استانادا ۇلى جەڭىستىڭ 80 جىلدىعىنا ارنالعان سالتاناتتى اسكەري شەرۋگە قىزۋ دايىندىق ءجۇرىپ جاتىر. ەل استاناسىنىڭ ورتالىق كوشەلەرىندە كۇن سايىن اسكەريلەر ساپ تۇزەپ, ارنايى تەحنيكالار شەرۋ تارتىبىمەن ءجۇرىپ ءوتۋدى پىسىقتاۋدا, دەپ حابارلايدى Egemen.kz.
وتان قورعاۋشىلار كۇنىنە ارنالعان سالتاناتتى اسكەري شەرۋگە ساناۋلى كۇندەر عانا قالدى. بيىل ەلىمىز ۇلى جەڭىستىڭ 80 جىلدىعىن اتاپ وتەدى.
7 مامىر كۇنى وتەتىن شەرۋ تاۋەلسىزدىك الاڭىندا, «قازاق ەلى» مونۋمەنتىنىڭ جانىندا ۇيىمداستىرىلادى. ەل جۇرەگىندە وتەتىن بۇل كورىنىسكە 4000-نان استام اسكەري قىزمەتشى, 24 پارادتىق ەسەپتوپ, 200-دەن اسا اسكەري تەحنيكا مەن قارۋ-جاراق تۇرلەرى قاتىسادى. سونىمەن قاتار, بيىلعى شەرۋدىڭ ەرەكشەلىگى – اۋە شوۋىنىڭ اۋقىمدىلىعى. قازاقستاننىڭ مايداندىق, ارميالىق جانە اسكەري-كولىكتىك اۆياتسياسى قاتارىنان 66 ۇشۋ اپپاراتى ەلوردا اسپانىندا قالىقتايتىن بولادى.
شەرۋ ءۇش نەگىزگى بولىمنەن تۇرادى. العاشقى كەزەڭ – جاياۋ اسكەردىڭ ساپتىق شەرۋى. ەلىمىزدىڭ ءار تۇكپىرىنەن جينالعان اسكەري بولىمشەلەر بوي تۇزەي ءوتىپ, ەل قورعانىس قۋاتىنىڭ ايقىن بەينەسىن كورسەتپەك.
ەكىنشى بولىمدە كورەرمەندەر نازارىنا مەحانيكالاندىرىلعان كولوننالار ۇسىنىلادى. بۇل قاتاردا تاريحي جاۋىنگەرلىك تەحنيكالار مەن قازىرگى زامانعى زاماناۋي قارۋ-جاراقتار ءوز شەرۋىن وتكىزەدى.
شەرۋدىڭ شارىقتاۋ شەگى – اۋە پارادى. قۋاتتى قوزعالتقىشتار گۇرىلى مەن اسپاندى ءتىلىپ وتەتىن اۆياتسيا – ەلدىڭ اۋە قورعانىسىنىڭ تەمىر قاناتى مەن ايبىندى رۋحىنىڭ بەلگىسى.
اۋە كۇشتەرى 7 مامىردا تولىق قۇرامدا استانا اسپانىندا قالىقتايدى.