سەنات توراعاسى ماۋلەن اشىمباەۆ الماتىدا اباي ۇلتتىق مەكتەبى عيماراتىنىڭ قۇرىلىسىمەن تانىستى. اتالعان وقۋ ورنى بيىل ۇلى اقىننىڭ 180 جىلدىعىنا وراي اشىلادى دەپ جوسپارلانىپ وتىر.
ماۋلەن اشىمباەۆ وتاندىق ءبىلىم ساپاسىن ارتتىرۋ ماسەلەسى مەملەكەت باسشىسىنىڭ ۇنەمى باستى نازارىندا ەكەنىن اتاپ ءوتتى. وسى رەتتە اباي ۇلتتىق مەكتەبىنىڭ جاڭا عيماراتىن سالۋ باسەكەگە قابىلەتتى جانە جان-جاقتى دامىعان جاستاردى دايارلاۋ جولىندا ماڭىزدى ءرول اتقارادى. سونداي-اق اتالعان ءبىلىم ورداسىن ويشىلدىڭ مۇراسىن زەرتتەۋ مەن ونى دارىپتەۋ باعىتىنداعى تىرەك وقۋ ورنىنا اينالدىرۋ كوزدەلگەن.
مەكتەپتە ساپالى پروفەسسورلىق-وقىتۋشىلىق قۇرامعا باسىمدىق بەرىلمەك. ودان بولەك, وقىتۋ ۇدەرىسىنە جوعارى بىلىكتى ماماندار مەن پەداگوگتەر جۇمىلدىرىلادى.
«بيىل ۇلى ابايدىڭ تۋعانىنا 180 جىل تولادى. پرەزيدەنت قاسىم-جومارت توقاەۆتىڭ تاپسىرماسىمەن وسى ايتۋلى كۇنگە وراي ۇلتتىق مارتەبەگە يە اباي مەكتەبىن اشۋ جوسپارلانىپ وتىر. ويشىلدىڭ اتىنا ساي ءبىلىم ورداسى بولۋ ايرىقشا ماڭىزعا يە. سوندىقتان وزىق تاجىريبەلەرگە سۇيەنىپ, مەكتەپتىڭ ساپالى پەداگوگيكالىق قۇرامىن جاساقتاۋ قاجەت. مەكتەپ ابايدىڭ «تولىق ادام» فيلوسوفياسى مەن مەملەكەت باسشىسىنىڭ «ادال ازامات» تۇجىرىمداماسىنا تابان تىرەپ, پاتريوتتاردىڭ جاڭا بۋىنىن قالىپتاستىرۋعا ىقپال ەتەدى», دەپ م.اشىمباەۆ جوبانى ىسكە اسىرۋعا قولداۋ كورسەتىپ كەلە جاتقان الماتى قالاسىنىڭ اكىمدىگىنە, وقۋ-اعارتۋ مينيسترلىگىنە, وتاندىق ءبىلىم بەرۋ ءىسىنىڭ بولاشاعىنا بەيجاي قارامايتىن بەلسەندى ازاماتتارعا العىس ءبىلدىردى.
ساپار اياسىندا سەنات توراعاسى مەن دەپۋتاتتار «MOST IT Hub Almaty» يننوۆاتسيالار ورتالىعىنا بارىپ, ونىڭ قىزمەتىمەن تانىستى. بۇل الاڭدا كرەاتيۆتى, تەحنولوگيالىق جانە كاسىپكەرلىك باعىتتاعى جوبالاردى بىرىكتىرۋ ارقىلى ۇلتتىق ەكونوميكانى دامىتۋعا ارنالعان ىرگەلى ىستەر جۇزەگە اسىرىلادى.