جۇرگىزۋشى كۋالىگىن الۋ ءتارتىبىن جەتىلدىرۋ ماسەلەسى ۇكىمەت دەڭگەيىندە تالقىلاندى. پرەمەر-ءمينيستردىڭ ورىنباسارى – جاساندى ينتەللەكت جانە تسيفرلىق دامۋ ءمينيسترى جاسلان ماديەۆتىڭ توراعالىعىمەن وتكەن كەڭەستە ەمتيحان جۇيەسىنىڭ اشىقتىعىن كۇشەيتۋ, قولايلىلىقتى ارتتىرۋ ءارى زاڭسىز ارەكەتتەردىڭ الدىن الۋ تەتىكتەرى قارالدى.
كەڭەس بارىسىندا ىشكى ىستەر مينيسترلىگىمەن بىرلەسىپ ازىرلەنگەن ۇسىنىستار توپتاماسى نازارعا الىندى. نەگىزگى ماقسات – جۇرگىزۋشى كۋالىگىن الۋ ۇدەرىسىن بارىنشا ءادىل, تۇسىنىكتى ءارى قولجەتىمدى ەتۋ, دايارلىق ساپاسىن كوتەرۋ, جەمقورلىق قاتەرىن ازايتۋ.
جاڭا تاسىلگە سايكەس ازاماتتار ەمتيحاندى اقىلى نەگىزدە شەكتەۋسىز تاپسىرا الادى. ءار تالپىنىس اراسىنداعى مەرزىم كەمىندە 10 كۇنتىزبەلىك كۇندى قۇرايدى. قازىرگى تارتىپتە ءۇش تەگىن مۇمكىندىك قاراستىرىلعان, العاشقى ەكى ارەكەت اراسى ءبىر كۇن, ءۇشىنشىسى 30 كۇننەن كەيىن وتكىزىلەدى. بۇدان كەيىن قايتا وقۋدان ءوتۋ تالابى قويىلاتىن. مۇنداي شەكتەۋ كەي جاعدايدا زاڭسىز جول ىزدەۋگە تۇرتكى بولاتىنى ايتىلدى.
قاناتقاقتى جوبا اياسىندا عىلىم جانە جوعارى ءبىلىم مينيسترلىگى ۇلتتىق تەستىلەۋ ورتالىعىنىڭ استانا قالاسىنداعى فيليالى بازاسىندا اكادەميالىق ادالدىقتى قامتاماسىز ەتەتىن تەحنولوگيالار سىنالادى. كەيىن بۇل تاجىريبەنى تەوريالىق ەمتيحان جۇيەسىنە كەڭىنەن ەنگىزۋ كوزدەلىپ وتىر. بۇعان قوسا, ورتالىق تەست تاپسىرمالارىنا كەشەندى پسيحومەتريالىق زەرتتەۋ جۇرگىزەدى. ونىڭ ناتيجەسى جۇرگىزۋشىنىڭ قاۋىپسىز قوزعالىسقا قاجەتتى ءبىلىم مەن داعدىلار دەڭگەيىن ءدال ايقىنداۋعا مۇمكىندىك بەرەدى.
ەمتيحان ۇدەرىسىنە جاساندى ينتەللەكت ەلەمەنتتەرى دە ەنگىزىلەدى. تەوريالىق كەزەڭدە تولىقتىرىلعان شىنايىلىق تەحنولوگياسى قولدانىلسا, پراكتيكالىق سىناق كومپيۋتەرلىك كورۋ جۇيەسىنىڭ كومەگىمەن باقىلانادى. مۇنداي شەشىمدەر تىيىم سالىنعان قۇرىلعىلاردى پايدالانۋ ىقتيمالدىلىعىن ازايتىپ, تالاپ بۇزىلعان جاعدايلاردى ناقتى تىركەۋگە جول اشادى.
اكىمشىلىك جاۋاپكەرشىلىك نورمالارىن ەنگىزۋ دە ۇسىنىلدى. ول قىزمەت الۋشىلارعا دا, زاڭسىز جولمەن كۋالىك الۋعا كومەكتەسەتىن تۇلعالارعا دا قاتىستى بولادى. ەمتيحان كەزىندە ميكروقۇلاققاپ, جاسىرىن كامەرا سەكىلدى قۇرىلعىلاردى قولدانۋ, بايلانىس سيگنالدارىن قابىلدايتىن نەمەسە تاراتاتىن تەحنيكانى پايدالانۋ زاڭ بۇزۋشىلىق رەتىندە قارالادى. مۇنداي جاعدايدا تەوريالىق ەمتيحان تاپسىرۋ قۇقىعىنان ءبىر جىلعا ايىرۋ تەتىگى قاراستىرىلعان.
اۆتومەكتەپتەردىڭ قىزمەتىنە قويىلاتىن تالاپتار دا كۇشەيتىلەدى. باعالاۋ كەزىندە جۇرگىزۋشىلەردى دايارلاۋ ساپاسى مەن ازاماتتاردىڭ پىكىرلەرى ەسكەرىلەدى. ليتسەنزيالاۋ جۇيەسىن ەنگىزۋ جوسپارلانىپ وتىر. وقىتۋ دەڭگەيى تومەن بولعان جاعدايدا رۇقسات قۇجاتىن كەرى قايتارىپ الۋ مۇمكىندىگى كوزدەلگەن.
ۇسىنىلعان شارالار جۇرگىزۋشى كۋالىگىن الۋ راسىمىندەگى اشىقتىقتى ارتتىرىپ, ۇدەرىستى زاماناۋي تالاپتارعا بەيىمدەۋگە باعىتتالعان. جۇيەلى وزگەرىستەر جول قوزعالىسى قاۋىپسىزدىگىن قامتاماسىز ەتۋگە ىقپال ەتەدى.