پرەمەر-ءمينيستردىڭ ءبىرىنشى ورىنباسارى رومان سكليار جۇمىس ساپارىمەن الماتىدا بولىپ, جەو-2 مەن جەو-3 نىساندارىنداعى جاڭعىرتۋ بارىسىمەن تانىستى. ەنەرگەتيكالىق ينفراقۇرىلىمدى جاڭارتۋ قالانىڭ جىلۋ جانە ەلەكترمەن قامتىلۋ سەنىمدىلىگىن ارتتىرۋعا, ەكولوگيالىق جۇكتەمەنى تومەندەتۋگە باعىتتالعان.
نىسانداردى ارالاۋ بارىسىندا قالا اكىمى دارحان ساتىبالدى مەن جاۋاپتى ۇيىمداردىڭ وكىلدەرى قاتىستى. الاتاۋ اۋدانىندا ورنالاسقان جەو-2 ستانساسىن تابيعي گازعا كوشىرۋ جوباسى ىسكە اسىرىلىپ جاتىر. قۇرىلىس جۇمىسى 2024 جىلى باستالعان, اياقتالۋى بيىلعا جوسپارلانعان. مەردىگەر مىندەتىن قىتاي كومپانيالارىنىڭ كونسورتسيۋمى اتقارادى. جوبا ناتيجەسىندە ساعاتىنا 952 گيگاكالوريا جىلۋ, 600 مەگاۆاتت ەلەكتر وندىرەتىن زاماناۋي گاز ستانساسى ىسكە قوسىلۋعا ءتيىس. بۇل قالاداعى ەنەرگيا تاپشىلىعىنىڭ الدىن الۋعا ءارى اتموسفەراعا تارالاتىن زياندى زاتتار كولەمىن قىسقارتۋعا مۇمكىندىك بەرەدى.
قازىر نەگىزگى ءارى قوسالقى جابدىقتاردى جەتكىزۋ ءىسى تولىق اياقتالۋعا جاقىن. ءۇش گاز تۋربيناسى مەن گەنەراتورلار, ءتورت سۋ جىلىتۋ قازاندىعى ورناتىلعان. كادەگە جاراتۋ قازاندىعىن مونتاجداۋ جالعاسادى. قوسالقى ينفراقۇرىلىم مەن جول جەلىسى دايىن. نەگىزگى قۇرىلىس نىساندارىنداعى جۇمىس شامامەن 55 پايىز دەڭگەيىندە ورىندالعان. باس كورپۋس, سۋ دايىنداۋ جۇيەسى, گاز دايىنداۋ پۋنكتى, ەلەكتر تەحنيكالىق ينفراقۇرىلىم باعىتىندا قۇرىلىس-مونتاج جۇمىسى جۇرگىزىلىپ وتىر.
جەو-2 الماتىداعى ەڭ ءىرى جىلۋ كوزدەرىنىڭ ءبىرى سانالادى. ستانسانى جاڭعىرتۋ مەگاپوليستىڭ ەنەرگەتيكالىق تۇراقتىلىعىن ارتتىرۋمەن قاتار, ەكولوگيالىق قاۋىپسىزدىكتى كۇشەيتۋگە ىقپال ەتەدى.
رومان سكليار جوبانى بەلگىلەنگەن مەرزىمدە اياقتاۋدى, قۇرىلىس ساپاسىن تۇراقتى باقىلاۋدا ۇستاۋدى ءارى جابدىقتاردى جەتكىزۋ كەستەسىن قاتاڭ ساقتاۋدى تاپسىردى. نىساندى جوسپارلانعان ۋاقىتتا ىسكە قوسۋعا بارلىق ۇيىمداستىرۋ شارالارىن جەدەلدەتۋ قاجەت ەكەنى ايتىلدى.
جۇمىس ساپارى بارىسىندا ىلە اۋدانىنداعى جەو-3 ستانساسىن جاڭارتۋ جوباسى دا قارالدى. اتالعان نىسان 2007 جىلدان بەرى «الماتى ەلەكتر ستانسالارى» اكتسيونەرلىك قوعامى قۇرامىندا جۇمىس ىستەپ كەلەدى. جوبا اياسىندا قۋاتى كەمىندە 450 مەگاۆاتت بولاتىن بۋ-گاز قوندىرعىسىن سالۋ مەن توزىعى جەتكەن جابدىقتاردى جاڭارتۋ كوزدەلگەن. قۇرىلىسقا جەرگىلىكتى كومپانيالار كونسورتسيۋمى تارتىلعان.
قازىر ينجەنەرلىك ىزدەستىرۋ مەن جەر دايىنداۋ كەزەڭى تولىق اياقتالعان. ىرگەتاس قۇيۋ, نەگىزگى ينفراقۇرىلىمدى قالىپتاستىرۋ جۇمىسى جۇرگىزىلىپ جاتىر. گاز تۋربينالىق قوندىرعىنىڭ العاشقى جيىنتىعى ورناتىلىپ, جابدىقتاردى مونتاجداۋ جالعاسىپ كەلەدى.
ءبىرىنشى ۆيتسە-پرەمەر قۇرىلىس قارقىنىن كۇشەيتۋدى, جوباعا قاتىسۋشى ۇيىمداردىڭ ۇيلەسىمدى ارەكەتىن قامتاماسىز ەتۋدى تاپسىردى. نىساندى جاڭعىرتۋ ەنەرگەتيكالىق قۋاتتى ارتتىرىپ, ءوڭىردىڭ يندۋستريالىق دامۋىنا قوسىمشا مۇمكىندىك بەرەدى.