اقتاۋدا «Caspi Bitum» بك» جشس جاڭعىرتىلعان بيتۋم زاۋىتى رەسمي تۇردە ىسكە قوسىلدى. بۇل – قازاقستاننىڭ ينفراقۇرىلىمدىق دامۋى ءۇشىن ستراتەگيالىق ماڭىزى بار نىسان, دەپ جازادى Egemen.kz اقپارات اگەنتتىگى.
جوبا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ تىكەلەي تاپسىرماسى بويىنشا جۇزەگە اسىرىلىپ, ەلدىڭ ەنەرگەتيكالىق جانە كولىك تاۋەلسىزدىگىن نىعايتۋدىڭ ماڭىزدى كەزەڭىن بىلدىرەدى.
سالتاناتتى ىسكە قوسۋ راسىمىنە مەملەكەتتىك ورگاندار وكىلدەرى, ونىڭ ىشىندە ماڭعىستاۋ وبلىسىنىڭ اكىمى نۇرداۋلەت قيلىباي, قر ەنەرگەتيكا مينيسترلىگىنىڭ مۇنايدى تاسىمالداۋ جانە وڭدەۋ دەپارتامەنتىنىڭ ديرەكتورى داۋلەت ارىقباەۆ, سونداي-اق «سامۇرىق-قازىنا» اق, «قازمۇنايگاز» ۇك اق جانە CITIC Group سەرىكتەستەرى قاتىستى.
Caspi Bitum زاۋىتىنىڭ جاڭعىرتىلۋى – مۇنايدى تەرەڭ وڭدەۋدى دامىتۋ جانە ەلىمىزدى ساپالى قۇرىلىس ماتەريالدارىمەن قامتاماسىز ەتۋ بويىنشا قر ۇكىمەتىنىڭ ماقساتتى ساياساتىنىڭ ناتيجەسى. جوبا ءبىر اي بۇرىن اياقتالىپ, ۋاقىتىنان بۇرىن ىسكە قوسىلدى. بۇل مەملەكەتتىك ورگانداردىڭ ۇيلەسىمدى جۇمىسى, جوبانى ءتيىمدى باسقارۋ, باس مەردىگەر CITIC Construction مەن بارلىق تارتىلعان مامانداردىڭ بىرلەسكەن ەڭبەگىنىڭ ارقاسىندا مۇمكىن بولدى.
جوبانى ىسكە اسىرۋ جالپىۇلتتىق ماڭىزعا يە. جاڭعىرتۋ ناتيجەسىندە زاۋىتتىڭ جىلدىق مۇناي وڭدەۋ قۋاتى 50%-عا ارتىپ, 1 ميلليون توننادان 1,5 ميلليون تونناعا دەيىن ۇلعايدى. بۇل ەلىمىزدەگى مۇناي وڭدەۋ كولەمىن ارتتىرۋعا ەلەۋلى ۇلەس قوسادى. ەڭ ماڭىزدى جەتىستىك – ستراتەگيالىق ءونىم بولىپ سانالاتىن جول بيتۋمىنىڭ ءوندىرىسى 50%-عا ارتىپ, جىلىنا 750 مىڭ تونناعا جەتتى. بۇل قازاقستاننىڭ جول قۇرىلىسى مەن جوندەۋ جۇمىستارىنا قاجەتتى ساپالى بيتۋمعا دەگەن ىشكى سۇرانىسىن تولىق دەرلىك وتەۋگە مۇمكىندىك بەرەدى. اتاپ ايتقاندا, بۇل «كۇشتى وڭىرلەر – ەل دامۋىنىڭ درايۆەرى» سەكىلدى مەملەكەتتىك باعدارلامالار اياسىندا جول ينفراقۇرىلىمىن دامىتۋعا سەرپىن بەرەدى. سونىمەن قاتار, بيتۋم ءوندىرىسىنىڭ ارتۋى يمپورتقا تاۋەلدىلىكتى ازايتىپ, ىشكى نارىقتا جەتكىزىلىم مەن باعانىڭ تۇراقتىلىعىن قامتاماسىز ەتەدى. بۇل – بۇكىل ەل اۋماعىنداعى ءىرى ينفراقۇرىلىمدىق جوبالاردى ىسكە اسىرۋ ءۇشىن وتە ماڭىزدى.
– «Caspi Bitum جاڭعىرتىلعان زاۋىتىنىڭ ىسكە قوسىلۋى – بۇل بۇكىل ەل ءۇشىن ستراتەگيالىق ماڭىزدى قادام. ول مەملەكەت باسشىسىنىڭ تاپسىرماسىن ورىنداۋ اياسىندا ۇكىمەت پەن ەنەرگەتيكا مينيسترلىگىنىڭ ەرەكشە باقىلاۋىندا بولدى, – دەپ اتاپ ءوتتى قر ەنەرگەتيكا مينيسترلىگى مۇنايدى تاسىمالداۋ جانە وڭدەۋ دەپارتامەنتىنىڭ ديرەكتورى داۋلەت ارىقباەۆ. – وتاندىق بيتۋم ءوندىرىسىنىڭ 50%-عا ءوسۋى جولداردى سالۋ مەن جوندەۋ قارقىنىن جەدەلدەتۋگە, ولاردىڭ ساپاسى مەن ۇزاقمەرزىمدىلىگىن ارتتىرۋعا مۇمكىندىك بەرەدى. بۇل – ينفراقۇرىلىمدى دامىتۋعا, لوگيستيكانى جاقسارتۋعا جانە تۇپتەپ كەلگەندە, قازاقستاندىقتاردىڭ ءومىر ساپاسىن ارتتىرۋعا سالىنعان تىكەلەي ينۆەستيتسيا. اتالعان جوبا – ەلىمىزدىڭ مۇناي وڭدەۋ جانە مۇناي-حيميا ونەركاسىبىن ۇزاق مەرزىمدى دامىتۋعا باعىتتالعان مەملەكەتتىك ساياساتقا ساي, شيكىزاتتىق باعىتتان تەرەڭ وڭدەۋگە كوشۋدىڭ ايقىن ۇلگىسى».
جاڭعىرتۋ جوباسى اياسىندا 140 توننا سالماققا يە 40 مەترلىك ۆاكۋمدىق كولوننا ورناتۋ, ەلوۋ-اۆت قوندىرعىسىن جاڭارتۋ, مىڭداعان مەتر قۇبىرلار مەن كابەلدەر تارتۋ, زاماناۋي اۆتوماتتاندىرۋ جۇيەلەرىن ەنگىزۋ سىندى كۇردەلى تەحنولوگيالىق جۇمىستار اتقارىلدى. بۇل – قازاقستانداعى ينجەنەرلىك-تەحنيكالىق الەۋەتتىڭ جوعارى دەڭگەيىن ايعاقتايدى.
ۇكىمەتتىڭ ءىس-قيمىل جوسپارىنا ەنگىزىلگەن جاڭعىرتىلعان Caspi Bitum زاۋىتىنىڭ ىسكە قوسىلۋى – بۇل جوعارى قوسىلعان قۇنى بار ءونىم وندىرۋگە كوشۋ جونىندەگى مەملەكەتتىك ساياساتتىڭ ناقتى جۇزەگە اسۋىنىڭ كورنەكتى ۇلگىسى. سونداي-اق بۇل جوبا قازاقستاننىڭ قۇرىلىس ماتەريالدارىن ءوندىرۋ بويىنشا وڭىرلىك كوشباسشى رەتىندەگى مارتەبەسىن كۇشەيتەدى.