پرەمەر-مينيستر ولجاس بەكتەنوۆ پەن قازاقستانعا مەملەكەتتىك ساپارمەن كەلگەن ۆەتنام سوتسياليستىك رەسپۋبليكاسى كوممۋنيستىك پارتياسى ورتالىق كوميتەتىنىڭ باس حاتشىسى تو لام ەكىجاقتى ساۋدا-ەكونوميكالىق ىنتىماقتاستىق ماسەلەلەرىن تالقىلادى.
مەملەكەت باسشىسى قاسىم-جومارت توقاەۆ پەن ۆەتنام كوممۋنيستىك پارتياسى ورتالىق كوميتەتىنىڭ باس حاتشىسى تو لام قول قويعان قازاقستان مەن ۆەتنام اراسىندا ستراتەگيالىق سەرىكتەستىك ورناتۋ تۋرالى بىرلەسكەن مالىمدەمەنى جۇزەگە اسىرۋ بويىنشا الداعى جۇمىستارعا نازار اۋدارىلدى. ساۋدا, اۋىل شارۋاشىلىعى, كولىك جانە لوگيستيكا, ازاماتتىق اۆياتسيا, تۋريزم سالاسىنداعى ءوزارا ءىس-قيمىلدى كەڭەيتۋ, تسيفرلىق قىزمەتتەر ەنگىزۋ جانە جي ينتەگراتسياسى بويىنشا وزىق تاجىريبە الماسۋ پەرسپەكتيۆالارى قارالدى.
جوعارى دەڭگەيدە قول جەتكىزىلگەن تاۋار اينالىمىن 2 ملرد دوللارعا دەيىن ارتتىرۋ جونىندەگى ۋاعدالاستىقتار شەڭبەرىندە قازاقستاننىڭ 35 تاۋار اتالىمى اياسىندا ۆەتنام نارىعىنا جەتكىزۋ كولەمىن ۇلعايتۋعا دايىندىعى اتاپ ءوتىلدى. ولاردىڭ ىشىندە مۇناي-حيميا, مەتاللۋرگيا, حيميا, ماشينا جاساۋ, تاماق ونەركاسىبى مەن باسقا دا ونىمدەر بار.
اۋىل شارۋاشىلىعى سالاسىندا وڭ سەرپىن بەلگىلەندى. وتكەن جىلدىڭ قورىتىندىسىنا سايكەس, قازاقستان مەن ۆەتنامنىڭ اوك ونىمدەرى بويىنشا ساۋدا كولەمى 3,5%-عا, قازاقستاندىق اۋىل شارۋاشىلىعى ونىمدەرىن جەتكىزۋ 15 ەسەگە ءوستى. سونداي-اق اۋىل شارۋاشىلىعىنىڭ ونىمدىلىگىن ارتتىرۋعا باعىتتالعان زاماناۋي اگروتەحنولوگيالاردى ەنگىزۋ ءۇشىن عىلىم سالاسىندا تاجىريبە الماسۋ كەلەشەگى زور باعىت سانالادى.
كولىك-لوگيستيكا سالاسىندا ترانسكاسپي حالىقارالىق كولىك باعىتىن دامىتۋ اياسىنداعى ءوزارا ءىس-قيمىلعا نازار اۋدارىلدى. ورتا ءدالىز ۆەتنامنان جۇكتەردى جەتكىزۋ مەرزىمىن قىسقارتۋعا مۇمكىندىك بەرەدى. بۇل ءوزارا ساۋدانى ساپالى جاڭا دەڭگەيگە شىعارۋدى قامتاماسىز ەتەدى.
كەلىسسوزدەر قورىتىندىسى بويىنشا تاراپتار قازاقستان مەن ۆەتنام اراسىنداعى ەكىجاقتى ساۋدا-ەكونوميكالىق ىنتىماقتاستىقتى نىعايتۋ ءۇشىن بارلىق كۇش-جىگەردى جۇمساۋعا نيەتتى ەكەنىن ءبىلدىردى.