كەشە پەتروپاۆل قالاسىندا جەڭىستىڭ 80 جىلدىعىنا وراي ۇلى وتان سوعىسىنىڭ ارداگەرى, وبلىستىڭ قۇرمەتتى ازاماتى بولعان ساپار دۇيسەن ۇلى دۇيسەنوۆتىڭ «ەگەمەن قازاقستان» كوشەسىندەگى تۇرعان ۇيىنە ەسكەرتكىش تاقتا ورتاتىلدى.
ساپار دۇيسەنوۆ مايدانعا 1942 جىلى 16 جاسىندا الىنعان. قۇجاتىندا تۋعان جىلى 1924 دەپ كورسەتىلگەنىمەن ونىڭ شىن تۋعان جىلى 1926 ەكەن. اسكەري كوميسسارياتقا اكەسى 18-گە تولعان جوق دەپ قالاي ايتسا دا سەندىرە الماي, بويىنىڭ قالقىڭقىلىعىنا قاراپ, سوعىسقا جارايدى دەپ الىپ كەتكەن. ول كەزدە قىزىل اسكەر شىبىنداي قىرىلىپ, ادام سانى تولماي جاتقان عوي, سوندىقتان كوميسسارياتتاعىلار ەشكىمنىڭ شىندىق سوزىنە قۇلاق اسپاعان.
بالا ساپار سوعىستان اۋىر جارالانىپ كەلىپ, ەكستەرنمەن ونجىلدىق مەكتەپتىڭ اتتەستاتىن الىپ, ەكى جىلدىق زاڭ مەكتەبىن, سىرتتاي ۋنيۆەرسيتەتتى ءبىتىرىپ, سانالى ومىرىندە سوت-پروكۋراتۋرا ورگاندارىندا قىزمەت ەتكەن. سونىڭ زەينەتكە دەيىنگى 13 جىلىن سولتۇستىك قازاقستان وبلىسى پروكۋرورىنىڭ ءبىرىنشى ورىنباسارى قىزمەتىن ابىرويمەن اتقاردى. ول ءوزىنىڭ ادامگەرشىلىك زور قاسيەتىمەن حالىققا قۇرمەتتى, ەلگە بەدەلدى بولدى, جوعارى كاسىبي بىلىكتىلىگىمەن سوت, پروكۋراتۋرا قىزمەتىندە ۇلكەن ابىرويعا بولەندى. ونىڭ ەسىمىن پروكۋراتۋرالىق رەسپۋبليكالىق باسشىلارى دا جاقسى ءبىلىپ, العىس حاتتارىن جىبەرىپ وتىراتىن. ول بىرنەشە وردەن-مەدالدارمەن ماراپاتتالىپ جانە «كسرو پروكۋراتۋراسىنىڭ ەڭبەك سىڭىرگەن قىزمەتكەرى» اتاعىن العان.
ەسكەرتكىش تاقتانى اشۋعا پەتروپاۆلدىقتار وتە كوپ جينالدى. وبلىس اكىمى ع.نۇرمۇحامبەتوۆ ساپار اعانىڭ حالىققا جاساعان ادال قىزمەتى, ۇلكەن ادامگەرشىلىك قاسيەتى جاستارعا ارقاشان دا ۇلگى بولارىن اتاپ ءوتتى. ەسكەرتكىش تاقتانىڭ لەنتاسىن وبلىس پروكۋراتۋراسى ارداگەرلەر ۇيىمىنىڭ تووراعاسى قايشا بايازيتقىزى مەن مايدانگەردىڭ ۇلكەن ۇلى سەرىك ساپار ۇلى كەستى.
پەتروپاۆل