اتىراۋ. 12 اقپان. اتىراۋدا جۇمىسسىز جاستار ءۇشىن وتكىزىلگەن جارمەڭكەگە قاتىسقان 20-دان اسا كاسىپورىن 300-گە جۋىق بوس جۇمىس ورنىن ۇسىندى. بۇل تۋرالى egemen.kz ءتىلشىسى حابارلادى.
جارمەڭكەنى وتكىزۋگە كاسىپكەرلەر پالاتاسى مەن جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى, سونداي-اق, «جاستار رەسۋرستىق ورتالىعى» دا اتسالىستى. ءار ءتۇرلى مەنشىكتەگى 20-دان استام كاسىپورىن وكىلدەرى ارناۋلى ورتا جانە جوعارى وقۋ ورىندارىنىڭ تۇلەكتەرى ءۇشىن 300-گە جۋىق بوس جۇمىس ورنى بار ەكەنىن ءمالىم ەتتى. وقۋ ورىندارىنىڭ تۇلەكتەرى كاسىپورىنداردىڭ كادر قىزمەتىنىڭ جەتەكشى ماماندارىمەن اڭگىمەلەسىپ, ءتۇرلى باعىتتا كەڭەستەر الدى.
اتىراۋ وبلىستىق كاسىپكەرلەر پالاتاسى ديرەكتورىنىڭ ورىنباسارى نۇرجان عانيمۇرات ۇلىنىڭ ايتۋىنشا, مۇنداي جارمەڭكە بۇعان دەيىن بىرنەشە رەت وتكىزىلگەن. نەگىزگى ماقسات – جۇمىس ىزدەۋشىلەر مەن جۇمىس بەرۋشىلەر اراسىندا ورتاق تۇسىنىستىك ورناتۋ. ويتكەنى, ەڭبەك نارىعىندا اتالعان تاراپتار اراسىندا شەشىمىن تاپپاعان كوپتەگەن ماسەلە بار. الدىمەن, سۇرانىس پەن ۇسىنىستىڭ سايكەسسىزدىگىنەن باستالادى. ماسەلەن, جوعارى ءبىلىمدى ماماننىڭ ديپلومى بار بولعانىمەن, ەڭبەك ءوتىلى جوق. سونداي-اق, جۇمىس تاجىريبەسى مول ادامنىڭ ارنايى ماماندىعى بولماي شىعادى.
«ماسەلەنىڭ باسقا ءبىر قىرى بار. جۇمىس ىزدەۋشىلەر, اسىرەسە, جاستار الدىمەن, تولەنەتىن جالاقى كولەمىنە نازار اۋدارادى. ولار تومەنگى ساتىداعى جۇمىستارعا بارعىسى كەلمەيدى. مۇمكىندىك بولسا, كەڭسەدە وتىرعاندى قالايدى. سول سەبەپتەن, جۇمىس ىزدەۋشىلەردىڭ تاجىريبەنى ەڭ تومەنگى ساتىداعى جۇمىستى اتقارۋدان جيناۋ قاجەتتىگىن ەسكەرگەنى ءجون», دەيدى اتىراۋ وبلىسىنىڭ كاسىپكەرلەر پالاتاسى ديرەكتورىنىڭ ورىنباسارى نۇرجان عانيمۇرات ۇلى.
جولداسبەك شوپەعۇل.
دەرەك:egemen.kz.
سۋرەت: راحىم قويلىباەۆ.