازاقستان ونەركاسىپ كورپوراتسياسى» كومپانيالارى اراسىندا استانا قالاسىنداعى قۇرىلىس-تەحنيكالىق كوللەدجىن جانە قاراعاندى قالاسىنداعى پوليتەحنيكالىق كوللەدجىن باسقارۋدى تاپسىرۋ بويىنشا مەموراندۋمعا قول قويىلعانىن اتاپ ايتىپ, مۇنداي قول قويۋلاردان كەيدە ناتيجە بولمايتىنىن, كەلمەسكە كەتكەن كەڭەس داۋىرىندە ۇلكەن زاۋىت, فابريكالاردىڭ قاسىندا مامان دايىندايتىن ۋچيليششەلەر جۇمىس ىستەگەنىن دايەككە كەلتىردى. ول, سونىمەن بىرگە, شاعىن مەكتەپتەر جايىنا دا كوڭىل ءبولىپ, ەگەر بۇل تۋرالى جان-جاقتى زەرتتەۋلەر جاساماساق, بولاشاقتا كەيبىر اۋىلداردى مۇلدە جويىپ الۋ قاۋپى بارىن, ءبىلىم ۇيالارىن ينتەرنەتپەن قامتاماسىز ەتۋ 98 پايىز دەگەن كورسەتكىشتىڭ ءوزى تولىق شىندىققا ساي كەلمەيتىنىن, ونى ەلدى مەكەندەردى ءوز كوزىمەن بارىپ كورگەندەر راستاي الاتىنىن, ينتەراكتيۆتى تاقتانىڭ دا جاعدايى كوڭىل كونشىتپەيتىنىن اتاپ ءوتتى.
سونىمەن, ءبىلىم, عىلىم سالاسىنا ارنالعان القا جيىنى كوتەرىلە ماقتانۋ مەن كوپ تسيفرلارعا جۇگىنىپ, سونى مالدانۋ تۇرعىسىندا ەمەس, ىسكەرلىك جاعدايىندا جالعاسقانىن ايتۋعا ءتيىستىمىز.
سۇلەيمەن مامەت,
«ەگەمەن قازاقستان».