قازاق ءانى شىرقالىپ, كۇي كۇمبىرلەگەن كەش

اقتاۋ قالاسىندا ەتنومادەني بىرلەستىكتەر «مەنىڭ قازاقستانىم» دەپ اتالاتىن وبلىستىق بايقاۋعا قاتىسىپ, قازاق تىلىندە ءان ايتىپ, ۇلتتىق اسپاپتاردا ويناۋدان, كۇي تارتۋدان سايىسقا ءتۇستى.

بۇل بايقاۋ – «اسسامبلەيا جىلى» اياسىندا ماڭعىستاۋدا وتەتىن شارالاردىڭ ءبىرى.  الدىمەن مەملەكەتتىك تىلدە ونەر سايىسىنا تۇسكەن وزگە ۇلت وكىلدەرى الداعى ۋاقىتتا قازاقستاندا تۇراتىن بارلىق ۇلتتاردىڭ تىلىندە ءان ايتىپ, ۇلتتىق اسپاپتارىندا ويناۋ­دان جارىسقا تۇسپەك. ايماقتا تۇراتىن ۇلت وكىل­­­دەرىن ىنتىماقتاستىققا, اۋىز­بىرشىلىككە ۇيىتا ءتۇسۋ, مەملەكەتتىك ءتىل مەن ۇلتتىق ونەرىمىزدى دامىتۋ جانە ۇلتارا­لىق مادەنيەتتى بويلارىنا ءسىڭىرۋ ماقساتىندا ماڭعىستاۋ وبلىستىق مادەنيەت باسقارماسى مەن ماڭعىستاۋ وبلىسىنداعى قازاقستان حالقى اسسامبلەياسى حاتشىلىعى ۇيىمداستىرعان بايقاۋعا اقتاۋداعى بارلىق ەتنومادەني بىرلەستىكتەر اتسالىستى. بايقاۋدا ۋكراينى, ورىسى, تاتارى مەن باشقۇرتى, بەلورۋسى بار وكىلدەر قازاق تىلىندە «ساحنانىڭ ءسانىن كەلتىردى». بەلگىلى سازگەرلەرىمىزدىڭ اندەرى شىرقالىپ, دومبىرادا­ن قازاق­تىڭ كۇيلەرى كۇمبىر­لەدى. مىسالى, ۋكرايندار  م.وماروۆتىڭ «اناشىم» ءانىن,  ە.حا­سانعاليەۆتىڭ «باياناۋىل» ءانىن, م.جاگورقىزىنىڭ «دۋدار-اي» ءانىن ورىنداسا, ورىستار ن.تىلەنديەۆتىڭ «ساعىنار جۇرەگىن», م.وسكەنباەۆتىڭ «جەڭىس» جانە و.دۇيسەنوۆتىڭ «بال­دىرعان» كۇيلەرىن, ال تاتارلار و.اۋباكىروۆتىڭ سوزىنە جا­زىلعان ءا.بەيسەۋوۆتىڭ «مۇ­ڭايما» ءانىن, ابايدىڭ «كوزىمنىڭ قاراسى» اندەرىن شىرقادى. قازاق تىلىندە جەكە نەمەسە حورمەن  ءان شىرقاپ, اسپاپتا ورىنداۋدا بىرىنەن-ءبىرى اسىپ تۇسۋگە تىرىسقانداردان  داعىستان ۇلتىنىڭ وكىلدەرى دە قالعان جوق. ولار ءوز كەزەگىندە حالىق ءانى «ءبىر بالامەن» كورەرمەن قوشەمەتىنە بولەندى, ال بەلورۋستاردىڭ تاڭ­داۋى ش.ساريەۆتىڭ سوزىنە جازىل­عان ب.ورال ۇلىنىڭ «بوزجورعا» انىنە ءتۇسىپتى. قازاقستاندى ورتاق شاڭىراق ەتىپ, ونىڭ اياسىندا تاتۋ-ءتاتتى ءومىر ءسۇرىپ جاتقان بىرنەشە ۇلت ۇرپاقتارىنىڭ جاس-كارى دەمەي قازاق تىلىندە ءان شىرقاۋى, دومبىرادا كۇي تارتۋى ءبىزدى قۋانتتى. قازاق حالقىنىڭ بەلگىلى سازگەرلەرى مەن اقىندارىنىڭ شىعارمالارى بىرىنەن سوڭ ءبىرى ورىندالىپ جاتتى. بۇل سايىس­تا جۇيرىكتەردى تاڭداۋ وڭايعا تۇسكەن جوق, الايدا, «مىڭنان تۇلپار» شىعار شەبەرلەردى انىقتاۋعا تىرىستىق. بىراق, ەڭ باستىسى, قازاق ونەرى, قازاق ءتىلى ارداقتالعان كەش بولدى, تاۋەلسىز وتانىمىزدى مەكەن ەتكەن بىرنەشە ۇلت وكىلىنىڭ دوستىعى قۋانتتى,  دەيدى قازىلار القا­سى­نىڭ مۇشەسى, ءانشى ساليحات قۇدىسوۆا. ونەر سايىسىندا حور, ۆوكال, سولو, ۇلتتىق اسپاپتا ورىنداۋ اتالىمدارى بويىنشا انىقتالعان جەڭىمپازدار سىي-سياپاتتارعا يە بولدى. گۇلايىم شىنتەمىرقىزى, «ەگەمەن قازاقستان». ماڭعىستاۋ وبلىسى. سۋرەتتى تۇسىرگەن  سەرىك مايەمەروۆ.